Ki-demang.com : Centhini

Jilid 8 - Kaca : 20

417 Pangkur

1.
Praptèng tunggangan balumbang |
ing bêlumbang kêndhiting Pringgadani |
tanah Pancot lurahipun |
ing Gandasuli wetan |
mangkat sing bêlumbang manjat ardi Lawu |
mêdal ing Cêmarawayang |
ing Bukur pêngarip-arip ||

2.
(n)Dêdêr ing jurang mangungang |
watu goling lire wot ugal-agil |
Jamal-Jamil gringgah-grungguh |
kidih-kidih anapak |
gagrunêngan bilah priye kiye iku |
jurang jro tan lumrah-lumrah |
wot dènciki golang-galing ||

3.
Mandah apa kacêmplunga |
Jamal (m)bêkuh (m)buh-êmbuh kang dera ngling |
wus kêlangkung ing wot wau |
praptèng Pangaribaya |
manjat malih ing Marcukundha mandhuwur |
ing watu srêngenge prapta |
jangkêp tundha pitu kori ||

4.
Kèndêl anèng Pakêlêngan |
wusnya raywan arsa nêtêr manginggil |
gya prabawa ardi Lawu |
sirêp sidhêm sakala |
pan jumêgur swabawane ardi Lawu |
baskara tan kawistara |
pêtêng (n)dhêdhêt anglimputi ||

5.
Laban thathit aliwêran |
gumaludhug dhêg-dhèr wawar wor riris |
mêsês bayu bajra lesus |
angidit maputêran |
nêmpuh parang jurang jro sigrong gumrunggung |
sumruwung asru srang-srangan |
sumiyut pancawora writ ||

6.
Gênjot jêt-jêt bumi kontrag |
lindhu pêtak rag-rêg arga grak-grik |
rêg gung agra guntur kêtuk |
pêpangon sela gêmpal |
sol wrêksa pang sêmpal kapêrapal pupul |
sru kasrêg ing angin gora |
gara-gara rèh kagiri ||

7.
Gêlap kumupak mabungkak |
ngakak anglir panjriting nagagini |
pêcut pracalita lacut |
pracandha mawalikan |
pan kumocak muncat talaga jumêgur |
mahagni ing palirangan |
kumukus mulêg nampêki ||

Jilid 8 - Kaca : 21

8.
Gandarum sangêt sumêngak |
suwat-suwut balêdhèg ambrêbêgi |
dhêg dhèr gêdhor mawa lindhu |
lêlèdhèk anggêladhag |
tanpa rungyan gora-godha syuh gumuruh |
pêpêdhut mangampak-ampak |
têdhuh dhèdhèt irawati ||

9.
Kumêrut kang rungkat larat |
lon swara sru lir janma surak jurit |
kulon lor wetan myang kidul |
gumêrah anêrambah |
barung ruging arga gogrog sru gumêbruk |
brag-brêg orêg anggrêg-grêgan |
bumi gonjit gonjang-ganjing ||

10.
Kadya cêpol gumalimpang |
ron-ron rontog mambrak anjrah ing siti |
ardi Lawu lir sinêrtu |
binirat ing Hyang Kala |
ngamah-amah ing rat arga wera ngêjur |
Sèh Mongraga tyas tan wang-wang |
wawêngkon durmaning ardi ||

418 Durma

1.
Sangsaya sru tatêruhing pancabaya |
sakêdhap tan ngêndhani |
swara byung barungan |
jumêbrèt abrèt-brètan |
sumêlèt gumrêbêg angrik |
sindhung prakêmpa |
kampita tang pratiwi ||

2.
Lir tinawu talagardi makêburan |
watu kol kumba têmbis |
mètyagni makantar |
lon paloning parbata |
pucak thêl bêntur samyardi |
byaha ru-ara |
pok wukir moglak-maglik ||

3.
Bumi bêlah watu cêplok sing bantala |
kajêblèsing wiyati |
lir gêlap sayuta |
malêdug anggalêpang |
lirna kang kayu-kayu wit |
jadhêl kabungkah |
rungkat kèrit ing angin ||

4.
Siwat-siwut sumêbut kadya sêsawat |
sabêtan samya sêbit |
bat-bêt ababitan |
bongkoting wit tan bangkat |
bangêt kabuncang ing angin |
datanpa rungyan |
bantala ngawiyati ||

5.
Ing akasa balêdhèg galudhug gêlap |
bubungkak tan ngêgopi |
ring pratala arga |
gograg barubuh |
kasrambah prahara tarik |
angantariksa |
lir pangriking rasêksi ||

Jilid 8 - Kaca : 22

6.
Mèwu-èwu barêng gro sakêthi yuta |
gumlêgêr manêngkêri |
ngêbêki bawana |
ngumandhang anèng tawang |
mina sato wana pêksi |
brusah bur buwah |
kabrasat mêsat posit ||

7.
Kumarutug nyêblok saking ngawang-awang |
sato kewan wanadri |
lir udan mangambak |
sungsun atumpa-tumpa |
myang udan sela karikil |
udan wrêksa swal |
barung adrês dan riris ||

8.
Miwah jawah wêlirang murub kantaran |
tumpêr wangwa kaywa king |
yayah lir kiyamat |
kairub angin topan |
barat pangruwat sakalir |
bajra pênjara |
ngasut ngebat-ebati ||

9.
Makêtêring buwana kabina-bina |
Jamal Jamil (n)drêmimil |
gumêtêr plok-plokan |
sira Ki Jamil Jamal |
rumasa tan manggih urip |
Sèh Amongraga |
ngikis tyasira wingit ||

10.
Luyut lêngut tan kêjêp dènnira layap |
sang monêng tyasnya wêning |
kongsi tigang sangat |
danguning gora godha |
tan antara riris-aris |
sirna byuh ilang |
anggambuh lir winuni ||

419 Gambuh

1.
Tan ana labêtipun |
sakêdhik kang ron mirungga runtuh |
miwah ewah-ewahe sadayanèki |
tan ana singsal salêmut |
bumi kayu watu wutoh ||

2.
Mongraga luwar ing kung |
Jamal Jamil bingar ulatipun |
alon angandika marang santri kalih |
lah payo manjat mandhuwur |
maring arga Dalêm kono ||

3.
Sandika aturipun |
nulya mangkat lon-lonan wong têlu |
langkung arga Rêpat-kêpanasan nênggih |
arga Dièng gya manguntur |
praptèng arga Dalêm manggon ||

4.
Pan kongsi tigang dalu |
anèng arga Dalêm pan sumungku |
bakda Subuh umangkat manjat manginggil |
ngidul ngilèn inggahipun |
mring arga Dumilah kaot ||

5.
Korinya sungsun têlu |
ing bantal têngên ping kalihipun |
satru tapa lan kawi-rêja kang kori |
praptèng pêkayanganipun |
arga Dumilah minaon ||

Jilid 8 - Kaca : 23

6.
Pucak sela binatur |
sinanggar ing wrêksa têkang tajug |
anèng riku Sèh Mongraga kalih ratri |
karsanira laju-laju |
angayêngi kang wawêngkon ||

7.
Ing pawukiranipun |
lêbak punthuke ing ardi Lawu |
wus mangkana umangkat lampahira ris |
nulya na pêci kadulu |
jalak gadhing niup mencok ||

8.
Colot-colot nèng ngayan |
pan sajodho mibêr rêbut dhucung |
lamun têbih jalak gadhing angêntèni |
isthanya lir tuduh-tuduh |
marga simpangan kang menggok ||

9.
Yata wau tinurut |
jalak gadhing wruh paranning laku |
datan têbih tan cêlak kang jalak gadhing |
munggah tinurun tinurut |
cipta tan watir katlangso ||

10.
Karsanira ing kalbu |
mring kawah Candradimuka nêngguh |
saking arga Dumilah kang jalak gadhing |
saparan kewala tinut |
amêgat margi mangisor ||

420 Mêgatruh

1.
Praptèng kawah Candradimuka alungguh |
anèng sela Mandragini |
ing kuna pirantinipun |
duk masih jaman Dewarsi |
ênggèn pasiksan ing kono ||

2.
Yèn wus santi makidhupuh anèng ngriku |
anèng sela Mandragini |
sigra cinêmplungkên gupuh |
mring kawah kang molak-malik |
lêbur tanpa dadi tinon ||

3.
Sèh Mongraga dènnya nênêpi tri dalu |
sawusnya gya mangkat malih |
umanjat ngetan mandhuwur |
masih jalak gadhing prapti |
anggrêmani lampahnya lon ||

Jilid 8 - Kaca : 24

4.
Sêdya mring Karang-kawidadarèn nêngguh |
ardi Mayang dènayêngi |
kawah Candradimuka gung |
atêpung sukuning ardi |
Dumilah kang kidul-kulon ||

5.
Saubênge arga Mayang sadayèku |
ing Pawidadarèn wingit |
sakèhing kang dhukut kruwut |
samya angambar mrik wangi |
tan ana ganda kang awon ||

6.
Sukêt-sukêt lang-alang galagah rayung |
kaywan gêng alit mawangi |
lir tilam ingukupan rum |
kasilir maruta milir |
lir jêjêbadan marbuk wor ||

7.
Prapta ingkang wêkas kilèn wastanipun |
ing Cakrakêmbang tulyasri |
sangkêp sawarnining santun |
nagasari widasari |
puring patramênggala gong ||

8.
Parijatha manis rêja-rêja sagung |
atata marik maripit |
ngubêngi sela sanggar gung |
sanggar Ginêng ranirèki |
Mongraga nèng kono manggon ||

9.
Anèng Sanggar Gênêng amung kalih dalu |
bakda Subuh lajêng malih |
ingkang sinêdya ing kalbu |
ing Pêthaprêlaya ardi |
mucung jalak gadhing katon ||

421 Pocung

1.
Anèng ngayun jalak tuduh marga ayu |
Jamal Jamil ing tyas |
lir jalma si jalak gadhing |
yèn wus tutug si jalak anuli ilang ||

2.
Lampahipun nulya prapta kang jinujug |
ing Pêthapralaya |
nèng ngriku namung saratri |
laju ngidul ngetan marang Tinjomaya ||

3.
Mung sadalu laju mring Cêmarasèwu |
mudhun malih ngetan |
maring ing têlaga pasir |
sadalu gya mring tlaga Sandi sadina ||

4.
Jalak pingul tansah tuduh margèng ngayun |
wangsul malih manjat |
saking dhukuh Gandasuli |
gya ing Selabanthèng ing Cêmaralawang ||

Jilid 8 - Kaca : 25

5.
Lampahipun menggok ngilèn margi ciyut |
rumpil mung satapak |
trêjunging jurang ambambing |
sêdyanira mring guwa Sagala-gala ||

6.
Nèng margèwuh pipitan kang watu-watu |
pangol ginocèkan |
nulya non (n)dhampèng andhêmping |
padhas putih sela gêlur wastanira ||

7.
Jamal Jamil wong roro kandhêg ing laku |
ningali pragalba |
wêkasan samya (ng)garoti |
mamah padhas nèng dhampèng pating kalemprak ||

8.
Ciptèng kalbu iku paran marmanipun |
macan doyan padhas |
athèmol lir mangan daging |
sami kagyat mulat ing janma manungsa ||

9.
Asru gugup pakewuh palayunipun |
tan ana simpangan |
sor jurang jro nginggil ardi |
dadya mèpèt muringis ngisis siyungnya ||

10.
Sèh Amongkung tar wangwang mahawan laju |
sima tan nukarta |
mung gêrêng-gêrêng muringis |
Jamal Jamil tyase pyang-pyang maskumambang ||

422 Maskumambang

1.
Wus kalangkung (ng)gyanning sima kang (ng)gêroti |
kang Sidadya guwa |
yèn nuju wuku sawiji |
Galungan parase sima ||

2.
Jamal Jamil lumampah sarwi anolih |
aningali sima |
lumaku ngetan nut margi |
lunga prapta gênti mara ||

3.
(n)Dulur lima (n)dulur nêm anggênti margi |
marang Selapasah |
ing arga Gêlur (ng)garoti |
padhas kang kinêmah-kêmah ||

4.
Lamun ora Galungan têrkadhang kadhing |
marang Selapasah |
siji loro datan pati |
kaya yèn wuku Galungan ||

5.
Yata Amongraga lampahira ririh |
wus ombèr kang marga |
luk-lukan manjat sakêdhik |
tantara anulya prapta ||

Jilid 8 - Kaca : 26

6.
Anèng guwa Sêgala-gala Mongragi |
wiwaraning guwa |
abuwêng lir lènging bêdhil |
winatara kawan dhêpa ||

7.
Majêng ngidul-ngetan ngongkang jurang trêbis |
ngarsèng kori guwa |
sela gêng-agêng namung tri |
sela Kandhêm sela Gajah ||

8.
Sela Pakan minangka tutup ngalingi |
kang pama wêrana |
jèjèr sumbul lan sela tri |
kang kêkaywan pakis gêlar ||

9.
Arèn majêr tan owah amung sauwit |
sira Sèh Mongraga |
tumama mring guwa wingit |
jro kêncêng datan (n)jlêgodhah ||

10.
Datan pati kaot wiyare lan kori |
lir lènging sanjata |
lêbêtira winatawis |
saonjotan wirangrongan ||

423 Wirangrong

1.
Alêmpêng sumingêp wingit |
jrone mujur ngalor ngulon |
pan sela kewala sadayèku |
sela blêg lan siti |
ing kanan kering kathah |
gêng alit têrusan guwa ||

2.
Kang samipa wiyarnèki |
tan petungan ting palongo |
Ki Sèh Amongraga anèng ngriku |
apan pitung ratri |
angandhas nèng pantongan |
lawange katon sabendha ||

3.
Tan ana toya saprintis |
sumuk panas lir dèn-obong |
Ki Sèh Amongraga sru sumungku |
sukurirèng Widdhi |
nikmat tyas kajênêkan |
nèng guwa Sagala-gala ||

4.
Agorèh Ki Jamal Jamil |
tan tahan grah lir ginodhog |
tansah manjing mêdal sadayèku |
angupaya warih |
tan antuk mung wowohan |
manis-rêja parijatha ||

5.
Tan patya kèh angsalnèki |
sawusnya ngundhuh-undhuh woh |
masuk jroning guwa cêlak pintu |
ingkang radi isis |
yèn kajêron tan kuwat |
panas grah kadya pinanggang ||

Jilid 8 - Kaca : 27

6.
Mangkana wus pitung ratri |
Mongraga dènnira manggon |
luwar sing gwannira arsa mêtu |
pangguh santrinèki |
aris dènnya ngandika |
lah payo laju lêlampah ||

7.
Samya matur sandika glis |
mijil lampahira alon |
wangsul marginira pinggir trêjung |
jurang jro ambambing |
prapta ing Selapasah |
wetaning song wontên singa ||

8.
Pipitu ulur ing margi |
tumingal jalma kaprêgok |
kandhêg lampahira sima nêkuk |
wangsul ngetan malih |
wus ombèr asar-saran |
laju lampahe Mongraga ||

9.
Wangsul arga Dalêm malih |
dènnya minggah ngonjot-onjot |
sarira kalêswan karsanipun |
ngaso ngaring-aring |
anèng sela Pundhutan |
sagênuk pitu tumpukan ||

10.
Bundêr sela alus langking |
nèng kumlasa mujur ngulon |
sumendhe Mongraga akrang ulu |
ing sela kang mundri |
jrambah sor sumayana |
undhakan sela balabak ||

424 Balabak

1.
Sèh Mongraga layap nèng sela Pundhutan |
ênggonne |
Jamal Jamil wruh bêndarane kuwayon |
anggane ||

2.
Jamil mojar Jamal kariya sadhela |
nèng kene |
manira yun ngambil wowohan kang matêng |
yèn olèh ||

3.
Rika dhewe tungguwa kang lagya nendra |
bêcike |
Jamal manthuk pan sarwi amêmêtêki |
padane ||

4.
Tan adangu sakêdhap dènnira layap |
nulya-ge |
angandika si Jamil mau nèng ngêndi |
paranne ||

5.
Alon matur pun Jamil kesah ngupaya |
sêdyane |
ngambil woh-woh kang matêng mênawi angsal |
ing mangke ||

6.
Dangu dènnya anganti maring Ki Jamil |
suwene |
kang inganti-anti tan antara prapta |
lampahe ||

Jilid 8 - Kaca : 28

7.
Angsal wohing parijatha manis-rêja |
kan pange |
Sèh Mongraga mèsêm ningali Ki Jamil |
gupuhe ||

8.
Ki Jamil matur punika woh manis-rêja |
tunggile |
parijatha kang matêng kang lagya nyadham |
sêgêre ||

9.
Sèh Mongraga narima lampahing santri |
gugupe |
wohing manis-rêja kang dhinahar kêdhik |
sarate ||

10.
Wusnya dhahar santrinya kinèn amangan |
karone |
samya sêgêr sarira bisa anjuru |
-dêmunge ||

425 Jurudêmung

1.
Yata wau Sèh Mongraga |
karsanya kewala laju |
santri ro tansah ing pungkur |
ing Arga-dalêm wus prapta |
rarywan sakêdhap awêktu |
bakda salat gya umangkat |
mangalor ing puncakipun ||

2.
Arga Tiling kang sinêdya |
ing arga Dalêm tumurun |
praptèng lalêngkèhing gunung |
pan langkung ing arga Pasar |
nulya wit manjat mandhuwur |
arêsik tan ana wrêksa |
mung lang-alang glagah rayung ||

3.
Kèndêl anèng sela Canggah |
kawit andêdêr mandhuwur |
rumambat watu susulur |
kongyarga Tiling titiga |
sela Canggah sela Lumur |
ing sela Gêsêng kantrinya |
saya nênggêl sêngkanipun ||

4.
Kèndêl nèng ngriku Mongraga |
kêparag gêng Prabawagung |
panasing surya kêlangkung |
cêlak saking pucak arga |
sadungkapan inggilipun |
sumuk bangêt ambêrandang |
sor panasing agni murub ||

5.
Jamal Jamil datan kuwat |
nèng sela Gêsêng samyambruk |
tan bisa manjat mandhuwur |
Sèh Mongraga wlas tumingal |
gya (n)dêdonga ing Hyang Agung |
mèt toya mum gya istika |
katrima pandonganipun ||

6.
Santrinya sakala saras |
datan panas raosipun |
gya jalak gadhing kadulu |
wus samya lêga tyasira |
andulu mring jalak pinggul |
angling suwe datan prapta |
gus jalak gadhing wus rawuh ||

Jilid 8 - Kaca : 29

7.
Sanalika gya katingal |
margane manjat mandhuwur |
pêpangol (ng)gujêngi watu |
nètèr anggujêngi pucak |
kèndêl anèng sela lungguh |
watêsanipun ing pucak |
saisinya wus kadulu ||

8.
Sela itêm blêg sadaya |
wutuh alus anglulumut |
tan kêna tinapak lunyu |
jalak gadhing lincak-lincak |
asung marga kang tan lunyu |
tinurut pêrêt marganya |
prapta têtaraking gunung ||

9.
kêkaywan pucaking arga |
jati jêmpina lan kêpuh |
kusambi tolak trênggulun |
pan arga Tiling punika |
nênggih pêkayanganipun |
Hyang Pramêsthi Girinata |
marma angkêre kêlangkung ||

10.
Arga Tiling pakarêman |
jalma mara jalma lampus |
sato mara sato lampus |
pan tan kêna ingambaha |
kajawi kang wus linuhung |
wawênang munggah ing arga |
katrantang giris tyasipun ||

426 Girisa

1.
Mangkana Sèh Amongraga |
nèng arga Tiling nêm dina |
ngêning tyas kang kawawas |
wusanane sanalika |
nulya na sasmitaning Hyang |
jagad komplang tan katingal |
sêgarardi sèsiningrat |
surya sasi pon tan ana ||

2.
Mung padhang tan kumalêndhang |
aningali dhawakira |
lan garwa ni Tambangraras |
tingaling dalêm sasmita |
sarju roroning atunggal |
nèng tirahing tarate-bang |
wusnya pagut byar wèntèhan |
Sèh Mongraga sukur ing Hyang ||

3.
Nulya ngling mring Jamil Jamal |
payo tumurun sing arga |
santri ro matur sandika |
nulya umangkat lon-lonan |
nut paraning jalak dênta |
tumurun lêngkèh kang wetan |
manjat malih maring arga |
Pamênang saratri siyang ||

4.
Nulya mêdhun saking arga |
arga Bayu inganjatan |
praptèng pucak sêdalu gya |
tumurun malih sumêngka |
mring pucak arga Sadewa |
sadintên sadalu sigra |
mangandhap pan ngalèr-ngetan |
ing lêlêngkèh malih minggah ||

Jilid 8 - Kaca : 30

5.
Pucak arga Candhirêngga |
tri ratri nulya mahawan |
tumurun kêndhit tênggangan |
laju tumurun sumêngka |
arga Rimbi pucakira |
sadalu nulya umangkat |
tumurun lajêng sumêngka |
arga Kalithi pucaknya ||

6.
Tri ratri sigra mangandhap |
sumêngka malih mring arga |
arga Aji kalih dina |
tumurun lêngkèh sumêngka |
arga Bintulu sadina |
pan wus kajajah sadaya |
nulya tumurun Mongraga |
ngilèn nut lêngkèhing arga ||

7.
Arga Tiling sukunira |
têmbing kawah palirangan |
tumurun mring gunung Anak |
mring ardi Sukuh myang Tambak |
kèh brahala rêca-rêca |
rakit-rakite lir pura |
tilas talêsing kêliran |
labêt cêpuri kadhatyan ||

8.
Pilaring kori pinatra |
wiwindon ukir-ukiran |
kèh rineka samya sela |
blumbang binotrawi patra |
gapura rinaja wêtha |
ingukir bintulu praba |
caritane puranira |
sang Aprabu Brajadênta ||

9.
Brajamusthi gunung Tambak |
dening Pringgadani pura |
kadhatonnya Sri Arimba |
lan ari ran Prabakesa |
kadang pan sami rasêksa |
sawiji Arimbi kenya |
yata wau Sèh Mongraga |
kalih ratri gya umangkat ||

10.
Mangidul mring ardi Tambak |
samya kathah ardinira |
lan Sukuh tan pati beda |
sadintên sadalu sigra |
ngidul-ngetan jurang sêngkan |
mring Pringgadani sinêdya |
praptèng puncaking aldaka |
arêrêp mung kalih dintên ||

11.
Têmbing kidul langkung arga |
sela gêng lir gunung-anak |
ing sela Rimbag wastanya |
munggul nginggiling jujurang |
têngah malêkah lir bêngkah |
angudal jurang toyanya |
gumrajag sru kumêrangsang |
kali Bandhul sirahira ||

12.
Byar enjing laju kewala |
sêdya wangsul mring balumbang |
tumurun pèrènging jurang |
rarywan nèng lorog cêlangap |
nèng sela Brajamusthi ka |
langkung gêng mèh jujul jurang |
ing kuna kêpêlanira |
sira sang Prabu Tutuka ||

Jilid 8 - Kaca : 31

13.
Lir gajah andhêkêm jurang |
kakalih mèh sami gêngnya |
ran sela Parabakesa |
Sèh Mongnêng mulat kacaryan |
sèyub katawingan jurang |
ajênak dènnira lênggah |
Sèh Mongraga ngling prayoga |
santri matur lir kukila ||

427 Dhandhanggula

1.
Lon ngandika Ki Sèh Amongragi |
paran wus tapis arga sadaya |
ing gunung Lawu pucake |
Jamal Jamil umatur |
kados sampun tan wontên kari |
pupunthuk pawukiran |
pucak ardi Lawu |
lêlêngkèh lêmpong lêlêbak |
kaidêran waradin bubucu wukir |
kidul sapêngalèrnya ||

2.
Yata wontên wong sawiji prapti |
saking kidul tumurun ing jurang |
angênêr gati lampahe |
murugi ing (ng)gwannipun |
ingkang lagya eca alinggih |
dèn-adhêp santrinira |
nèng ngandhap tumungkul |
kang sêdya mara gya prapta |
anut lungguh sêmune adingkik-dingkik |
asandi abipraya ||

3.
Anèng sela Prabakesa linggih |
sarwi amangku kudhi têrantang |
polèng kênthing pênganggone |
ing wayah têngah tuwuh |
pan kêpara lingsir sakêdhik |
kêthu sinjang puntiran |
ngaluwêr lir unthuk |
-ing cacing nyakot kiyongan |
athi-athi marênthil gimbal ing sumping |
jenggot mèh ngangkat gimbal ||

4.
Sabuk talidhatu tasbèh kranthing |
mawi kathok kayu tutup rasa |
nging maksih nganggo jarite |
wayah sêdhêng agêntur |
mangkya dèrèng lagya anitik |
dhepok samangsa-mangsa |
dènnira anggêntur |
anggrit kêlèng nèng pakuman |
Sèh Mongraga tatajêm jatmika wingit |
Jamal Jamil duk mulat ||