Ki-demang.com : Centhini

Jilid 8 - Kaca : 1

SÊRAT CÊNTHINI VIII

404 Wirangrong

1.
Sèh Mongraga ngandika ris |
marang Ki Arisbaya lon |
yèn mangkono paman anira yun |
pan arsa udani |
têlênging Kabarèhan |
ayo paman Arisbaya ||

2.
Muga tuduhna wak-mami |
marang prênahê kêdhaton |
Risbaya turira sandika wus |
tumindak lumaris |
mring wana Kabarèhan |
tan kari Ki Jamal Jamil ||

3.
Mangalèr malipir wukir |
lêmpat-lêmpiting lêlêmpong |
prapta kayangan têlêngipun |
Kabarèhan wingit |
kèh têluh taragnyana |
sawulu-wuluning wana ||

4.
Pan dadi setan myang bêlis |
rumab sambang lêlês jorong |
tuwêg jajanggitan blêg-kêthêkur |
thong-thongsot pipindhir |
lêlêmbut jajalanat |
menje kêlunthung thèthèkan ||

5.
Bajangkêrèk olang-aling |
anja-anja lan bêbêthoh |
cicir myang kêmamang ilu-ilu |
kêblak banas-pati |
tulah gêladrang lekrang |
antu grêgês tulah-braja ||

6.
Mangkana Sèh Amongragi |
nèng paseban rawa rumpot |
lire pawêrangkan rawa rumbut |
nulya ngalèr malih |
wana ing kêrabyakan |
tambak calêrong bêbêgan ||

7.
Rawa Pakuwon awingit |
lêrês têlênging kêdhaton |
langkung wingitira lêbêtipun |
kêdhaton kang wus nis |
wontên saka satunggal |
agêng nèng têngahing rawa ||

8.
Kinubêng wit cangkring-cangkring |
myang druju gabus lan mendhong |
sobrah dukut rawa ganggêng tunjung |
biru putih kuning |
toyanya wêning maya |
-maya nyarong kadya kaca ||

Jilid 8 - Kaca : 2

9.
Sèh Mongraga kawan ratri |
nèng Kuwon têlêng kêdhaton |
wana Kêbarèhan lamun surup |
swara lir yaksa ngrik |
myang sima agêluran |
kadya surak mawurahan ||

10.
Umyung swara gora tri |
muring lêmut lawan jingklong |
golongan pêpanthan agrêgunuk |
salumbung gêngnèki |
lumampah awêwêngan |
jêjagowan kêkêbowan ||

11.
Kumêrab amyang tinggi |
pacêt lingsêng rês-êrêspoh |
bêlatung kêpinjal sêmut-latu |
caplak lalêr wilis |
mabyungan tanpa rungwang |
sawêr ulêr ting sêlasar ||

12.
Kêtonggèng myang kalajêngking |
kêlabang dan babak-salo |
tuma tumpa-tumpa uyêl timbun |
angrèp ngêsèt ngintip |
gumrêmêt pal-êmpalan |
wêl-wêlan sabodhag-bodhag ||

13.
Jamal Jamil kirig-kirig |
cêbrik sarwi atêtakon |
marang Arisbaya marmanipun |
kèh kang (ng)gêgilani |
dêdulon nora kaprah |
sukêr jênês jêjêmbêgan ||

14.
Arisbaya anauri |
sarwi bisik-bisik alon |
têlêng Kabarèhan (ng)gih puniku |
wus adat kadyèki |
kabèh pan brêkasakan |
rupa sawiyahing rupa ||

15.
Rawa ing Pakuwon nguni |
tilas kêdhaton ajêmblong |
sang ratu Mahraja Sasrabau |
katêlah samangkin |
malah angkêr kaliwat |
tan kenging kambah ing janma ||

16.
Yèn ta sampuna wong èdi |
bêndara-(n)dika nèng kono |
amêsthi yèn gagrag kari balung |
kewala ngalithik |
(n)dika mangsa suweya |
sakêdhap netranting sirna ||

17.
Gêtih dagingira gusis |
pinangan ing porang potho |
tan kari samêrang dalah sungsum |
balung kari aking |
kang sato nora pêjah |
jilma mara jilma pêjah ||

18.
Dhêlêg-dhêlêg Jamal Jamil |
anjonblong ulate cêlom |
karo pandirangan myarsa tutur |
tyasnya samya miris |
yata Sèh Amongraga |
nèng Pakuwon pakarêman ||

19.
Kèh swarane sabên ratri |
pating jlêrit kadya uwong |
jalwèstri nom tuwa sru gumuruh |
lir wong ngalih-alih |
usung-usung dandanan |
durung gambuh panggenannya ||

Jilid 8 - Kaca : 3

405 Gambuh

1.
Samya gègèr gumuruh |
setan mêmêdi lawan lêlêmbut |
kêblak anggas têluh tulah-braja cicir |
janggitan lan ilu-ilu |
thèthèkan thong-thongsot gonggo ||

2.
Bêbêthuh blêg-kêthuthur |
gidrah-gêladrah ludrêg kalunthung |
wèl-wèl lêthêg kulekah lêngkrah pipidhir |
budhur bênglêng lêngêr saput |
rumab anja-anja jorong ||

3.
Mangkana swaranipun |
payo kabèh padha lunga gupuh |
ngungsi paran awêdi têmên nèng ngriki |
ana tumbal kang linuhung |
lah payo gage ambolos ||

4.
Tan bêtah akukuwu |
anèng kene awak rêmak-rêmpu |
nora kuwat bêbalung lir dènlolosi |
ting jarêlih nguwuh-uwuh |
payo padha ngalih ênggon ||

5.
Gumêdêr swaranipun |
sawusira praptèng kawan dalu |
Sèh Mongraga nabda mring Arisbayèki |
êndi malih kang dinulu |
kang angkêr-angkêr ing kono ||

6.
Arisbaya umatur |
datan wontên malih mung puniku |
ing Pakuwon tilasing têlênging puri |
wingit pribadi kalangkung |
Sèh Mongraga lajêng menggok ||

7.
Mangetan marang gunung |
gunung Watulakar wastanipun |
punthuk alit anèng pipinggiring rawi |
praptèng nginggil wontên watu |
lir blandar lagya cinathok ||

8.
Sadalu anèng ngriku |
samya bubar-bubar dhêmitipun |
ingkang saking Pakuwon akesah malih |
samya jrih marang kang rawuh |
sadaya anglês alolos ||

9.
Sèh Mongraga amuwus |
payo paman Arisbaya mudhun |
lan kang êndi margane ingkang abêcik |
karsèngsun kewala laju |
dalane ingkang mangulon ||

10.
Mring guwa Kalak tèngsun |
Ki Arisbaya alon umatur |
inggih ardi Sèdhèng punika ing mangkin |
mangidul (n)jok ing Selakarung |
nuntên mangilèn kemawon ||

Jilid 8 - Kaca : 4

11.
Risbaya wusnya matur |
Sèh Mongraga anulya tumurun |
lèngsèr saking wana Kabarèhan nênggih |
ardi Sèdhèng menggok ngidul |
praptèng Selakarung ngaso ||

12.
Pan punthuk Selakarung |
apan guwa Sraboja ing riku |
Sèh Mongraga alon dènnya ngandika ris |
paman Arisbaya uwus |
wangsulèng-ngriku kemawon ||

13.
Paman manirarsa laju |
maring Kalak mung tuduhna tèngsun |
Arisbaya umatur sarwi nor-ragi |
lamun parêng sang abagus |
saparan tan nêdya adoh ||

14.
Sèh Mongraga amuwus |
ya wus bangêt paman tarimèngsun |
samya andum salamêt lunga kang kari |
Arisbaya lon umatur |
inggih kawula rumojong ||

15.
Nulya salaman gupuh |
Arisbaya anungkul (n)dhêkukul |
gantya asêsalaman Ki Jamal Jamil |
wus samya andum rahayu |
Arisbaya kantun ing (ng)gon ||

16.
Laju ing lampahipun |
saking Selakarung (n)jujur gunung |
lêlêmpitan jurang pèrèng lêmah miring |
nusup rêngkêding wanagung |
mangalèr anungsun sunglon ||

17.
Sungloning samodra gung |
ngêlojok sabêngawan gêngipun |
lir narmada tukung kêlangkung jronèki |
kadhang sinabrangan prau |
kadhang nut kewala menggok ||

18.
Ing klathak wastanipun |
ngalèr-ngilèn lampahe andarung |
tan ana dirgamèng wanadri kaèsthi |
anasak galagah rayung |
kang ruwêd ing wana bondhot ||

19.
Prapta ing ardi Puthut |
tanah wana Sidakêrsa nêngguh |
kalih ratri dènnya rêrêm anênêpi |
sawusnya nulyènjing laju |
lampahe anduduk-wuloh ||

406 Mêgatruh

1.
Sèh Mongraga andarung lampah lêstantun |
nut tirah ardi Sakêthi |
ardi Bungkak ardi Bau |
ardi Lèrèg ardi Kunci |
ardi Papak ardi Tekong ||

Jilid 8 - Kaca : 5

2.
Ardi Patra ardi Gita ardi Bêruk |
ardi Kèrèn ardi Cawik |
ardi Dhandhang ardi Srumpung |
ardi Lunjar ardi Dadi |
ardi Sanga ardi Terong ||

3.
Ardi Anggamaya ardi Karangulu |
ardi Bodhèh ardi Mrunggi |
mêrga nut ngidêri gunung |
prapta ing Kalak Mongragi |
tumamèng guwa amanggon ||

4.
Langkung sangêt karênan dènnya andulu |
pasang rakiting guwa sri |
lir paseban singupipun |
guwa Kalak tinon wingit |
majêng ngetan mujur ngalor ||

5.
Wiyaripun pangalore pêcak satus |
wiyare pangilènnèki |
apan pêcak pitungpuluh |
pinggir lir langse ngalêngkin |
angayu-apu wiwiron ||

6.
Langiting paseban pan inggilipun |
sangang dhêpa winatawis |
wiwarane wiyaripun |
pêcak kawandasa nênggih |
têngah kori watu togog ||

7.
Ing paseban rakite lir wong mêmantu |
lir gubah ngalèmbrèh asri |
tuwuhan pisang lan têbu |
cêngkir samya karangputih |
gatra tumèmplok anggêbyog ||

8.
Karang putih barêsih lir gulabatu |
pêthak sumilak gumrining |
sadaya rurupanipun |
kang lir ulam jrohan daging |
sangkêp saulaming kêbo ||

9.
Kang sumêlap kang cumanthèl myang gumantung |
warna-warna lir sayêkti |
ambêngan pênak bubucu |
panggang sumêlap atharik |
myang asahan lir sêsugoh ||

10.
Samya watu-karang pêthak sadayèku |
yata Ki Sèh Amongragi |
sakêlangkung sukèng kalbu |
ningali rekaning rakit |
rakit lir lagya mêmanton ||

11.
Nèng gigilang sela langking dènnya lungguh |
pinggir pisan lèr gyannèki |
ing dhampèng rong anyakêdhung |
wus rêrêm Sèh Amongragi |
nulya tumamèng marang jro ||

Jilid 8 - Kaca : 6

12.
Jroning guwa kèh kèsi-kèsi kadulu |
wiyaripun winatawis |
apan pêcak kawanatus |
kilèn sapêngetannèki |
godhange mujur mangulon ||

13.
Pangidule pêcak satus-pitungpuluh |
rolas dhêpa inggilnèki |
Prabadalêm wastanipun |
ingapit pagêr kakêlir |
kiwa têngên mujur ngalor ||

14.
Kang sagodhag kilèn pêtamanan agung |
kang godhag wetan Song-putri |
Prabadalêm têngahipun |
dene sakilèning kori |
jêmbangan carat mancorong ||

15.
Isi toya kêbak apan tundha têlu |
satundha jêmbangan katri |
nyalodhok ngubêngi lumbung |
kang satundha malih katri |
dadya pitu gêng sawiyos ||

16.
Sèh Mongragi siram nèng jêmbangan agung |
tan labêt têlêsing warih |
asêgêr sariranipun |
nging tan têlês dening warih |
srêp ayêm angganya raos ||

17.
Langkung rahmat raose sariranipun |
pirêna nikmating kapti |
Jamal Jamil datan adus |
awak kêbês dening warih |
têlês rambute kumocor ||

18.
Suprandene gêrah-uyang raosipun |
panas rungsang angganèki |
Mongraga mèsêm andulu |
mring wong roro Jamal Jamil |
ing sasmita wus karaos ||

19.
Nulya mring taman kilèn asri dinulu |
reka-rekane lir kitri |
samya jinêmbangan nglajur |
kang lir gagarmayang rakit |
ana kang kadya paidon ||

20.
Kang lir pendah kursi lawan payung-agung |
kang kadya gênthong kalênthing |
miwah kadya sumbul wakul |
ana lir kurungan paksi |
ana kang kadya garêbong ||

21.
Samya sela pêthak maya-maya mancur |
ingajêngan sadayèki |
sangkêp sining taman-santun |
gumilap pating parêlik |
samya ngrêrênyêp amompyor ||

22.
Miwah kang lir gangsa sarancakanipun |
kathah kang kadya tup saji |
tuwin lir palangkan payung |
nulya Ki Sèh Amongragi |
mucung lampahe mangulon ||

Jilid 8 - Kaca : 7

407 Pocung

1.
Yata wau nyabrang kali mili ngidul |
pan sapênggêlangan |
jrone kang lêlèpèn alit |
wiyarira apan amung salumpatan ||

2.
Nulya (n)dulu rakite wisma lir tajug |
ingapit balumbang |
alit pêsagi bot-rawi |
ingubêngan kakêmbangan jinêmbangan ||

3.
Pan ing ngayun wrana gapura palêngkung |
lir rinênggèng patra |
patrapan anut ing pinggir |
winastanan punika ing Pasanggaran ||

4.
Anèng ngriku Sèh Mongraga wolung dalu |
atangat palilah |
ing dalu tahjut lan têsbih |
amunajat salat mualat kiparat ||

5.
Pan sumungku kalangan dènnira sêkung |
anèng Pasanggaran |
tokit mansuh ing Hyang Widdhi |
anêlaskên suhulira mring Hyang Suksma ||

6.
Sawusipun anutug dènnya sumungku |
Ki Sèh Amongraga |
nulya angayêngi malih |
wontên ingkang kapyarsa lir muni gêntha ||

7.
Tinarutus ing lèr-wetan prênahipun |
nut têpi laleyan |
tigang tikung pan kêpanggih |
apan tètèsing tirta kang tibèng toya ||

8.
Saking luhur tumètès clêrènging ranu |
cumêngkling lir gêntha |
mèsêm Ki Sèh Amongraga |
Jamal Jamil ngucap jawane ngumandhang ||

9.
Tètèsipun kang muni lir gêntha tuhu |
Ki Sèh Amongraga |
anapis taman tulya sri |
kang sêngkêran kabèh mancorong lir gêdhah ||

10.
Nulya wangsul mring têngah jarambahipun |
wontên karang saka |
kadya tambining kang wringin |
agêngira cinakêpan gangsal dhêpa ||

11.
Kang (m)bing kidul karang gêng-agêng kadulu |
ingkang kadya kothak |
gêrobog kêmbu myang pêthi |
ting janggêlêg mèpèt ing pinggir atata ||

12.
Nginggilipun kamar agêng tilam arum |
apan inggilira |
saking jêrambah watawis |
kawan dhêpa yèn minggah mêdal ing andha ||

13.
Andhapipun agilig kadya galugu |
sendhe pojok wêtah |
tar mawi tataran kêdhik |
lus kewala mompyor lir galugu gêdhah ||

14.
Duk andulu Mongraga ciptaning kalbu |
kalangkung sukèng tyas |
dangu tumênga manginggil |
iku paran baya panggonanning apa ||

Jilid 8 - Kaca : 8

15.
Lawang luhur ingapit lir payung-agung |
mancur amarkata |
rênyêp lir gêdhah sinuji |
têka ngêndi margane bisa amunggah ||

16.
Baya iku kang sumendhe lir galugu |
nèng pojok ing wetan |
dene tan tutug mênginggil |
kadung kurang sadêdêg têka ing lawang ||

17.
Yata wau Sèh Mongraga karsanipun |
amanjat ing andha |
wus puput ing andha nginggil |
kadung kirang inggilipun salunjakan ||

18.
Astanipun gagap-gagap kang mêndhukul |
myang kêrowok ingkang |
kinarya gondhèlan nginggil |
nulya antuk cêlowokan ingayatan ||

19.
Kang mêndhukul ginujêngan mancad gupuh |
Mongraga wus munggah |
praptèng satêpining kori |
myang rakiting anjurudêmung tyasira ||

408 Jurudêmung

1.
Yata wau Sèh Mongraga |
karênan dènnya andulu |
guwa nginggil lir tilam-rum |
tumamèng jro patilaman |
rêngggane kumêndhung-kêdhung |
lir pinajang lèk murwèndah |
samya gumêbyar umancur ||

2.
Ingapit ing gagar-mayang |
kalangkung asri dinulu |
karang mancorong lir murub |
awor gêbyaring sêsaka |
sangkêp rêngganing jinêm rum |
sumbul kang kêndhi pratula |
kasur guguling krang ulu ||

3.
Lêlangitan ingkang têngah |
tulyèndah lir payung-agung |
wiwiron tundha tri luhung |
myang kang anèng kering kanan |
kêndhaga lante tutunggul |
sangkêp ingkang upacara |
samya gumêbyar sadarum ||

4.
Mangilèn ujuring kamar |
jêrambah kang pinggir kidul |
karang mundri kadya gênuk |
drês katètèsan ing toya |
saking nginggil tuking ranu |
kêbês rêmbês umês toya |
katandha ilining ranu ||

5.
Ambêlik anèng jêrambah |
Sèh Mongraga sukèng kalbu |
cipta jênak anèng ngriku |
tumingal langêning kamar |
ngunandika jroning kalbu |
baya ingkang karya tilam |
sujanma ingkang linuhung ||

Jilid 8 - Kaca : 9

6.
Punjul sêsamining guwa |
guwa tan ana kadyèku |
karya langêning pandulu |
wau Ki Sèh Amongraga |
nèng kamar dènnya sumungku |
priyangga ngêningkên tingal |
tan kacambor ing pandulu ||

7.
Anungge maring Hyang Suksma |
anjamak kasraning wêktu |
dadya neka wêktu-wêktu |
ing dalêm sêlikur dina |
mupid wiridira mansuh |
tanjèhing wêktu ijabah |
wus tan aroro pandulu ||

8.
Layap cêngêng kalêngêngan |
kang cipta rasa wus luyut |
wilayat gaibul guyub |
kumplang plêng tan kumalêndhang |
mulyèng wang-wang wung-uwung |
tan wawêngkon datan tuwang |
judhêg cunthêl thok-thêl munthu ||

9.
Tan kêjêp liyêp tan kêdhap |
ewuh murading asuhul |
tan kêna dinugèng kalbu |
yèku jaman ing kahnêngan |
mênêng sakalir tan mujud |
tan sirna tan kawistara |
mung Hyang Suksma kang Maha Gung ||

10.
Anèng jaman kaelokan |
kewala pribadinipun |
wus langgêng nora sakuthu |
mangkana Sèh Amongraga |
jênêk dènnira manêkung |
lepya wus tan kawêranan |
angga lir kayu katunu ||

11.
Santri ro Ki Jamal Jamil Jamal |
tan sagêd minggah mandhuwur |
anèng sor kewala mupus |
pan sasuka-sukanira |
kalamun karasa lêsu |
mêdal mring jawi ngupaya |
wohwohan katela gantung ||

12.
Tan pati ana nyamikan |
ing Gunung Kalak pan suwung |
mung pring pirang-pirang dhapur |
tan ana lyaning wit-witan |
namung sawiji pring apus |
ardi ingkang kering kanan |
akathah nyamikanipun ||

13.
Ardi Lawa ardi Buntal |
ardi Kêmbang ardi Pagut |
ardi Wire ardi Brayut |
ardi Bunar ardi Pada |
ardi Sanggar ardi Têruh |
ardi Wênang ardi Simbar |
ardi Candha ardi Puguh ||

14.
Anjajah Ki Jamil Jamal |
tulatèn angundhuh-unduh |
nangka kuwèni kêlayu |
nanas bendha pisang kidang |
suwêg uwi gadhung walur |
gowok kêtos lan widara |
lo wilada têbu sawur ||

15.
Apan kongsi patang dina |
angubêngi gunung-gunung |
ngambil wowohan ingundhuh |
kang matêng-matêng pinangan |
karone suka ing kalbu |
tan eling tunggu bêndara |
Ki Jamal alon amuwus ||

Jilid 8 - Kaca : 10

16.
Jamil payo maring guwa |
lamun bêndara andulu |
ring manira lan sirèku |
manawa winastan minggat |
sumaur ya payo wangsul |
mring guwa ngadhêp bêndara |
kang mirongrong amung kayun ||

409 Wirangrong

1.
Yata wau sang Mongragi |
nèng guwa Kalak amanggon |
wus salikur dina anèng ngriku |
luwaran Mongragi |
asiram nèng patukan |
sêgêr angga mari lupa ||

2.
Sawusnya siram anuli |
Mongraga tumurun alon |
prapta ing jêrambah karsanipun |
malbèng ing Songputri |
gogodhag ingkang wetan |
mêdal saking lor marginya ||

3.
Ngandika mring Jamal Jamil |
lah payo malbèng marono |
samya tur sandika sigra laju |
marang ing Songputri |
tumama ing wiwara |
arêpit rakiting guwa ||

4.
Lawang ing guwa lir ruji |
ruji karang amêncorong |
tan sêdhêng dinuga langkung ciut |
korining Song-putri |
mangkana Sèh Mongraga |
umangsuk sêdhêng kewala ||

5.
Ki Jamal Jamil tan kenging |
masuk samya sêsak karo |
tan kêna pinêksa dadya kantun |
wong roro nèng (n)jawi |
pan anganti kewala |
yata Ki Sèh Amongraga ||

6.
Myat langênipun guwa putri |
sangkêp saliring perabot |
raja kaputrèndah rekanipun |
kang kadya tilam mrik |
angapit kêmbar-mayang |
sumbul kawalan pratala ||

7.
Parsikan kasur-guguling |
reka gatrane lir yêktos |
kêndhaga kêkawal karangulu |
poponjèn lan pêthi |
nginggil têngahing tilam |
lir sagung agung sajuga ||

8.
Sumilak putih nêlahi |
kabèh mancorong sri tinon |
sira Sèh Mongraga nulyandulu |
wontên kori malih |
malang lawanging guwa |
patute kadya salêpa ||

9.
Nulya linêbêtan aglis |
sumusup sarwi angesot |
pan kalih landheyan têbihipun |
butule kang kori |
apan anjog mangandhap |
wiyar godhaging gêdhongan ||

10.
Tan pae ingkang kaèksi |
rakiting tilam kinaot |
sangsaya murwèndah kaputrèn mêpêki |
nulya na malih lawang |
arêpit pipit lêmpitan ||

Jilid 8 - Kaca : 11

11.
Kadya gubahan lêlêngkin |
sigra linêbêtan ing jro |
nut wironing karang siluk-siluk |
têkukaning margi |
anjok malih mangandhap |
wiyar godhaging jarambah ||

12.
Tan prabeda rakitnèki |
tilam sangsaya di kaot |
mubyaring parêngga sri dinulu |
lir maniking warih |
sabên sawiji tilam |
lir payung agung kêmbaran ||

13.
Wontên karang anaritis |
ing luhur pinggir kang kulon |
kumucur toyanya tètèsipun |
tibèng sor lir grimis |
kirih ngalèn lir talang |
cêlowok dadya bêbêngan ||

14.
Balumbang alit ambêlik |
Sèh Mongraga duk sira non |
tirta ing antara sukèng kalbu |
ngambil toyastuti |
salat nèng karang kamar |
ambengatkên tangatira ||

15.
Pan tigang ari tri ratri |
dènnya nênêpi ing kono |
tan na katingalan jroning nêkung |
ing sasmita tunggil |
tan ewah kadya saban |
têrate tuwuhing tawang ||

16.
Anungge langgêng tan gingsir |
ing sasmita wus anggathok |
ing cipta tan mamang trusing kalbu |
mangkana Mongragi |
sawusira tri dina |
luwar saking pajungkungan ||

17.
Asiram pêrês nèng bèji |
toya tilasing rêraos |
sawusnya siram karsanipun trus |
tumulya umijil |
cipta laju kewala |
tan giris andarung lampah ||

410 Girisa

1.
Yata Ki Sèh Amongraga |
wus mijil saking jro guwa |
prapta ing (n)jawi kêpanggya |
mring santri ro Jamil Jamal |
Mongraga alon ngandika |
lah payo laju kewala |
ngalor nut paraning karsa |
santri ro matur sandika ||

2.
Nulya wontên janma prapta |
satêngah kapara tuwa |
saking dhukuh Wanasêkar |
Sèh Mongraga lon ngandika |
ki sanak ngêndi wismanya |
lawan sapa arannira |
umatur ingkang liningan |
kawula pun Lokasraya ||

Jilid 8 - Kaca : 12

3.
Marêk kula ing paduka |
(n)tuk punapa anèng guwa |
alon dènnya angandika |
manira santri ngumbara |
moyang ing saparan-paran |
Jamal Jamil nambung sabda |
kula sojar ingandika |
(ng)gih wakane Lokasraya ||

4.
Apan wus salikur dina |
(ng)gubêk jroning guwa Kalak |
rèh pun adate ing Kalak |
pundi kang dadya mampangat |
Lokasraya naur sabda |
adate kang kalampahan |
sadaya dadi pratandha |
uwuk lan angsaling karya ||

5.
Yèn masuk sajroning guwa |
apadhang tan mawi pandam |
barang rurupan katingal |
tandha lamun kinalilan |
luwar tyase kang asusah |
yèn tiyang tan angsal karya |
guwa pêtênge kaliwat |
obor kadhang asring pêjah ||

6.
Dene kang angkêr priyangga |
pêpundhèn ing guwa Kalak |
apan sêkawan panggenan |
kang dhingin Jêmbangan carat |
ping kalih ing Pasanggaran |
ping tiga ing Kamar-dalêm |
ing Song-putri sêkawannya |
pan samya dadya ngalamat ||

7.
Yèn Jêmbangan gêng akêbak |
adus utawa kêramas |
barang kajate glis prapta |
lan malih ing Pasanggaran |
kucur balumbang bak toya |
kaline mili bantaran |
tamtu enggal kang sinêdya |
yèn tan manggih bêgja asat ||

8.
Pucêt sakèhing rurupan |
lan malih ing Kamar-dalêm |
yèn tiyang kang bisa munggah |
yêkti gêng nugrahanira |
kèh tiba lajêng pralaya |
ingkang tan sinungan bêgja |
dene ing Êsong-putri ka |
kang sêdhêng utawa longgar ||

9.
Lujêng sasêdyane têka |
yèn tiyang datan kalilan |
pêsthi sêsak sariranya |
lêngêne mangsa sêdhênga |
de lampah (n)dika punika |
kalangkung angsal nugraha |
Mongraga mèsêm ngandika |
paman donga pakênira ||

10.
Manira iki supaya |
olèh sawabing sasmita |
wus paman rika kariya |
andum waluya kewala |
manirarsa alêlana |
nuruti paranning karsa |
tan wruh wêkasaning lampah |
umatur ingkang liningan ||

Jilid 8 - Kaca : 13

11.
Lamun parêng ingkang karsa |
ngong-aturi mring wismamba |
kawula atur sugata |
angling ya wis sun-tarima |
gya pinaring sêsalaman |
myang Jamal Jamil salaman |
Lokasraya myat Mongraga |
lir mas tumimbaling toya ||

411 Maskumambang

1.
Gya umangkat wau Ki Sèh Amongragi |
pan angalor-ngetan |
nut awan ardi Sakêthi |
Lokasraya tuduh marga ||

2.
Tigang èdhèng dènnira atuduh margi |
nèng ardi Salumbat |
rarywan Mongraga lingnya ris |
wus paman rika baliya ||

3.
Anèng kene kewala pan wus utami |
rika tuduh marga |
Lokasraya matur aris |
inggih kang margi punika ||

4.
Lamun wontên margi sisimpangan ngarsi |
nyidhat ngilèn ngiwa |
sampun paduka margèni |
kang têngên kewala ngetan ||

5.
Anjog ardi Bêlah ngêncêng ngalèr mangkin |
margi gêng kang kambah |
tiyang papasaran sami |
Sèh Mongraga angandika ||

6.
Bangêt trimèngsun mring pakênirèki |
saksana umangkat |
lan santri ro Jamal Jamil |
kapungkur ingkang tinilar ||

7.
Sèh Mongraga mahawan ing wana wukir |
nabrang kali Kêrta |
nut tirah-tirahing wukir |
jujurang sêngkan sinêngkan ||

8.
Ardi Curak ardi Purak ardi Mangir |
ardi Surawana |
ardi Jaya ardi Lusi |
ardi Burat ardi Dara ||

9.
Ardi Singgat ardi Putat ardi Kili |
ardi Watukapa |
ardi Susur ardi Putri |
ardi Bêrèk ardi Setra ||

10.
Ardi Rapang ardi Borang ardi Cicil |
ardi Sukadana |
ardi Kamal ardi Jubris |
ardi Kawat ardi Sarang ||

11.
Pan andarung lampahe Sèh Amongragi |
pan samarga-marga |
guwardi kèh dènampiri |
guwa Prècèt guwa Wawal ||

12.
Guwa Karas guwa Kakar guwa Riris |
myang guwa Saroja |
guwa Gonjak guwa Têlik |
guwa Tasik guwa Sulang ||