Ki-demang.com : Centhini

Jilid 9 - Kaca : 34

521 Sinom

1.
Wau ni randha Sêmbada |
matur mring Kulawiryèki |
punika sampun sumangga |
kawula aturi ngibing |
radi kêdangon kêdhik |
Jèngraga anjawil dhêngkul |
wawi ta ingaturan |
jumênêng paduka ngibing |
ingkang paman sigra ngadêg ing kalangan ||

2.
Sêdaya ingkang linggihan |
samya ngadêg anjênêngi |
jumênêng Ki Jayèngraga |
angrimong jingga rêspati |
anulya lêkas ngibing |
anyanguk thêk pacak-gulu |
bêksa rangin araras |
mêthènthèng lir Bima-kunthing |
pan katongton baguse kadya jajaka ||

3.
Mênthang asta anêmbirang |
ronggèng ro nindur mangarsi |
tumèplok ing wêntis malang |
barêng ngêlik Genjung-goling |
lir wulung ro kapipit |
mêrit anjêlirit runtut |
angêlik lêlantikan |
mêrit mêthêt mêthêt ati |
anêratas lir tinutus tyas kang myarsa ||

4.
Ni randha myat bêksanira |
pacake langkung rêspati |
sigra angrakiti pasang |
miwir sondhère kumitir |
tindak irama sami |
samêkta sasolahipun |
ababag kadi bang-bang |
Pujadewa Pujasêkti |
para umbul bubundhêl pêtinggi desa ||

5.
Sinasmitan ing randha |
sarêng surake gora ngrik |
(m)bêkik kukuk akakakan |
alon huse-huse sami |
kêploke wanti-wanti |
bêdhil brondongan kadya rug |
sapanti ajêdhotan |
ting barêngok pra pêtinggi |
nginum arak sasukane dêg-adêgan ||

6.
Myang kang larih mring ni randha |
atur pasihan agênti |
sarya sru dènnya samya jar |
dubilah dene rêspati |
pênêt kang tanah ngibing |
pinuput dèn-kongsi esuk |
pra jadhug sêdayanya |
tan ana dhapur dhong sami |
kèh kathokan anjêbobog reyab-reyab ||

7.
Kang udhêng-udhêng kewala |
ana mung ngangge kulambi |
kang sabuk-sabuk kewala |
kotang bae tanpa bênik |
kêt kacu kêtat gambir |
(m)bopong bêbêt kalung sarung |
amoh labêt têlêsan |
tinombokkên maring ringgit |
suprandene abungah tan etang wuda ||

Jilid 9 - Kaca : 35

8.
Dhapure wus lir lêlaran |
dèn-wêdalakên winilis |
ting gêluyur alan-alan |
kèh solah kèh swaranèki |
barêng surak ngrik-angrik |
kêplok sru bêdhil (n)dharudhul |
ni randha dènnya-mbêksa |
kêtara pacake èstri |
nanging bisa niru bêksa tan sêlaya ||

9.
Ronggèng ro apêpasangan |
kêsit lir prênjak tinaji |
sisirig tapèn ting-tingan |
ngênyêg mêdhi-kèngsêr ngringgit |
mênthang udhêt (n)dhêdhêti |
liru (ng)gon sarêng anindur |
mrêpêt kupu-tarungan |
sarwi ngêlik kumalinthing |
larap tèplêk nêngah lambung alilingan ||

10.
Lèngèh-lèngèh dalongèhan |
mêjang ngincang-ingcang alis |
ahebat kluwêng kumlepat |
ngêsot-ngêsut asêsirig |
nglêtêr pêncar aminggir |
kakunge mêgêg abêsus |
antara dangunira |
ngrantêg gêndhing Genjung-goling |
nulya niba Ginonjing sêsêg asantak ||

11.
Kêndhang kêmpyange angaplak |
anguguk gêdhug magaki |
bêm sêbah rara siblonan |
kosèkan ambêbanggèni |
saron imbal mincati |
bonangane ngênut-ênut |
gambang caruk walikan |
rêbab ngêcêk cêngkèngèng ngik |
kêcèr ngopyok kênong sungsun kêthuk ngêmprang ||

12.
Ambyantu panabuhira |
salin sajak kang angibing |
mirong kunca ing midhangan |
bêksa kêlana tinangkil |
aluwês dhèmês wasis |
oklak-oklikan sakojur |
nêlasakên rekanya |
lulungidaning pangibing |
nyai randha randhat tan pati anyandhak ||

13.
Ka-agag ing êndêmira |
kêconggah niru tan wigih |
sangsaya ramening surak |
sumyak-sumyak mènêngkêri |
kêplok tan kongsi sami |
grêjêgan otêr gumuruh |
miwah drèling sanjata |
lir gêrah myang ting jalêrit |
alok saking suka parisukanira ||

14.
Rare jalwèstri tan beda |
barung surakira atri |
ni randha ngênting sukanya |
salamine tan kadyèku |
nutug raosing kapti |
mêngkana wau sang bagus |
juwêt mêdal ing jaba |
milih nyenggoli pawèstri |
kang sinènggol megol jêbol rahsanira ||

15.
Nyuwêl nguyêl payudara |
mipil pipi ingkang kuning |
tan ana ingkang marêngkak |
malah ciptanira maning |
antara dangunèki |
dènnira ngibing anutug |
kumringêt babakannya |
nulya samya wus kang ngibing |
tinututan jênggung suwuk kang gamêlan ||

Jilid 9 - Kaca : 36

16.
Nulya samya lêlênggahan |
wêwedangan ngaring-aring |
sakêdhap nulya ni randha |
matur mring Kulawiryèki |
punika ingkang mugi |
putra-paduka sang bagus |
prayogi abêksa-a |
langkung kapanuwun-mami |
tan ketang jumênêng ambêksa sagongan ||

17.
Kulawirya mèsêm nabda |
mring kang putra abibisik |
iku anakmas ni randha |
kêpengin wruh sira ngibing |
kang muga tinuruti |
ketang sagongan bae wus |
kang putra aturira |
tan patos dhangan ing kapti |
adho ora têka bêksa-a sadhela ||

18.
Mandah kang para bênthètan |
pêthot kêkêndhite sami |
saking mêjêne tumingal |
marang anakmas dèn-aglis |
kang putra andhangani |
Ki Kulawirya gumuyu |
lah gêndhingane apa |
inggih paman ingkang gampil |
ya kêjaba Lompong-kèli ingkang gampang ||

19.
Inggih sumangga sakêdhap |
kang paman sasmitèng nyai |
randha mojar mring niyaga |
payo muni Lompong-kèli |
niyaga sigra muni |
ronggèng ro samya anggambyung |
jumênêng Jayèngraga |
sarwi ngrimong jingga manis |
ingkang jagong samya ngadêg sadayanya ||

20.
Ni randha lan Kulawirya |
wong ro nyêpêng coloknèki |
sarwi prentah kêplok surak |
Jayèngraga bêksa Panji |
jêjêr sajak rêspati |
sègêg pacak-gulu manglung |
mênthang asta andhêngklang |
jariji kêjêr kumitir |
wêntis malang tindak amidak irama ||

21.
Ahebat naga wangsulan |
ronggèng ro sarêng angêlik |
larap nindur angujiwat |
anglèlèngèk pongah-pangih |
sakèh wong jalu èstri |
cêp-rêp tan ana gumuruh |
kang kêplok tanganira |
maksih gathung tan nangkêpi |
ingkang surak cangkême mlongo kewala ||

22.
Kang ngungêlakên sanjata |
wus muni mlayu ningali |
kang tan kongsi muni sigra |
milalu samya ningali |
anjomblong tan cumuwit |
myang wong wadon sêdayèki |
samya cipta kedanan |
lir kênèng guna pêngasih |
mring Jèngraga kaya anubruk-nubruka ||

23.
Ngondhok-ondhok manahira |
(m)barêbêl luh myat wlasasih |
mring sang bagus Jayèngraga |
mêndhêkêl abuh kang ati |
kèh mingsêg-mingsêg nangis |
myang kang ngrimong jingga madu |
bêksa lir dewa (n)dharat |
patut nguyuni pawèstri |
Jayèngraga antara wus rolas gongan ||

Jilid 9 - Kaca : 37

24.
Aluwar dènnira (m)bêksa |
cuwa sakèh kang ningali |
pangrasa mung têlung gongan |
eman-eman nuli uwis |
nulya gumêdêr malih |
samya tata lênggah sampun |
wus aso sawêtara |
ni randha ngling mring niyagi |
unèkêna Pêtung-wulung sabêlabak ||

522 Balabak

1.
Nyai randha Sêmbada alon umatur |
wuwuse |
lah suwawi paduka angibing malih |
pênêde ||

2.
Owêl gêndhing Pêtung-wulungipun mêmbat |
rarase |
Kulawirya sigra umadêg ambêksa |
mathènthèng ||

3.
Ngadêg malih kang anjagong angurmati |
sakèhe |
surak kêplok barung lawan bêdhil muni |
arame ||

4.
Kulawirya ni randha ngrakiti ngibing |
jèngklèke |
kapat samya ngênjot-ênjot jogèdira |
sajake ||

5.
Ting kêrangkung tangan lir gogo mèk-mèkan |
njêbèbèh |
Kulawirya ni randha myang Madu Gêndam |
kapate ||

6.
Samya ngêtog cengkok cacahe ambêksa |
ronggènge |
ilo-ilo lêlathèn atêtasikan |
rekane ||

7.
Sêdhakêpan sangga wang (n)dhodhok cewokan |
kèpète |
luru-luru pipindèn atêtênunan |
pamane ||

8.
Asiluku dhidhisan antih-antihan |
tangane |
kêkiraban ukêl gêlung cêcênthungan |
ukêle ||

9.
Gêndhingira yèn kantun sakênong nuli |
êgonge |
ambarêngi kênong jinênggung ping sanga |
gongane ||

10.
Kulawirya anut gong pacak-gulunya |
jêglige |
gulêt-gulêt ronggèng ro padha wasise |
sindhène ||

11.
Kulawirya acapang dhêngkul unggahan |
tadhahe |
tinêrancag ing ronggèng nulya sinangga |
lambunge ||

Jilid 9 - Kaca : 38

12.
Ronggèng gambyong ngayang-ayang anèng wêntis |
anggêndhèng |
mung sagongan mudhun jog mungsêr sisirig |
anglètèr ||

13.
Wusnya Madu nulya Ni Gêndam narincig |
rikate |
mancat dhêngkul anggambyong anèng ing wêntis |
nglayange ||

14.
Sarwi pinêgolan ing asta sawiji |
boyoke |
sagongan gya mudhun sisirig ngêndhuyuk |
nyig-nyige ||

15.
Sabên kênong kagyat lir bahak anjingklak |
kruwêle |
loro larap lir bêdhès tinimbas tuna |
indhane ||

16.
Kikicatan ting salêndhuk angkêl-angkêl |
sikute |
Kulawirya sinêmbadan nèng kalangan |
lan ronggèng ||

17.
Gantya-gantya ronggèng ro dènnya naricig |
tinampèn |
nyai randha mèlu naricig ing wêntis |
lir ronggèng ||

18.
Madu Gêndam ni randha katri naricig |
gêgêntèn |
Kulawirya apanggah dèn-krubut têlu |
pupune ||

19.
Jayèngraga ningali kang sami (m)bêksa |
dangune |
pan dinuga laju sawêngi anatas |
esuke ||

20.
Asasmita mring Ni wulanjar Tarijah |
sêmune |
tinudingan kinèn (n)dhisikana mulih |
omahe ||

21.
Ni wulanjar ing manah sampun kaduga |
kêrsane |
sigra mêdal solahe datan kêtara |
wadine ||

22.
Tan antara Jayèngraga namur mêdal |
asêne |
lan Nuripin laju kinèn nuduhêna |
omahe ||

23.
Ni wulanjar wus tata paturonira |
cawise |
Jayèngraga prapta pinapag ing latar |
panggihe ||

24.
Ki Nuripin kinèn wangsul mring pêndhapa |
kalihe |
gya tumamèng wisma lawan Ni Wulanjar |
gulête ||

25.
Santrinira sigra wangsul mring pêndhapa |
kalihe |
gya tumamèng wisma lawan Ni Wulanjar |
gulête ||

26.
Santrinira sigra awangsul mengetan |
praptane |
nèng pêndhapa andulu kang samyambêksa |
gambyonge ||

27.
Datan ana bosênne ingkang ningali |
bungahe |
sêdayane tan ana lir Kulawirya |
jogède ||

Jilid 9 - Kaca : 39

28.
Kêplok surak huse bêdhil bêbrondongan |
jêdhète |
nginum arak aloke dèn suwak-suwak |
crawake ||

29.
Lingsir dalu wayahe kêpara bangun |
dangune |
pan kêdangon dènnira sami ambêksa |
gambyonge ||

30.
Ki Duljaya ewa myat mring Kulawirya |
atine |
nguntug-untug sasore mula agêthing |
polahe ||

31.
Ngling ing ati lèh kang jênêng konthol bêlang |
angkuhe |
kaya dêmang ngêdhangkrang kulambi abang |
ladake ||

32.
Wong nênêka mêrusul brundhul angunthul |
lakune |
dadak kudu rinêngga rinêngkuh bojo |
anggêpe ||

33.
Ki Duljaya panas ati muring-muring |
nêpsune |
golèk watu sakêpêl binalangake |
anglimpe ||

34.
Sêr kumaplok kêbênêran ingkang kêna |
bathuke |
Kenthol Kulawirya kagyat kênèng balang |
jumbule ||

35.
Walêr jamang kêbrabat pèsèk amèncèng |
ancêpe |
nyai randha anjêlih nêpsu mimisuh |
dilojèh ||

36.
Dadya kèndêl gamêlan ronggèng asuwuk |
unine |
berak-berak ni randha akon nggolèki |
uwonge ||

37.
Gumarubyuk ing kalangan lêng-ulêngan |
gêgêre |
samya ngubrês kang wani-wani ambalang |
tiyange ||

38.
Nyai randha sru mojar marang Duljaya |
ge-age |
pijêr ana sira tan wêruh kang (m)balang |
maune ||

39.
Ki Duljaya pi-api abriga-brigi |
gugupe |
sapa wonge kang ladak agawe rusak |
dilèngèng ||

40.
Karuhana bae dak-pêdhang dak-bêdhil |
wêtênge |
ni randha glis umatur mring Kulawirya |
wuwuse ||

41.
Punapinggih mêdal rahipun kang kenging |
balange |
Kulawirya mojar tan dadi ngapa-a |
rasane ||

42.
Ukur-ukur kewala wus datan lara |
sakiye |
samya tata malih lilinggihanira |
wong akèh ||

43.
Kawistara bathuke Ki Kulawirya |
bênjute |
amênyongnyong sagêgêm bêrêm abiru |
abuhe ||

Jilid 9 - Kaca : 40

44.
Ingaturan Ki Wirya malêbèng wisma |
ginandhèng |
mring ni randha wus kèring Ki Kulawirya |
undure ||

45.
Mêdal malih ni randha apêparentah |
sakèhe |
kinèn nutugkên ing sêdalu-a pisan |
banjure ||

46.
Ting galêmbor matur inggih bungah-bungah |
manahe |
gya ni randha mring wisma arsa asmara |
têmbunge ||

523 Asmaradana

1.
Yata Ki Kulawiryèki |
cucul dènnira busana |
lawan ni randha tan pae |
samya asalin busana |
lir saban sarwa anyar |
parabot sinimpênan wus |
nèng pêthi giwang (n)jêro mah ||

2.
Ki Kulawirya ngling aris |
manira bibi pamitan |
aran wus sami kalakon |
kuwatir lamun dinukan |
mring anakmas kang tuwa |
kang kari nèng wismanipun |
pêngulu ing Pakauman ||

3.
Popoyan amung sawêngi |
têmahan dadi rong dina |
punika sampun (m)bêlèndhèng |
pan dadya antèn-antènan |
yèn karya saking driya |
manira jrih ing sang bagus |
Jèngrêsmi kang nèng Kauman ||

4.
Randha mèsêm atur aris |
inggih kang paduka pajar |
de mêksih wontên tunggile |
bok inggih pênêd ngaturan |
mêriki ngong yun wikan |
Ki Wirya ngling amêcucu |
e biyang mangsa kêrsa-a ||

5.
Mêndhita ambêge wingit |
mundhak amuwuhi dosa |
mring kula rayi sêdène |
anom wus sun-anggêp tuwa |
ni randha malih turnya |
punika pan mêksih dalu |
pênêd byar enjing kewala ||

6.
Mangke kawula-aturi |
pêsangon rimat ing marga |
kalih-wêtas reyal mawon |
lan dhuwung sapêrantinya |
busana sakêrsanta |
kêling bathik lurikipun |
pundi kinêrsan sumangga ||

7.
Nanging atur-kula mugi |
lamun wus prapta ing paran |
wangsula kampiran malèh |
sampun tan botên jwa dora |
angling Ki Kulawirya |
kasaguhane abrubuk |
supata dobol sa-ancak ||

8.
Ni randha matur angungkih |
wawi ta Kenthol sakêdhap |
ngong nuwun tilaran kenthol |
lami tan pulang-asmara |
Ki Wirya mèsêm (n)jola |
dene wau sontên sampun |
jare lawas tan mut-mutan ||

Jilid 9 - Kaca : 41

9.
Pan durung longkang sawêngi |
ni randha gumuyu turnya |
sontên jêr sapriki dèrèng |
gèdhèg mèsêm Kulawirya |
ambakna tan kaopan |
inggih mangke kula-jidhul |
nanging ta kêrsa-manira ||

10.
Nadare bibi nyangoni |
mring manira rolas reyal |
sungna sapêniki bae |
bibi lêgane tyas-ingwang |
panêdha kula arta |
kang sadasa reyal wutuh |
picise bolong rong reyal ||

11.
Ni randha umatur inggih |
nulya mundhut arta rolas |
ingkang rong reyal bolonge |
ngaturkên mring tamunira |
arta gya tinampanan |
kinèn ngundang rencangipun |
Nuripin prapta ing wisma ||

12.
Angling gawanên Nuripin |
dhuwit rong reyal jaganya |
tuku banyu nèng dalanne |
Nuripin nampani arta |
matur maring ni randha |
(m)bok-ajêng kawula nyuwun |
pêsangon kula piyambak ||

13.
Iya ywa susah Nuripin |
iki mung têlung puluh wang |
tan duwe cêpakan manèh |
ênya Ki Nuripin gêpah |
nampèni artanira |
inggih nuwun nyai nuwun |
Nuripin wis kinèn mêdal ||

14.
Ni randha atur jêjampi |
kang bênjut gya pinarêman |
o o bangêt mênyonyonge |
ni randha ngungun wlas marma |
sawusnya pinarêman |
gupuh dènnya ngajak turu |
Ki Wirya nurut kewala ||

15.
Lajêng ulah pulang untir |
mandhak tan mawi sinopak |
tanak malak ing melike |
pinolah sadhengah-dhengah |
andêlajahi tingkah |
ting karêsês kalihipun |
golag-golig karêkuhan ||

16.
Kèh banènne ting kalêsik |
ngling bi paran kapenak ta |
kadi punaraose |
umatur inggih sakeca |
raose tan kantênan |
ting kalêlêr nyêr sakojur |
lir gatêl kinukur anggang ||

17.
Anggayêr kalihe sami |
tan wus kang lagya tumpukan |
yata kang samya anggambyong |
sangsaya ramening kathah |
katêmbèn ronggèng anyar |
kèh kang wongsal-wangsul mantuk |
mèt duwèk tomboking tandhak ||

18.
Yata ana wong sawiji |
bedhange lanjar Tarijah |
wus sêmayan duk sorene |
dhudha kêmbang ran Janawang |
sanggupe (m)bok wulanjar |
yèn wus nonton ngajak mantuk |
inganti tan ana ngajak ||

19.
Ingungak-ungak tan kèksi |
dinuga mulih ni lanjar |
nulya nusul mring ngomahe |
wau ta kang anèng wisma |
Jèngraga lan ni lanjar |
apênêd paturonipun |
kang kêkobong ginêbêran ||

Jilid 9 - Kaca : 42

20.
Kêkawal kasur gêng guling |
bantal êncit bang ngulêsan |
ni lanjar caos bobonyo |
Jèngraga ngulungkên asta |
kang kanan kinonyohan |
astane satunggilipun |
angudhar-udhar sêmêkan ||

21.
Ni wulanjar analibi |
rêjêngan lukar sinasab |
mêg payudara pinêlot |
malênthèt mênthêg ngêmanak |
jinêmpol pinêlangkan |
mundri tan pati mêndhukul |
mêntêr kuning anyu-dênta ||

22.
Kang pinidih gorèh linggih |
puringisan kajuwêtan |
ginarêgêd panguyêge |
matur hês mangke mangke ta |
asta lagi winida |
punika mangke tan tutug |
konyoh tan wradin sarira ||

23.
Mèsêm ngandika Jèngragi |
hêng sapuluh mêngkono-a |
jro bêngkêrmu mêksih atos |
kadya tan kambah ing tangan |
asêdhêngan tur jênar |
lir mundhon gadhing binubut |
andêmênakakên manah ||

24.
Umatur apasang liring |
e mbakna angandika |
botên tate kambah-kèmbèh |
sajêg kawula dumilah |
dèrèng nglampahi raras |
lanjar pangantèn tan atut |
kêlajêng pêgatan pêjah ||

25.
Gumujêng Ki Jayèngragi |
sasat sih bocah wêlaka |
pan kinayuh lungayane |
sinasmitèng pagalingan |
kulinèng pakasutan |
lêlêson jujur ing kasur |
kasor ni lanjar kumêsar ||

26.
Sarwi kinèn anêkêmi |
ing dêdêlêg kang amêlag |
kêngkêng dinuwatan bèngkong |
cinakêp satutup mangang |
api wigih ni lanjar |
batine mathêm ngatêplu |
mring kang nglênggarang gêng panjang ||

27.
Jèngraga anglingkap nyamping |
anglela kang titih antar |
ni lanjar mêjên karêpe |
ingêmbat-êmbat tan mêmbat |
myat kang lawung samoa |
narêthêg mênthêkan ayun |
bangêt pengine ni lanjar ||

28.
Akukuh panyêkêlnèki |
tan rênggang pangêmêngira |
ngênêt-nêt bongkot pucuke |
tan na sangkribe ni lanjar |
saking sangêt tyas dahat |
katêmbèn wruh gêng apêngkuh |
birawa abrêngga rowa ||

29.
Dèn-ukur lan lêngênnèki |
gumuyu cès ilêrira |
cipta ge ya tumamane |
panêkême sinungkêman |
ingambung asengokan |
cinêcêp mangang ingamut |
-amut pucuke kewala ||

Jilid 9 - Kaca : 43

30.
Ambathok thothoke ngêjring |
kilong mêlêng-mêlêng kelang |
lir paron parung guthok thèh |
yèn ginêpuk ananggulang |
wadal sêtangkêp pêcah |
mara rolas rêmuk sumyur |
atos wêwayang (m)bêngkayang ||

31.
Jèngraga ngling jroning galih |
mulat ni lanjar rêgêpnya |
wong iki gèsèh sanggupe |
jare tan kambah ing lanang |
dene ku polahira |
têka ninisani kayun |
kaya wus lanjah alanyah ||

32.
Mèsêm ngandika Jèngragi |
apa ya gêdhe iku ta |
ni lanjar gumuyu ture |
punika lan lêngên kula |
mêksih agêng kètênnya |
panjang cangklak dugi sikut |
gumujêng Ki Jayèngraga ||

33.
Ni Lanjar nulya ginoling |
-akên ing kasur tinimpah |
linukar kêmbên sinjange |
ngalela lir lêlantakan |
gêgêmuking punton mas |
ingigarkên pupunipun |
sêg pinapan tinamama ||

34.
Sêndhêt ragi mangang kêdhik |
nanging mêrga wus kalênyan |
pananduk nêd pandêdêle |
makênêng blêng blês anjola |
suku ro garonjalan |
sinêrot lêrug mênjuluk |
bêbantal kawale kontal ||

35.
Jugrug ngalih ujurnèki |
ni lanjar apulintiran |
ah èh ah èh sêsambate |
adhuh pêjah gus kawula |
ingkang alon kewala |
ês ês sampun sêru-sêru |
tan kawawa mawalana ||

36.
Wlakang ngongkong dèn-ganjêli |
ing bantal kunthing satunggal |
anglela ngêglèh pakolèh |
wus rapèh juwèh ngêcapah |
ing gêgêlur lar-luran |
rêm-rêm liyêr lir wong ngantuk |
angantak-antak kêpenak ||

37.
Manjur warastra mangungkih |
kèh rekane ing pratingkah |
kang kinakahan tadhah bèh |
malah molahakên awak |
nglawèhi sasolahnya |
sinêngkut ni lanjar baut |
ngêkêti ngingkêt amadal ||

38.
Ngêtimang panggêgêtnya mrih |
misra rasaning asmara |
nuju ajuning jon-ajon |
jinajah nut ajonjitan |
akêjêt jakêkêtan |
Jèngraga karênaning hyun |
ni lanjar anjurung kêrsa ||

Jilid 9 - Kaca : 44

39.
Samya ulah mrih pakolih |
kalihe akajênêkan |
ingampêt wêdharing raos |
nêlaskên tyas parisuka |
sumalin tingkah runcah |
tanpa cacah angrurucah |
swaranya kèh banènneka ||

40.
Tan wus nêlaskên kang kapti |
bedhange lanjar Janawang |
kang nusul prapta ngomahe |
laju maring taritikan |
lampahe adingkikan |
prênahe paturonipun |
nêthêk gêdhèg yun anggugah ||

41.
Ngrungu swara ting kalêsik |
antol ambèn agêrètan |
lan banènne crak-crok kak-kok |
Janawang kumêpyur nyana |
yèn kalêbon wong lanang |
prêmpêng atine lir (n)jêblug |
panas muntap nguntar-untar ||

42.
Pringutên tan wêdi mati |
toh gêtih rêbut bênthètan |
tan bêtah ngrungu swarane |
sigra nêmpuh malbèng lawang |
lawang tan kinancingan |
gêradag ngêngakkên pintu |
wruh kang lagya tutumpukan ||

43.
Kêtanggungan nyêr-nyêr mijil |
satêngahing rasa gatya |
Janawang nêrajang age |
nyandhak sukune Jèngraga |
ginèrèt sru sinêndhal |
uwal timpal kang aundhung |
mêksih ngagêr tibèng jogan ||

44.
Mak blêg anggronjal Jèngragi |
tangi saking pangkosêban |
bramantya sru pandhupake |
kontal krèngkangan Janawang |
kaot gêng Jayèngraga |
Jênawang lajêng lumayu |
tinututan tan kacandhak ||

45.
Susumbar sarwi lumaris |
mêtuwa yèn sira lanang |
nututana padha ijèn |
Jayèngraga tan saranta |
binujung kang susumbar |
nilap nalimpêt lumayu |
Jayèngraga wangsul ing wisma ||

46.
Sangêt duka muring-muring |
ni wulanjar binothokan |
edan taun sundêl lanjèn |
tan tutur duwe lodokan |
(n)dadak agawe beka |
prandene cangkême umuk |
thok-ethok kênthang-kênthingan ||

47.
(m)Bok aja ngaku kumêncing |
têmah agawe prêkara |
awèh satru si Di-gowok |
mara bedhangmu kumpulna |
kon ngayoni maring wang |
kêna sibat nora patut |
tan tutur duwe gaglagan ||

48.
Ni lanjar ambrêbês-mili |
binêndon mring Jayèngraga |
matur jrih inggih kasupèn |
saking manah tan kantênan |
Jèngraga mêksih duka |
kasupèn priye jawamu |
dhasar wong edan-edanan ||

Jilid 9 - Kaca : 45

49.
Rinasa mèsêm jro ati |
kèngêtan lagya satêngah |
durung tuntas gya linorod |
blêge duk dhawah jêrambah |
kang (ng)gèrèt wani-angas |
ginuyu sariranipun |
piyambak ing kêbatinan ||

50.
Sinamun duka mawêngis |
mara sira bêlaka-a |
pira èmbèlmu kabèhe |
matur jrih kumbi mung tiga |
Jèngraga ewa mojar |
dèh têlu ya têlung-puluh |
sarwi ni lanjar dhinupak ||

51.
Sigra mentar Jayèngragi |
maksih garunêngan duka |
tan kèngêtan kagungane |
kulambi lan lopak-lopak |
kantun datan binêkta |
saking sangêt tyase rêngu |
lajêng kewala mring sêndhang ||

52.
Ni lanjar wruh lamun kèri |
kulambi lopak-lopak mas |
gumuyu iki bêgjèngong |
ingambil binêkta lunga |
singidan mring têtangga |
yata kang lagya aundhung |
ni randha lan Kulawirya ||

53.
Kathah tingkahing auntir |
cipta ge-ageya ludhang |
anutug ing sakarêpe |
tinut ing sapênjalukira |
miring (n)jêngking lumumah |
amungkur mêngkrêng sidhêkus |
ngagir ingkungan sinunggar ||

54.
Pinangku (n)dhodhok alinggih |
ngingkrang mênthang nganja-anja |
anyongok linakokake |
agantya tumpang-tinumpang |
rêh-rinèh ing pratingkah |
gêmêt ulêt tan na kantun |
tèk solah sadhengah-dhengah ||

55.
Singsêt ni randha ngêkêpi |
sru mênêtkên ing kodhokan |
dhêdhêngkul amulêt jingklok |
kempol dêlamakan nampar |
pupu amanggang ayam |
kang lanang ambalung kungsul |
ula-ula ngulêr kilan ||

56.
Sikute anyikil dhingklik |
tangan pèk-èpèk kukupan |
mêtêkên bun-êmbunane |
dhadha amidak pinasang |
wêtêng lampin dinoman |
bobokong nyalang binandul |
warastra rara anggêntang ||

57.
Samya pakolihe kalih |
sarêng kat-angkating rasa |
samya kêsar-kumênyare |
anggêgêt untu kêrotan |
ginêlak panrêgira |
anggatêr kadi pêlatuk |
(ng)gêdêdêr pêpagutan ||