Ki-demang.com : Centhini

Jilid 8 - Kaca : 50

123.
Turunipun Su-ajag mring siti |
wuku Maktal ing Soma Pon-ira |
dewa Yama Paningron-e |
Kerangan Sêngkanipun |
kang Sapi-gumarang mring langit |
wuku Maktal Anggara |
Wage dewanipun |
Lodra nuju Uwas Nohan |
wuku Maktal ing Buda Kaliwon-èki |
Brama Mawulu Nogan ||

124.
Wuku Maktal ing Rêspati Manis |
dewa Kala Tungle Tulis-ira |
Maktal ing Sukra Paing-e |
Uma Ariyang Wurung |
wuku Maktal Tumpak Pon-èki |
Sri Wurukung Dadi-nya |
nênggih Jabung-wuku |
nèng lèr-wetan ênggènnira |
majêng ngidul ngilèn pan ing pitung ari |
sampun murugi kala ||

125.
Gantya ingkang wuku Wuye tampi |
Dite Wage nuju dewa Endra |
Paningron Dangu turunne |
ingkang Cèlèng-têmbalung |
Wuye Soma Kaliwon-èki |
Guru Uwas Jagurnya |
kuthila mandhuwur |
nuju Taliwangkenira |
Wuye Gara Manis Brama Wulu Gigis |
turunning Srigati ka ||

126.
Tumêdhak nèng kandhang dèn-ênggèni |
wuku Wuye Buda Paing-ira |
Lodra Tungle Kerangane |
kang wuku Wuye-nipun |
ing Rêspati Êpon marêngi |
Brama Ariyang Nohan |
Wuye Sukra-nipun |
Wage Kala Wrukung Wogan |
Wuye Tumpak Kaliwon lima marêngi |
Paningron Tulus-ira ||

127.
Jabung wuku Wuye (ng)gènnirèki |
wontên kilèn lêrês majêng ngetan |
sapta-ri sapta-ratrine |
ywa nêrak kala agung |
gantya ingkang wuku Manail |
ing Dite Manis-ira |
Êsri Uwas Wurung |
Manail Soma Paingnya |
dewa Endra Mawulu Dadi marêngi |
Sêngkaning Asu-ajag ||

128.
Manail ing Anggara Pon-èki |
dewa Guru Tungle Dangu-nira |
turun Sapi-gumarang-e |
wuku Manailipun |
Buda Wage Yama marêngi |
Ariyang Jagurira |
kang Manailipun |
Rêspati Kaliwonira |
dewa Lodra Wurukung anuju Gigis |
ing wuku Manailnya ||

129.
Amarêngi ing Sukra-nya Manis |
dewa Brama Paningron Kerangan |
Manail Tumpak Paing-e |
kalawan Nohan-ipun |
pan jabunge wuku Manail |
nèng kidul wetan (ng)gènnya |
pitung dintên sampun |
purun amurugi kala |
gantya wuku Prangbakat Dite Pon nênggih |
Uma Mawulu Wogan ||

Jilid 8 - Kaca : 51

130.
Prangbakat-e Soma Wage-nèki |
dewa Êsri ing Tungle Tulus-nya |
Sêngkan Cèlèng-têmbalunge |
wuku Prangbakatipun |
amarêngi Anggara Kasih |
Endra Aryang Wurungnya |
nuju turunnipun |
Kuthila-pas mring bantala |
Prangbakat ing Buda Manis Guru nênggih |
ing Wurukung Dadi-nya ||

131.
Sêngkanning Srigati maring langit |
Prangbakat ing Rêspati Paingnya |
Yama Paningron Dangune |
wuku Prangbakatipun |
amarêngi Sukra Pon nênggih |
Lodra Uwas Jagurnya |
ing Prangbakat-ipun |
Tumpak Wage dewa Brama |
amarêngi Mawulu anuju Gigis |
Jabung wuku Prangbakat ||

132.
Anèng ing ngandhap nuju manginggil |
pitung dintên ywa murugi kala |
kalawan aywa mêmênèk |
agantya ingkang wuku |
Bala Dite Kaliwon-èki |
Kala Tungle Kerangan |
Bala Soma Madu |
dewa Uma Aryang Nohan |
wuku Bala nalika Anggara Paing |
dewa Sri Wrukung Wogan ||

133.
Tumuruning Asu-ajag nênggih |
wuku Bala ing Buda Pon-ira |
Endra Paningron Tuluse |
anuju Sêngkannipun |
ing Sapi-gumarang mring langit |
Bala ing Rêspatinya |
Wage dewa Guru |
marêngi Uwas Wurungnya |
Wuku Bala ing Sukra Kaliwon-èki |
Yama Mawulu Dadya ||

134.
Kang wuku Bala ing Tumpak Manis |
dewa Lodra ing Tungle Dangu-nya |
Jabung ing wuku Balane |
nèng lèr-kilèn (ng)gènnipun |
pitung ari ing pitung ratri |
aywa murugi kala |
tan bêcik tinêmu |
gantya kang wuku Wugunya |
Dite Paing Brama Aryang Jagur nênggih |
Kala-dite punika ||

135.
Wuku Wugu ing Soma Ponèki |
dewa Kala Wrukung Gigisira |
wuku ingkang (ng)Gara Wage |
Dewa Uma anuju |
ing Paningron Kerangan-èki |
marêngi turunnira |
kang Cèlèng-têmbalung |
Wugu Buda Kaliwon-nya |
Dewa Êsri Nohan Uwas amarêngi |
sêngkaning Kuthila-pas ||

Jilid 8 - Kaca : 52

427 Dhandhanggula

136.
Wuku Wugu ing Rêspati Manis |
dewa Endra ing Mawulu Wogan |
tumurunning Srigatine |
tumêdhak anèng lumbung |
wuku Wugu ing Sukra Paing |
Guru Tungle Tulus-nya |
Wugu Tumpakipun |
Pon Yama Wurung Aryangnya |
Jabung-wuku Wugu nèng kidul sapta-ri |
gantya kang wuku Wayang ||

137.
Dite Wage Lodra Wrungkung Dadi |
wuku Wayang Soma Kliwon-èki |
Brama Paningron Dangun-e |
Wayang Anggara Madu |
Kala Uwas Jagur marêngi |
Taliwangke punika |
wuku Wayangipun |
pan ing Buda Paing-ira |
dewa Uma anuju Mawulu Gigis |
Sêngkaning Asu-ajag ||

138.
Wuku Wayang Rêspati Pon-èki |
Dewa Êsri ing Tungle Kerangan |
turun Sapi-gumarang-e |
ing wuku Wayangipun |
Sukra Wage Endra marêngi |
Ariyang Nohanira |
Wayang Tumpak Kliwun |
Guru ing Wurukung Wogan |
ingkang Jabung-wuku Wayang anèng nginggil |
apan majêng mangandhap ||

139.
Apan pitung dina pitung ratri |
sampun purun amurugi kala |
gantya wuku Kulawune |
Dite Manis anuju |
Dewa Yama Paningronèki |
Tulus ing Kulawu-nya |
Soma Paing-ipun |
Lodra Uwas ing Wurung-nya |
wuku Kulawu Anggara Pon-èki |
Brama Mawulu Dadya ||

140.
Kulawu ing Buda Wage-nèki |
Dewa Kala Tungle ing Dangu-nya |
Sêngkan Cèlèng-têmbalung-e |
ingkang wuku Kulawu |
ing Rêspati Kaliwonèki |
Uma Aryang Jagurnya |
nuju turunnipun |
Kuthila-pas ing bantala |
ingkang wuku Kulawu ing Sukra Manis |
Sri Wurukung Gigisnya ||

141.
Amarêngi Sêngkaning Srigati |
ing Kulawu Tumpak Paing-ira |
dewa Endra Paningron-e |
Kerangan Jabung-wuku |
Kulawu nèng êlèr (ng)gènnèki |
majêng ngidul lêrêsnya |
pitung dintên sampun |
purun amurugi kala |
gantya wuku Dhukut Dite Pon-irèki |
dewa Guru Was Nohan ||

Jilid 8 - Kaca : 53

142.
Wuku Dhukut ing Soma Wage-ki |
dewa Yama ing Mawulu Wogan |
Dhukut Anggara Kasih-e |
Lodra ing Tungle Tulus |
wuku Dhukut ing Buda Manis |
Brama Aryang Wurung-nya |
ingkang wuku Dhukut |
ing Rêspati Paing-ira |
dewa Kala Wurukung anuju Dadi |
turunning Asu-ajag ||

143.
Wuku Dhukut Sukra Pon-irèki |
dewa Endra Paningron Dangunya |
Sêngkan Sapi-gumarang-e |
Dhukut Tumpak Wage-ku |
Êsri Uwas Jagurirèki |
Jabung-wuku Dhukutnya |
kidul-kilènipun |
apan majêng ngalèr-ngetan |
pitung dintên sampun purun amurugi |
kala yèn kasêngkala ||

144.
Gantya wuku Watugunung nênggih |
Dite Kaliwon-nya dewa Endra |
Mawulu nuju Gigis-e |
ing wuku Watugunung |
dina Soma Manis marêngi |
Guru Tungle Kerangan |
ingkang Watugunung |
ing Anggara Paing-ira |
dewa Yama nuju Aryang Nohan nênggih |
wuku Watugunung-nya ||

145.
Ing Buda Pon Dewa Lodra-nèki |
anuju Wurukung Wogan-ira |
kang wuku Watugunung-e |
Rêspati Wage-nipun |
dewa Brama Paningronèki |
tulus tumurunnira |
kang Cèlèng-têmbalung |
Selardi Sukra Kliwon-nya |
dewa Kala ing Uwas Wurung marêngi |
Sêngkanning Kuthila-pas ||

146.
Wuku Watugunung Tumpak Manis |
dewanira Endra kang lumampah |
nuju Mawulu Dadine |
marêngi turunnipun |
kang Srigati marang ing bumi |
anèng lêsung tumêdhak |
nênggih Jabung-wuku |
Watugunung anèng wetan |
majêng ngilèn pitung dintên pitung ratri |
sampun murugi kala ||

147.
Sampun jangkêp wuku tridasèki |
lampahing wuku Wrêgagêmètnya |
inganggêrakên lampahe |
Jamal-Jamil gumuyu |
sarwi angling angumpak dhiri |
nora jamak kang ajar |
ujare ambubruk |
prasasat dhalang awayang |
paham kabèh boya wus luput ing lali |
dhasar pintêr kang ajar ||

Jilid 8 - Kaca : 54

148.
Wasi Wrêgasana ambêdhidhig |
mathêm munthuk mèsêm sarwi mojar |
inggih kados pundi malèh |
tiyang wus damêlipun |
anèng wukir wuku pinikir |
lamun tan makatêna |
tan sagêd anggêntur |
tanpa damêl anèng arga |
yèn tan wruha pangulah lampahing budi |
kabudayan Kabudan ||

149.
Panglêpase tyas marang Hyang Widdhi |
kamulyaning marcapadèng dibya |
sampurna ing dêlahane |
pratistha ing panggayuh |
tang tar giyuh marang pangaksi |
waskitha ing kasidan |
sasêdyaning kayun |
têtêsing panitisan |
Jamal Jamil anjawil têtanya malih |
mring Wasi Wrêgasana ||

150.
Manira tanya kakang wawasi |
mungguh candranya ing Paringkêlan |
wuku tigangdasa kabèh |
nèh jarwakên sadarum |
tumbuk Sangar lan tumbuking Sri |
sampun tanggêl pêpajar |
kang gêmêt sadarum |
Ki Wêwasi Wrêgasana |
anauri lah inggih punika gampil |
patanyandika mringwang ||

151.
Wuku Sinta patine wong awig |
sêmunira lintang karainan |
watêke sarèh budine |
sabarang tyase lêsu |
têngah tuwuh manggih bilai |
ruwate gêdhang sanga |
kang suluh satundhun |
sakèhe arês-arêsan |
saliyane dagingan lan wohing dami |
pêndhêm gumantung simpar ||

152.
Sêlawate pan salikur picis |
wuku Landêp minapringga pêjah |
surating raditya lire |
atêrang manahipun |
amadhangi sasami-sami |
bilai karubuhan |
ing wrêksa puniku |
jalaranipun tan drêman |
ruwatipun maja têlungpuluh iji |
lawan arès-arèsan ||

153.
Sêlawate patang kèthèng nênggih |
candraning wuku wukir ringkêlnya |
lêsu wana-sata lire |
gunung asri kadulu |
pinaranan ambêbayani |
adigung-adiguna |
angèl budinipun |
bilai kêna niaya |
ruwatipun kalapa satabonèki |
pat gluntung lan arèsan ||

154.
Sêlawate apan limang picis |
wuku Kurantil dhandhang angurag |
nuju ewahan sêmune |
tan lana budinipun |
amêmènèk bilainèki |
jalaran kèh cidranya |
pangruwatanipun |
nanas sakuncunge sapta |
lan arèsan tindhih pitung kèthèng nênggih |
wuku Tolu candranya ||

Jilid 8 - Kaca : 55

155.
Pasareyan sakèh wuku nênggih |
lêngkawa kukuwung sêmunira |
apan kagêdhèn angkuhe |
bilaine kasiyung |
jalarane ajaga ati |
pangruwate sêmangka |
wutuhan pipitu |
rês-arèsan pinêpêkan |
wuku Gumbrêg patining wrêksa anênggih |
gêtêr-patêr sêmunya ||

156.
Watak wong tinuku abanèki |
lumaku ingajèn wicaranya |
kabêlabak bilaine |
jalarane kumingsun |
ruwate bênêman gêmbili |
sapuluh lan arèsan |
pan sêlawatipun |
kawan kèthèng aywa kirang |
wugu Warigalit apan jalma mati |
tan kêndhat sandhang pangan ||

157.
Sêmune kèh sandhang panganèki |
bilainira apan kahambat |
jalaran murka karone |
apan pangruwatipun |
nênggih pisang graita kuning |
satundhun lan arèsan |
apan tindhihipun |
patang kèthèng ingkang anyar |
wuku Warigagung mina lodan mati |
kêtuk lindhu sêmunya ||

158.
Apan abot sêsangganirèki |
bilainira apan kabanda |
sumangkeyan jalarane |
dene pangruwatipun |
pan puniku dang-dangan uwi |
ingêdang wuwutuhan |
arèsan tan kantun |
limang kèthèng ingkang anyar |
Julungwangi lumpuhing banthèng anênggih |
sarwa rum bar-abirnya ||

159.
Kèh kang asih kèh ngalamatnèki |
bilaine tinêbak ing macan |
jalaran lumuh asihe |
dene pangruwatipun |
apan durèn pitung galinting |
lawan arès-arèsan |
kucing tindhihipun |
Sungsang jaka wuru tiba |
mega mêndhung sêmune sêtêngah ati |
kawêsèn bilainya ||

160.
Jalarane wrêngkêng ruwatnèki |
jagung ontong patpuluh arèsan |
sapuluh kèthèng tindhine |
Galungan lata pruthul |
andhap-asor kalulun budi |
bilaine tukaran |
cêla jalaripun |
ruwate jêram gêng papat |
lan arèsan sangang kèthèng tindhihnèki |
ingkang wuku Kuningan ||

Jilid 8 - Kaca : 56

161.
Pring anggagar nuju teja nênggih |
sêmunira sêlamêt budinya |
apan kamuk bilaine |
jalaran gêminipun |
apan nênggih ruwatirèki |
satundhun pisang êmas |
lan arèsanipun |
salawat nêm picis kênthang |
nulya wuku Langkir lare andawani |
urip sarya oyodan ||

162.
Sêmunira wangkot budinèki |
bilaine apan tutukaran |
jalaran kadurjanane |
dene pangruwatipun |
apan bêndha nênêm galintir |
nêm kèthèng lan arèsan |
kang pêpak sadarum |
ingkang wuku Mandhasiya |
apan ringkêl mina tinilar ing warih |
kayu agung sêmunya ||

163.
Dadi pangaubaning sêsami |
nora kêna atut lan sêsanak |
anadene bilaine |
apan kêna ing siyung |
jalarane cengkre ing budi |
dene pangruwatira |
jambu kluthuk satus |
kalawan arès-arèsan |
sêlawate satak kèthèng datan luwih |
wuku Julungpujudnya ||

164.
Kathah lara sambang rimbung nênggih |
mega jodhog lêngkawa sêmunya |
watêke bêrèt (m)bêlêre |
bilaine katêluh |
jalarane apan gumampil |
pangruwatipun pisang |
bêcici satundhun |
kang sinang lawan arèsan |
sêlawate nêm kèthèng wuku anênggih |
Pahang kèh manuk Kêna ||

165.
Sêmunira pan anuju ati |
watêkipun pan panas-atènan |
ana dene bilaine |
kênnaniayèng satru |
jalarane asalah kardi |
dene ruruwatira |
jambu klampok satus |
pitung kèthèng lan arèsan |
nulya wuku Kuruwêlut kapas agring |
toya wêning jêmbangan ||

166.
Sêmunira wong sêlamêt ati |
bilaine kêna ing sanjata |
jalaran pintêr budine |
ruwatanipun têbu |
irêng patang lonjor nêm picis |
sawarnining arêsan |
wuku Mrakèhipun |
ringkêle baron asêmpal |
ing liwawar damar agung amêrapit |
padhang-atèn elingan ||

167.
Kabêlabak bilainirèki |
kêpara ngarêp jalaranira |
ana-dene pangruwate |
apan kêmiri satus |
lan arèsan (ng)gih satus picis |
ingkang wuku Tambirnya |
upas lawan racun |
lêsu lupa sariranya |
têgêsipun tan sarju budinirèki |
blai kenging pasangan ||

Jilid 8 - Kaca : 57

168.
Jalaran kèdhêp ujarirèki |
ana-dene ruruwatanira |
pan timun-watang sêlawe |
tindhihipun dom satus |
lawan pangot waja sarakit |
kang wuku Mandhangkungan |
baya ngurag nêngguh |
nèn-unèn barung sakatya |
sêmunira adêrês sora yèn angling |
bilai kasudukan ||

169.
Jalarane kudu-kudu nênggih |
ruwatane kêlayu satampah |
kang pêpak arèsanane |
tindhih picis sapuluh |
nulya malih wuku gumanti |
Maktal macan alupa |
apan lesus agung |
awor angin pancawora |
têgêsipun wantêr angên-angênèki |
bilaine atukar ||

170.
Kagêdhèn akal jalaranèki |
ruwatane manggis tigangdasa |
nêm kèthèng lan arèsane |
Wuye pasangan manuk |
gêtih tinyuh ing ruman nênggih |
wor kukusing sundawa |
ing pasêmonipun |
cugêtan-ati punika |
jalarane saking pakèwuhirèki |
dene pangruwatira ||

171.
Apan kacang dhung-dhungan anênggih |
ênêm têkêm lan arès-arèsan |
ana-dene titindhihe |
pitung kèthèng punika |
gantya ingkang wuku Manail |
apan wiji kêpapas |
lawan lintang agung |
awor mungsuh sêmunira |
tansah jaga-ajaga atinirèki |
dene bilainira ||

172.
Apan kawêsèn punika nênggih |
ingkang dadya jêjalaranira |
kadhuwurên panggayuhe |
pangruwate kapundhung |
satampah lan arèsannèki |
sangang kèthèng Prangbakat |
kaya wringin iku |
sêmpal dening aliwawar |
pasêmone wêsi katon purasani |
kakon-atèn wataknya ||

173.
Bilaine pan mêmènèk nênggih |
jalaran tyas ngadi-adi ika |
pan rambutan pangruwate |
lawan arèsanipun |
sêlawate wêsi giligin |
wuku Bala pandhita |
angluwe punika |
sarwa tibèng kala mangsa |
asring karya gora-godha watêknèki |
katêluh kênèng upas ||

Jilid 8 - Kaca : 58

174.
Jalar kagêdhèn nêpsu tan bêcik |
pangruwatipun kara satampah |
lan arèsan pitung kèthèng |
nulya kang wuku Wugu |
pan kêluyu kêrahan nênggih |
patine padha rowang |
akasa wang-uwung |
sêmu jêmbar budinira |
bilaine kacuwik jalaranèki |
pan saking lêngusira ||

175.
Pangruwatipun kimpul satambir |
lan arèsan sadasa kèthèngnya |
dene kang wuku Wayange |
ringkêl pasêmonipun |
patining andaka wanadri |
praptanggapati ika |
mega kang lumaku |
watak jêmbar budinira |
bilaine pan kêna cidra puniki |
mênga daulatira ||

176.
Pangruwatipun pêlêm satambir |
ingkang manis-manis lan arèsan |
sêlawate wolung kèthèng |
ingkang wuku Kulawu |
apan inggih rabiya malih |
wèt dening wêwayuhan |
pêksi dewata gung |
kumpuling bun tibèng sêndhang |
apan srêpan ing rêmbug kumpuling bêcik |
blai kênèng wisaya ||

177.
Jalaranipun sring arêpanèki |
ruwate waluh loro ingêdang |
jro ginulan myang rosane |
pat kèthèng tindhihipun |
wuku Dhukut ringkêl candraning |
apan kitri tinata |
ingkang sukêt unggul |
asri larangan dipatya |
pasêmone akamot bêbudènèki |
blai kuthah ludira ||

178.
Anèng rana têngahing ajurit |
jalarane cukêng puguhira |
ruwat ing pare-wêlute |
wuwutuhan kinulup |
satampir lan arèsanèki |
nêm kèthèng tindhihira |
wuku Watugunung |
patining wrêksa narendra |
apagêra jaga gêrah uripnèki |
blai kêna niaya ||

179.
Jalarane kawigaran budi |
pangruwate apan pisang raja |
satundhun kang suluh jêne |
kêlawan pisang gabu |
sêtundhun lan mundhu kang kuning |
miwah arès-arèsan |
kang pêpak sadarum |
pêndhêm gumantung kasimpar |
sêlawate picis kênthang satak sawi |
ruwate citrakanya ||

180.
Sampun jangkêp wuku tigangdèsi |
Jamal Jamil gawok dènaya mulat |
mring Ki Wêwasi pahame |
têrang pawukonipun |
Jamal nambung sabda mring wasi |
kula kalangkung eram |
paham (n)dika wuku |
nging kêdhik taksih sumêlang |
babing Taliwangke etang(n)dika sisip |
Wrigapak (n)dika lêpat ||

Jilid 8 - Kaca : 59

181.
Kula miyarsa Kyai Sêbagi |
ing Wanamarta ragi pujangga |
alim arêsik etange |
sami sêdayanipun |
Taliwangke ing Warigamis |
pan wus pinalanggêran |
Taliwangke-nipun |
pan ana ing dina Uwas |
wasing Wrigalit nèng Rêspati Pon nênggih |
Kruwêlut Kliwon Tumpak ||

182.
Pan mêkatên wuruke kiyai |
Sêbagi mring kula wus mupakat |
pra majusi ujum kabèh |
kang sami muthi wuku |
sampun limrah yèn Warigamis |
Ki Wasi Wrêgasana |
sêmu rada milu |
mring kawruhe Jamil Jamal |
Ki Wawasi Wrêgasana sêmu ering |
mring kang ahlul tirakat ||

183.
Sèh Mongraga angandika aris |
kae wasi ngong tanya ing (n)dika |
mungguh palêpasaning rèh |
kang muhung mring Maha Gung |
wasisthaning pratisthèng wèsthi |
asthagina ginagap |
panganggêping kalbu |
budi wadining wong Buda |
kabudayan kang patitis ing panitis |
tusthaning kawaskithan ||

184.
Kang kinantha-kantha ing ngaurip |
ayun sumurup ing kêdadeyan |
jarwa-a kajatènane |
ginêng-ginênging gunung |
dunungêna panuksmèng jati |
Ki Wasi Wrêgasana |
tyasira katuju |
ing sêmu pagut kêrasa |
mêdhar jarwa Ki Ajar ing Pringgadani |
mijilkên sabda-tama ||

Jilid 8 - Kaca : 60

428 Mijil

1.
Datan wangwang dènnira ajarwi |
tatasing wiraos |
Wasi Wrêgasana lon dêlinge |
yèn paduka tanya ngudi-udi |
pakêming maharsi |
kang sampun linuhung ||

2.
Kang winulang jatining aguling |
anggêgêr-grit totor |
kang ginusthi anggusthi papasthèn |
kamulyane ing dalêm sawiji |
nèng sajroning pati |
patitising laku ||

3.
Kang tinalip ngariloka benjing |
wor jawata manggon |
tunggal laku tunggal panuksmane |
tunggal paribawa lan dewa di |
kang kadya cakraning |
gilingan lumintu ||

4.
Ing dêlahan ing marcapadèki |
pamilihing ênggon |
ing bantala ngakasa tan pae |
ingkang botên inang panuksmaning |
Hyang Soman manjanmi |
manising mring ratu ||

5.
Mila ratu punika linuwih |
punjul sakèhing wong |
sêbab jiwa jawata wèntèhe |
jawata pan atmaning maharsi |
wiwinih barêsih |
sukêre wus tunu ||

6.
Suksmaning rêsi dadya badaning |
ratu kang kinaot |
suksmaning ratu Hyang Soman mêne |
Narayana ya Hyang Wisnumurti |
Janardhana nitis |
suksma pulung luhung ||

7.
Maring ratu dadya nugrahaning |
jawata winongwong |
Hyang Manon mring ratu panjanmane |
ratu ingkang wus badan suksmarsi |
langgêng salamining |
saturut kadyèku ||

8.
Wus lir satu lan rimbaganèki |
rêsik lan Hyang Manon |
tan lyan marang ratu panuksmane |
mila maharsi agêntur tapi |
mumuja sêmadi |
benjang muksanipun ||

9.
Supaya tan milih ing panitis |
têtêse mring sang katong |
adhingini dwija panusupe |
jawata di nitik ing maharsi |
maharsi anitik |
panuksmaning ratu ||

10.
yèn rêsi tan wagêd nèng narpati |
luput ing panggayoh |
Hyang Manon tan arsa nukma dhewe |
yèn tan lambaran lawan maharsi |
kalihe tan dadi |
nuksmane mring ratu ||

11.
Marma gêntur ing samadi êning |
pan tan kenging bengkong |
ing panêkung jinungkung pujane |
datan bunar angênêr narpati |
ing pati patitis |
panitising ratu ||

12.
Dadya tan kêna ingaran mati |
kewala ngalih (ng)gon |
mila aran kadhaton samine |
lawan wana wilisan kang wingit |
tan kenging ginampil |
janma mring kadhatun ||

13.
Liya kang wus winênang narpati |
ngambah ing kadhaton |
sami lan ngambah wana wukire |
karatone maharsi ing wukir |
wukir sup anitis |
kadhatoning ratu ||

14.
Dening panitis isining wukir |
angkêre kemawon |
ingkang nuksma mring kadhaton rajèng |
saisining nagri sining wukir |
tan ana anilip |
sadaya mariku ||

Jilid 8 - Kaca : 61

15.
Kerut maring panuksmaning rêsi |
tan têlangke mawor |
manon-manon ing lêbak pundhunge |
masup dadya kagungan narpati |
nyawaning maharsi |
dadya badan ratu ||

16.
Pan punika gêgathekanèki |
kang pra gêntur totor |
tan pepeka tan nimpang pahume |
Sèh Mongraga mèsêm ngandika ris |
yèn mêngkono ugi |
kawruhe wong gunung ||

17.
Luwih dening rêkasa binudi |
wêkasane dhompo |
tan maoni sun saking kèh-kèhe |
kawulaning Hyang kang Maha Suci |
asnapun mawarni |
titahing Hyang Agung ||

18.
Nora kaya agama (n)Jêng Nabi |
dutaning Hyang Manon |
nucèkake rahmating kapatèn |
Nabi Muhammad Rasulullahi |
tan mawi mimilih |
wus pêpancèn sinung ||

19.
Ing ganjaran nut ahli tinaksir |
kang ènthèng kang abot |
datan kêna selak nampik milèh |
ingkang kêdhik kathah anèng adil |
kang akèh dosèki |
agêng siksanipun ||

20.
Ingkang bêcik gaganjaranèki |
anèng swarga manggon |
tanpa kira-kira tanpa tondhe |
nugrahaning pitung donya iki |
maksih luwih ngakir |
kang sinung swarga gung ||

21.
Nikmat bae langgêng ing kamuktin |
tan kêcangkol-cangkol |
tan rêkasa salawas-lawase |
luput sukur luput ing sak-sêrik |
barang kang kaèksi |
tan ana kang saru ||

22.
Kang kapyarsa aririh dumêling |
tan (m)blêbêgi rungon |
kang binukti tan ana paite |
kang ginanda tan ana mis-bacin |
kèh rasa tan risi |
tan kêpalang kayun ||

23.
Warêg bae salaminirèki |
nir tan walang-atos |
yèn wus luhung amal jariyahe |
kaote lan wong ahli ing ardi |
manggilingan nitis |
susah nusup-nusup ||

24.
Yèn mungguha ngèlmu sarak Nabi |
ambêg kang mangkono |
luwih saking sasar pangidhêpe |
owêl tapanira ingkang uwis |
mungguha kaywaking |
mung kari anunu ||

25.
Iba-iba wruha Pangeran ing |
-kang amurbeng tuwoh |
baya-baya luwih utamane |
kawruhira iku Ki Wawasi |
lamun sisip sêmbir |
mati kaping pitu ||

Jilid 8 - Kaca : 62

26.
Krana ngèlmu ajar sun kawruhi |
kamuksan praptèng don |
kaya nora kalêmpit ngong rêke |
ingkang dadi ugêring kadadin |
duk lagi angikis |
ing panggênturipun ||

27.
Cabar tiwas bênêr lawan sisip |
anèng gêntur kono |
nora kêna bêngkung salilahe |
jroning gêntur amusthi sawiji |
lir ulêr upami |
lagya ambubuntu ||

28.
Ungkêrira pinipit apipit |
angin tan marojol |
saking sangêt si ulêr sêdyane |
bosên dadi ulêr ambêg pati |
kêpati kêpengin |
salin dadya kupu ||

29.
Pan anyuthêl pangan nyuthêl budi |
anyuthêl lêlakon |
dadya mungkêr saulêr nalare |
nora mingsêr ngêningkên sakalir |
lagya madya sasi |
gatra dadi ênthung ||

30.
Prapta ing satêngah sasi malih |
pêndhak tanggal dados |
ulêr mijil saking pangênthunge |
pêpak busana sungut larnèki |
ambabar wus dadi |
kukupu abagus ||

31.
Yèn tan rapêt pamêpêtirèki |
ungkêre sumrowong |
tanpa dadi ulêr pangênthunge |
sabab masih kapanjingan angin |
têmah kanin posit |
nora dadi kupu ||

32.
Kadya mangkono uga rêsyardi |
tan beda lan gêndhon |
yèn ta luput iku panggênture |
yèn tan sura lêgawa ing pati |
anguk ulêr bêcik |
bisa dadi kupu ||

33.
Lamun ijih ajar ajijirih |
nora wani obong |
ajar nora manjing ajur-ajèr |
tan mituhu ujaring kajatin |
jatining panitis |
têtêsing panggayuh ||

34.
Ingkang lumrah pra ajar ing ardi |
dènnya samya obong |
sauwise padhêm pangobonge |
amêmêkas duk masihe urip |
yèn benjing sun mati |
tununên ragèngsun ||

35.
Sapatine gêni awunèki |
titikên ing kono |
yèn awu iku ana tapake |
tapak bayi arêpe mring êndi |
yèku pêsthi mami |
manitis ing ratu ||

36.
Lamun tapak janma iku mami |
pan panitisingong |
maring patih mantri bêr-abêre |
dene lamun liya tapak janmi |
tanpa sato pêksi |
tununên dèn-gupuh ||

37.
Lamun maksih ya tununên malih |
ping pitu angobong |
yèn tan ilang ya uwis pêsthine |
ulatana yèn sira sêdyapti |
nut tapak kang kèksi |
tandha manuksmêngsun ||

Jilid 8 - Kaca : 63

38.
Ya mangkono punapi tan sisip |
kang kadya lingingong |
Ki Wêwasi Wrêgasana sumèh |
matur inggih sêstu ya kadyèki |
sarya (ng)ling jro galih |
ah èdi wong iku ||

39.
Surup tata sabasaning ardi |
anjantu lêlakon |
sasuwene ujar tan acèwèng |
Wrêgasana ewah dènnya linggih |
marêpêk sêmu jrih |
pagut tanpandulu ||

40.
Nundha atur mring Sèh Amongragi |
kang mugi sang anom |
kula nyuwun lajêngipun malèh |
supaya trang tyas kawula myarsi |
Sèh Mongraga angling |
ujar kang puniku ||

41.
Pratingkahe kang samya ambêsmi |
kaliru le obong |
tuna dungkap jênggan panitise |
nora antuk pangupaya yêkti |
karahayon yêkti |
tuwas dadi awu ||

42.
Atma sasar wiwinih anisir |
sire tiba asor |
sabab luput saking paobonge |
atma dadi wuta nora titis |
tapak molah-malih |
tan kêna binêstu ||

43.
Pratandhane tan bênêr kaèksi |
yêktine kablaso |
kêkandhane iku yèn tiwase |
nandhang mati kaping pitu pasthi |
rêkasaning pati |
têmah bliwar-bliwur ||

44.
Yèn wis mati kaping pitu nuli |
nitis maring uwong |
wong ing gunung dadya tapa manèh |
anggêgêntur pratingkahing nguni |
dene kang sun-angling |
pati kae mau ||

45.
Rupaning pati ping pitu iki |
dadi kewan sato |
paksi nuli dadi sadhengahe |
lalêr ulêr myang rês-rêsing bumi |
salin rupa yèn wis |
jangkêp kaping pitu ||

46.
Yèku cakraning gilingan pati |
pati kang mangkono |
kangsi praptèng salawas-lawase |
lamun tan kabênêran ing pati |
mubêng bola-bali |
kadya iku mau ||

47.
Ana ingkang manggilingan bêcik |
manggilingan awon |
nora kêna binêstu bêcike |
krana saking abote cinangking |
wêgah anglakoni |
ras-arasên nyangkul ||

48.
Wus mangkono prabawaning bêcik |
sru suguhe linyok |
kaya iya-iya-a niyate |
nuli mangkene bae ya uwis |
arang kang nuhoni |
mila sasar-susur ||

Jilid 8 - Kaca : 64

49.
Beda lan kang maharsi linuwih |
tan ana pakewoh |
ambêg sura lêgawèng patine |
pangugêre anggêntur pangèksi |
waskitha ring pati |
tan inang sêrambut ||

50.
Yèn wus munthuk ing dina sawiji |
tahên gya tinotor |
pinauman gêtnha kakêlènge |
puthut manguyu gocara cantrik |
endhang angèndhangi |
rabuk ratus arum ||

51.
Wus rinukti sakèh cantrik-cantrik |
piranti kaobong |
sarta samya angastuti kabèh |
samya santi thiri-thiriguthi |
hong ilahèng ahing |
hêm-hêm paum-paum ||

52.
Sêdhêng andadi urubing gêni |
akatar tang totor |
nir tang kukus urube anungge |
sang maharsi nulya marêpêki |
mring agni sêmadi |
ngêningkên pandulu ||

53.
Tan antara ana kang kaèksi |
nèng sajrone totor |
janma cahya awor lan urube |
kawistara narpati mandhiri |
nèng sajroning gêni |
sakaprabonipun ||

54.
Kaèksi wantah lir prabu tinangkil |
maharsi duk anon |
ingkang dadya dêlinge ciptane |
tan têlangke umaksanèng agni |
murub anguladi |
angganya maha-pyu ||

55.
Yèku (ng)gwaning panukmanira ring |
ratu kang kinnot |
wus pancaka tan ana labête |
nora nganggo tapak kang tinitik |
sanalika wus nir |
sampurna ing riku ||

56.
Nora kumalêndhang wus anunggil |
panuksmaning katong |
dadya nora samar panitise |
maring ratu kang minulyèng bumi |
manikingrat yêkti |
panjênêngan ratu ||

57.
Kang mangkono maharsi sêjati |
wasis wruh tumuwoh |
Wasi Wrêgasana nalikane |
myarsa sabdaning Sèh Amongragi |
gigal tyasirèki |
kaluhuran wuwus ||

58.
Ngunandika jroning tyas Ki Wasi |
sayêkti kinnot |
kaya trahing maharsi kang gêdhe |
tatas maring sabdanira nênggih |
sun durung miyarsi |
kawruh kang linuhung ||

59.
Sira Wasi Wrêgasana aglis |
linggih amalorot |
tunggil lungguh lan Jamal Jamil-e |
saha sêmbah atur patiurip |
panggusthining kapti |
mrih Sèh Amongluhung ||

Jilid 8 - Kaca : 65

60.
Aturira sarwi ngasih-asih |
dhuh geyonganingong |
mulyakêna jiwamba ing mangke |
sumanggèng karsa tuwan asung sih |
ing wong kawlasasih |
tumutur sakayun ||

61.
Kawula nut rèh paduka yêkti |
sumarah kemawon |
anêtêpna amêcata dene |
pan kawula darmi anglampahi |
ingkang mugi-mugi |
angsunga pituduh ||

62.
Sèh Mongraga mêsêm lingira ris |
mring Ki Wasi alon |
yèn mangkono karêpira kuwe |
asalina ing agama suci |
sarengating Nabi |
duta kang linuhung ||

63.
Anêbuta ya kalimah kalih |
Ki Wasi wus sagoh |
gya winuruk agama Islame |
wus mangkana Islam Ki Wawasi |
Sèh Mongraga angling |
ngaliha aranmu ||

64.
Sun-arani sira Wrêgajati |
wus pantês mangkono |
Wrêgasana sandika ature |
pan sêkenjing dènnira papanggih |
kangsi Asar ngakir |
Sèh Mongraga wêktu ||

65.
Wrêgajati umantuk sung warti |
mring nak rakyat kang wong |
pan wus samya mangêrti tuture |
sigra kinèn angrukti sêsaji |
arèsan mawarni |
palaboga agung ||

66.
Kalih jodhang dènnira miranti |
rencange anggotong |
praptèng sela Prabakesa (ng)gonne |
Sèh Mongraga ingaturan bukti |
namung angenaki |
sarat kusung-kusung ||

67.
Suruping surya asalat Mahrib |
Jamal Jamil wong ro |
amuruki salat pratingkahe |
maring Wrêgajati wus ginati |
pan manut ing ngarsi |
enggak-enggok lumbu ||

68.
Kunêng dalu kawarna-a enjing |
bakda wêktu Suboh |
Sèh Mongraga alon ngandikane |
wus kariya sira Wrêgajati |
sun arsa lunga nis |
anutukkên kayun ||

69.
Wrêgajati aturira aris |
nuwun yêkti lumoh |
datan nêdya kantun saparanne |
amba sampun dhumatêng kang sakit |
nadyan praptèng pati |
kawula tumutur ||