Ki-demang.com : Centhini

Jilid 9 - Kaca : 49

524 Maskumambang

12.
Jayèngraga amajêng ngujung ngabêkti |
kang raka anabda |
kalihe liring samya jrih |
rumaos galat ing tingkah ||

13.
Jayèngrêsmi pangandikanira aris |
lah sêwawi paman |
mêruput mupung sih ratri |
ngangkah byar anèng ing marga ||

14.
Gya umangkat ngawirya tri lawan santri |
Nuripin tan têbah |
nut margi agêng lumaris |
mêngilèn lêrês lampahnya ||

15.
Sirat mabang nêrancang ing pajar sidik |
wana têratahan |
bubakan bangkan winalik |
sami tinêgal ginaga ||

16.
Pêdhut mabun rumput kasrampat ngêbêsi |
Hyang Aruna (m)babar |
silo bêlolokên dening |
katampêg ing ampak-ampak ||

17.
Angêtirah lir netra rapuh pinilis |
kawêngan ing ima |
malang alang-alang langkung |
tan sirat soroting surya ||

18.
Kang maruta midid narik tampêkani |
pêdhut kang mangampak |
mirut rapêt ing atis-tis |
ngisis pênthèr Hyang Aruna ||

19.
Anêlahi sèsining ngrat trang arêsmi |
wuryaning bawana |
katrapan ujwalèng rawi |
kadya gring mulyèngusadan ||

20.
Pahyas-hyasing langêning kanang murwani |
walêr andrawêla |
citra cawining asari |
sarênti tang mêkar wigar ||

21.
Orok-orok kalurak kalak kêlucik |
kêtèpèng pulutan |
lawatan sikatan busit |
sosotan prabu-sètmata ||

22.
Puspanyidra kacubung pêlasa sênting |
panjrah ruwèng kisma |
kamarutan têkang sami |
ruru myang ron kêtawuran ||

23.
Kêtêring puspita kasiliring angin |
lir mukaning kênya |
rêbut myat mring kang lumaris |
pêksi gêntêr mawurahan ||

24.
Kadya gêdrahing aningal angrasani |
mring kang andon mawan |
kae ngawirya kang siku |
kasayom sêlayèng kêrsa ||

25.
Kang ro kae kait karênanirèki |
Jèngrêsmi kêbancang |
bèncèng kabuncang tan cangcing |
kêcancang cacading marga ||

26.
Pêksi podhang acilu kadya maoni |
ywa (n)darung kalunta |
luhung wus wangsulèng ngriki |
tuwas rêkasèng ing lampah ||

27.
Kang pinurih ing sih tan bisa kêpanggih |
mêngkana èsthanya |
rarywan nèng sela Jèngrêsmi |
angandika lwir sarkara ||

Jilid 9 - Kaca : 50

525 Dhandhanggula

1.
Kadipundi paman kang prayogi |
punapa lajêng napa wangsula |
kang paman alon wuwuse |
sumangga manira nut |
laju wangsul ingong umiring |
priye kono anakmas |
rêmbuge jinujug |
Jèngraga anor ing raka |
jrih umatur Jayèngrêsmi angèsêmi |
mring ari Jayèngraga ||

2.
Kadingarèn sêndhêt sira yayi |
paran wadine kusud netyanta |
tan pati dhangan rêmbuge |
kang rayi lon umatur |
mring raka jrih lamun akumbi |
dadya matur pêsaja |
wit wêkasanipun |
kang raka gumujêng nabda |
dening gêntèn lan paman Kulawiryèki |
anggondhèl kadhèdhèlan ||

3.
Kadèkna kêt-ikêt kacêp alis |
lir kêt-ikêtane Widiguna |
bêksa Kêlana andhèglèg |
kang paman sru gumuyu |
kalingane angêmu wadi |
Jayèngraga alatah |
namur-namur (ng)guyu |
Jèngraga ngling pagujêngan |
paman tan jamak dudu-dudu saiki |
anjênthar anjênthara ||

4.
Untung mênthung andhuyung mring nyai |
lir mancing nèng kêndhil olèh jambal |
dhudha dhedhe olèh cindhe |
angantuk nêmu kêthuk |
lir lunga mlêng dipun-sangoni |
nglêmbarah anèng paran |
sobrah lurung-lurung |
olèh nglêlarangi randha |
randha rèndhè doyan bale angêmuli |
mulya kang kinêrêkan ||

5.
Anggalêgês Ki Kulawiryèki |
Jayèngrêsmi mèsêm myat kang paman |
lir wong nêgara prabote |
Ki Jayèngraga muwus |
mring kang paman angguguyoni |
wontên pintên sadaya |
sapêngaosipun |
angling layake ya ana |
ing pêngaji pitungpuluh para luwih |
lyan sangu rolas reyal ||

6.
Jayèngraga gumuyu sarya ngling |
ingkang pundi alim-dika paman |
kularsa uning dhuwunge |
punapa dhapuripun |
kang paman gya ngulungkên kêris |
gupuh tinampan sigra |
tinarik kang dhuwung |
dhapur parung nagasasra |
pan sêrasah ganja sanga langkung titih |
dhuwung kinêmarogan ||

7.
Kang putra ngling gèdhèg-gèdhèg mèksi |
uwe bilah eram ngong tumingal |
kêris kang mêngkene kiye |
tuwa tangguh awutuh |
pantês kagungane bupati |
dhuwungipun kewala |
pantês rêgi satus |
kêris dhe-gus tan kuciwa |
kang raka ngling êndi ngong milu ningali |
mubyar têmên srasahnya ||

Jilid 9 - Kaca : 51

8.
Ingaturkên kang raka nampèni |
angandika iya bênêr sira |
berawa dhèmês wangune |
odhol sèngoh lukipun |
sarta kabênêran mêpêki |
wêsi alus awaja |
pamor putih ngrambut |
rukmining naga tan rusak |
ganja methok mêkar sabit luntar mathis |
bêntêt traping patra mas ||

9.
Dhasar pancèn arêga kris iki |
yèn ta wus kalambunging awirya |
pêngaji kèh patut bae |
luwês sèdhêt asêmu |
mênyang ngêndi tangguhe iki |
kang paman ngling kêjaba |
Supasaning Sêdayu |
(ng)gih lêrês mangsa nimpanga |
sinungakên gya sinarungakên aririh |
Jèngraga ngliring nabda ||

10.
Mudha taru têmên ya Nuripin |
matur inggih paman jêngandika |
kêlangkung dening aèjèt |
samya sarêng gumuyu |
Kulawirya ngawêd nudingi |
sugih parikan anyar |
moyok wong si Cêblung |
calak sêmplak nora pacak |
kathik mlêpês wuwuh èjèt mêngko iki |
èjèt mono priye ta ||

11.
Matur criyose bêbasan ngriki |
èjèt mêkatên turene saras |
sampeyan saras samangke |
amubru sagêd bratu |
angsal prabot pêpak sarwa di |
kur kelangan lêgênyar |
untung winalungsung |
kris pêndhok timang reyalnya |
mase tuwa pan rêgi sèkêt sêtail |
bangkol mas wastra endah ||

12.
Lêkas angsal pupulih nyugihi |
gêntos niba lan putranta mangkya |
kemase kang krangsèng-krangsèng |
paduka ingkang unggul |
mantun kêthur nyêngkèrèk ngusir |
Jèngraga Kulawirya |
samya sru gumuyu |
wong ro anyawuri lêmah |
kêpyur-kêpyur mingkar-mingkar Ki Nuripin |
Jèngrêsmi mèsêm nabda ||

13.
Gênti niba kêpriye Nuripin |
matur sarwi gumuyu mêlapat |
rinta kapidhara mangke |
rêntah kagunganipun |
pan kasisil marang dudungik |
canthur mêndèr mangundar |
-undar masang wuwu |
nèng wuwungan angsal jambal |
gumalêbog ri-dalêm malungsungi |
têmahan anglêgêna ||

Jilid 9 - Kaca : 52

14.
Ki Kulawirya latah sarya ngling |
gajêg ngong tumon kang sira pajar |
sing kêmala yuda kae |
inggih kang lêcèn bêsus |
mêsês lalêr mencok têkên cis |
Ki Wirya saya latah |
Jèngraga gumuyu |
Nuripin rêrainira |
ingidonan gêdubang prot lir sinungging |
ingusapan rata bang ||

15.
Samya ginujêng ngawirya katri |
Jèngraga tumingal suka-suka |
ywa ko(k)-ulapi karpèknèn |
umatur (ng)guyu-(ng)guyu |
kados topèng kang rai abrit |
Jayèngrêsmi tyas lêjar |
dening rèsmu rêngu |
mèsêm alon angandika |
talah inggih paman ing gêsang puniki |
solah dadya sasmita ||

16.
sasmitaning akerat ngèmpêri |
awon pênêd lêrêse punika |
sungut prêdapaning têmbe |
tan têbih lèjêmipun |
mila ingkang sampun linêwih |
wirang yèn katitika |
dhusthaning Hyang Agung |
sadurung wus ka-adilan |
Islam kapiripun kita pan puniki |
sadrah tan wontên inang ||

17.
Mila kêdah kita taki-taki |
anèng donya wajib mrih kal tama |
kêtêmua supayane |
tuwah pituwasipun |
ing ngagêsang lir wiji sêmi |
kathah warnining wêka |
wak-awaking besuk |
gabug aos praptèng kerat |
miwah awon pênêde ahlinirèki |
ginêdhong ing dêlahan ||

18.
Kados mêkatên wirayatnèki |
putrandika kangmas Sèh Mongraga |
dènnya mêmulang sêsambèn |
kang paman nor ing sêmu |
iya talah wong wus kêdugi |
sêkadare arasa |
prayoga linampu |
ngalap murading utama |
ingkang putra Jayèngrêsmi ngandika ris |
paman rumiyin pajar ||

19.
Mitranipun rakanta jêng kyai |
warti paduka tanah ing Liman |
ing pundi mangke dhusune |
kang paman lon amuwus |
sruwa bae tan pati gati |
jênênge tan kèlingan |
mung desane emut |
gajêge ing Lêmbuasta |
lan ing Mêngkir rewange ngaji jêng kyai |
ya duk mêksih nonoman ||

20.
Ngong durung wruh ngêndi tanahnèki |
kêjaba sinambi tanya-tanya |
lamun katêmu desane |
kang putra ngandika rum |
wawi paman lajêng lumaris |
ngidul ngilèn punika |
mêrgine anggalur |
ya payo sakêrsanira |
lah wis mara sira dandana Nuripin |
gawanmu [gawan---]

[---mu] gendhongana ||

Jilid 9 - Kaca : 53

21.
Sigra Nuripin dandan sarya ngling |
bilah dene dadi sagendhongan |
lir wong arsa nopèng lènggèr |
Ki Wirya ngling gumuyu |
lah ya iku apa sirèki |
wong wis nganggo tapuk bang |
amèngèh rupamu |
Ki Ripin ngêsud dubangnya |
Jayèngraga angling lho aja Nuripin |
bêcik raimu abang ||

22.
Laju lampahe ngawirya katri |
tumurun ngambah wana gêrotan |
kêrakal watu padhase |
kawuhan kleyang runtuh |
kêpidak kumrepak ron aking |
wor krisiking cêmara |
kanginan kumrusuk |
kadya suraking baris prang |
nulya ngambah pagangan kawuryan asri |
tan ana pinagêran ||

23.
Têgal jêjanganan amêpêki |
pala kapêndhêm kasimpar muwah |
ingundhuhan mring kang duwe |
angidul (n)dhudhuk kimpul |
miwah ngundhuh kara kêcipir |
rare jalwèstri tuwa |
bungah samya ngundhuh |
ura-ura sisindhènan |
ting dhêrukir kêpanasên kudhung jarik |
wayah têngange surya ||

24.
Anèng pinggir mêrgi kang (n)dhudhuk wi |
Ki Nuripin alon atêtanya |
sanak pundi niku ênggèh |
kang tinanyan sumaur |
inggih dhusun ing Tajug têbih |
angling malih (ng)gih talah |
têgal-dika niku |
tan wontên kang pinagêran |
myang kokorak sêsawe goprak tan mawi |
sêlamêt datan rusak ||

25.
Anauri lamun dèn-pagêri |
nir tan kari salênjêr-lênjêra |
tan uman dening gus gontèng |
mangsa pijêra thukul |
yèn amawi korak sêsawi |
inggih mangsa umana |
ing pêksi angêbyuk |
sanès lan tanah ngareyan |
pan wus tanjêkipun yèn kula ingriki |
kêdah tan pinagêran ||

26.
Ki Kulawirya ngling hèh Nuripin |
ngilènana sak-ananing têgal |
sadhengah karêpmu bae |
Ki Nuripin agupuh |
(m)borong talês uwi gêmbili |
kara kêcipir kacang |
jagung tela timun |
tumbasan rêgi rong uwang |
angsal pirang-pirang tumpuk dèn-undhungi |
Ki Nuripin amlêngak ||

27.
Dhêlêg-dhêlêg kêduwung sarya ngling |
dene kèh têmên niku ki sanak |
nauri pan wus rêgine |
ngawirya katri ngantu |
Kulawirya mojar dèn-aglis |
matur ah tiyang wêgah |
kathah têmên niku |
mangsi kwawiya ngong-(m)bêkta |
lah sapa akon tutuku tan dudugi |
ya gawanên sêdaya ||

Jilid 9 - Kaca : 54

28.
Matur sintên tiyange kuwawi |
wawi ta kalih sampeyan (m)bêkta |
sêtun kabêkta sêpalèh |
Kulawirya gumuyu |
sakêlarmu bae Nuripin |
sigra wus winêratan |
nèng bagor pinanggul |
ambreyot ragi ngrêsula |
(ng)gendhong jarit ngêndhukur amangkul kandhi |
gêdhe isi borongan ||

29.
Ngrêngkuk urut mrêgi pringas-pringis |
ginaguyu ngling Ki Kulawirya |
Nuripin wus blêg wong ètèr |
kang ginuyu mêcucu |
yata laju nampak wana writ |
bondhot pêngalang-alang |
myak gêlagah rayung |
(n)jog lèpèn wêning toyanya |
pinggir kali kang kidul munggul kaèksi |
guwa anjru-dêmungan ||

526 Jurudêmung

1.
Jayèngrêsmi Jayèngraga |
katri Ki Kulawiryèku |
raryan ing kali samya dus |
katoran dènnya lampah |
wanci lingsir wêktu Luhur |
samya yêm dènnira siram |
rungsang kasêgêran ranu ||

2.
Nuripin sèlèh gendhongan |
ge-age ambyur ing ranu |
silulup kajêglug watu |
bathuke bênjut sakluwak |
dèn-têkêm ngêsês marêngut |
mênyonyong dèn-usap-usap |
Ki Kulawirya amuwus ||

3.
Nyêmoni wong si kêparat |
dak-banggal pisan raimu |
Nuripin matur malêruk |
kabèh biyang ambakna duka |
salang surupe angrawus |
durung takon (n)dadak duka |
tiyang bathuk kula bênjut ||

4.
Silulup kêtanggor sela |
puniki napa kang bênjut |
durung-durung (n)dadak bêndu |
Ki Kulawirya tumingal |
Nuripin bathuke bênjut |
Ki Wirya latah-alatah |
Jayèngrêsmi gumuywandulu ||

5.
Sasmitèng paman rinira |
samya sukanirèng guyu |
Nuripin kèpingkêl asru |
Jèngrêsmi ngling yèku paran |
Nuripin kang dera-guyu |
matur pan inggih punika |
bathuk tri tan wontên mulus ||

Jilid 9 - Kaca : 55

6.
Kadya dèn-girik tinêngran |
ting pênyonyong bathuk abuh |
sami kêdhahar ing watu |
punapa dhêmit ing paran |
nêngêri tiyang lumaku |
mung sêtunggil ingkang lêpat |
tan kenging beya ing pintu ||

7.
Jèngrêsmi gumujêng myarsa |
Jèngraga Kulawiryèku |
samya angapyuki banyu |
Ki Nuripin gulagêpan |
matur kapok biyung biyung |
lumayu mêntas wuwuda |
ginuyu sasolahipun ||

8.
Ki Kulawirya ngling latah |
hih bokonge minal-minul |
mawa konthole lir waluh |
kênthi tilas wadhah lênga |
culêse nyuplêg angathur |
kapit ing kêmpung konthol |
mênthik cilik kaya susur ||

9.
Binalang-balang tan kêna |
Nuripin endha ambêkuh |
biyang Thol leyan konthol gus |
Ki Wirya ngling parat edan |
madhakkên konthol si Cêmput |
tan wun kang samya paguywan |
nulya mêntas adus ||

10.
Dandan nyamping katrinira |
samya ngambil toya wulu |
tan kantun lan santrinipun |
nulya minggah maring guwa |
guwa Pêdhali asingup |
pêlataran sri andong bang |
puring noja sêmbon andul ||

11.
Wali-kadhêp winong nangka |
patra mênggala trikancu |
kelor sawo pêlêm madu |
kang wetan wrêksa gêng gurda |
sulur wok nambi ngêrampung |
natar-sik lir sinaponan |
kang guwa ngêngrêng dinulu ||

12.
Ngawirya tri gya tumama |
ing guwa wingit malat kung |
madalêm tidhêm makuwung |
wiyar jrambah tan kêsrambah |
lyan kang ngulati sêdya yun |
winêtaran ing ngênggyanan |
mot santrinya kapra langkung ||

13.
Wau kang sami tumama |
laju salat wêktu Luhur |
Jèngrêsmi ngimami ngayun |
wus antara bakda salat |
pêragat sunatira wus |
laju ngidêri jro guwa |
wontên pagrongan kêdulu ||

14.
Ingkang mangetan wiwara |
sumruwêng pêtêng alimut |
wiwara malih kang kidul |
asingêb mangêb limêngan |
wontên malih kang kadulu |
wetan wiwaraning guwa |
ngêlangab kadya dêlanggung ||

15.
Kêmput midêr têpung-gêlang |
wiwara gêng agêngipun |
ngalèr-ngilèn kêdhik ngayun |
kêpara ngilèn keblatnya |
wus mêngkana samya lungguh |
ngawirya tri myang santrinya |
nèng pipi kilèning pintu ||

Jilid 9 - Kaca : 56

16.
Jayèngrêsmi lon ngandika |
guwa punika kêlangkung |
rahmat raosing kalbu |
kadya tan anèng ing guwa |
lir pendah nèng wisma pangguh |
lan rayat ayêm ing driya |
kang paman nauri wuwus ||

17.
Kasinggihan lèhira jar |
wikan iki mawènipun |
atêntrêm suka sumungku |
katri samya ngalêmbana |
Ki Kulawirya andulu |
Nuripin sira ngagara |
gêni anggodhoga kimpul ||

18.
Agupuh ingkang liningan |
karya dhingkêl urub-urub |
ambênêm katela jagung |
matêng sinaoskên ngarsa |
linambaran roning sêmpu |
Jèngraga Ki Kulawirya |
nêdha bêbakaranipun ||

19.
Jèngrêsmi tan pati kêrsa |
amipil jagung kur-ukur |
lagyantuk rong larik sampun |
sinungkên mring santrinira |
kang paman nyamik asêngkut |
myang Nuripin athêkulan |
Jèngraga tan pati antuk ||

20.
Gêmbili kêdhik tan têlas |
kang paman kêlangkung tuwuk |
lajêng anggêloso turu |
kuwarêgên sarta sayah |
glis ngorok asênggur-sênggur |
alèmèk sinjang sakêbar |
bantal pêndhukuling watu ||

21.
Nuripin wusnya mêmangan |
ngaringkêl (ng)galinting turu |
ngorok sêngguran sru |
Jèngraga gumuyu miyat |
bilah lir tidhur lan tambur |
Ripin lan man Kulawirya |
dene ta ambarung umyung ||

22.
Kang raka aris ngandika |
ya kaya wis bunuhipun |
wong warêg rosa tuturu |
kang rayi dhêku nor-raga |
Jèngrêsmi malih amuwus |
lah payo ninis mring jaba |
gya sang ro wirangrong mêtu ||

527 Wirangrong

1.
Yata wau Jayèngrêsmi |
wanci akir lingsir kulon |
awal wêktu Ngasar bêntèr seyub |
sêdhêng ngaring-aring |
lan rayi Jayèngraga |
ngangin-angin soring gurda ||

2.
Jayèngrêsmi Jayèngraga |
sanalika samya anon |
wringin awoh nangka alit agung |
kêtèwèl myang gori |
babal madu kocingan |
kang mêtêng agêng-agêng kathah ||

Jilid 9 - Kaca : 57

3.
Jèngrêsmi gawok ningali |
wringin woh nangka ting grendhol |
sasmitèng Jèngraga wruh ing sêmu |
mulat ing waringin |
woh nangka gori babal |
madu kucing matêng ngambar ||

4.
Kang raka ngandika aris |
paran purwane wringin woh |
têka awoh nangka elok tuhu |
priye wahnanèki |
Jayèngraga nor-raga |
inggih manawi sasmita ||

5.
Jayèngrêsmi ngandika ris |
apa ya kena dèn-undhoh |
lah mara Jèngraga payo ngundhuh |
kang matêng saiki |
anulya samya ngalap |
uwoh nangka kang nèng gurda ||

6.
Kalihe samya angambil |
gampil pinêthik kemawon |
Jayèngraga sigra mundhut wêdhung |
mring (ng)gonne Nuripin |
samya mêksih anendra |
wangsul sangandhaping gurda ||

7.
Pinêcok nangka jinuring |
tanpa dami nyamplungan thok |
akandêl sacêngkang mawa madu |
barêsih akuning |
Jèngrêsmi Jayèngraga |
sukèng tyas kêlangkung kêrsa ||

8.
Sinuwir cur madu warih |
nyamplungan tan mawi bêton |
anulya dhinahar manis arum |
raose nglangkungi |
kalihe kanikmatan |
satunggil sewang atêlas ||

9.
Tan kirang tuwuk (m)bukti |
sêdhêng tan pae karo |
kang raka ris nabda yèn sun durung |
myat nangka kadyèki |
tan mantun manisira |
nikmat sumrah ing sarira ||

10.
Anèh lan nangka sakèhing |
lumrah nyamplung nganggo bêton |
kiye nora nana bêtonipun |
pa wus adatnèki |
waringin awoh nangka |
mung ing Pêdhali kewala ||

11.
Kang rayi umatur aris |
duka-dalêm mangsa-borong |
amba tan gêdugya yêktosipun |
adat lan botêning |
pakèwêt graitamba |
kang raka malih ngandika ||

12.
Lah payo mring guwa malih |
paman paran mêksih ngorok |
gya wangsulèng praptèng ngayun |
nataran ningali |
kelor sawo sêmboja |
tri kancu patramênggala ||

13.
Wali-kadhêp pêlêm manis |
nangka sawit ambyut woh |
sadaya woh nangka katrinipun |
tan ana kang kari |
Jèngrêsmi ya Jèngraga |
samya angungun tumingal ||

Jilid 9 - Kaca : 58

14.
Jèngrêsmi nyathêt ing galih |
sèstu sasmitèng Hyang Manon |
tyas lêjar sumringah sukur |
eloking pangèksi |
gya minggah malbèng guwa |
kang pamanira ginugah ||

15.
Ki Kulawirya gya tangi |
myang Nuripin gregah lunggoh |
Jèngrêsmi ngling paman wawi wulu |
ing wêktu mèh akir |
nulya samya mring jurang |
siram ing kali akadas ||

16.
Wangsul mring jro guwa malih |
Ki Kulawirya tan anon |
kelokaning tingal kang andulu |
mung kang putra kalih |
Jèngrêsmi Jayèngraga |
myat kitri samya woh nangka ||

17.
Wus malêbèng guwa wingit |
Ki Nuripin adan alon |
sarêng dènnya sunat ngangkat pêrlu |
Ngasar antarèki |
bakda salir pêragat |
akir surya mahacala ||

18.
Tan adangu manjing Mahrib |
Jèngraga adan tumlawong |
Ki Wirya kang dadi imamipun |
sabakdaning Mahrib |
laju ing wêktu Ngisa |
Jèngraga gantya dadi mam ||

19.
Wus pêragat bakda witir |
adhikir têpakur mansoh |
samya kajênêkan dènnya kasud |
sawuse kadyèki |
Jèngrêsmi lon ngandika |
Nuripin urub-uruba ||

20.
Ingkang liningan agipih |
dados gêni obor-obor |
padhang jroning guwa sambènipun |
ambênêm kimpul wi |
jagung lawan kêtela |
pan sarwi anggodhog wedang ||

21.
Kênthi sinapit ing êpring |
kleyang kêmadhoh ginowok |
bumbung kinêrêt ingot alus |
kang minangka cangkir |
Nuripin tyase rêna |
arêngêng-rêngêng gurisa ||

528 Girisa

1.
Sawusnya dènnya (m)bêbakar |
sinaosakên ing ngarsa |
linambaran ron war-awar |
miwah wedang tanpa gula |
cangkir bumbung sinisikan |
Jèngrêsmi mèsêm ngandika |
dene akal têmên sira |
kêndhi sinapit minangka ||

Jilid 9 - Kaca : 59

2.
Cèrèt cangkire bumbungan |
ajange godhong wêwanan |
arum mat nora kuciwa |
yèn aja amèlu sira |
arikuh samêrga-mêrga |
kang paman aris wacana |
ya ana kang dadi Sêmar |
tan samar yèn katlihatan ||

3.
Ana kang dèn-dol nèng dalan |
butuhan payu wolung wang |
Nuripin anglirik mojar |
(ng)gih (ng)gihipun pajêng pisan |
nêmbêlas wang lan sampeyan |
Ki Wirya ambêkus mulat |
êndang munthuk si Kêparat |
wani-wani mada mring wang ||

4.
Nuripin mringis turira |
inggih akados kewala |
jêr mangke sampun prêkosa |
debès jingkêngan anjanjras |
Ki Kulawirya alatah |
sarwi adhahar bênêman |
kimpul lagya minambah ||

linêpèh kinarya (m)balang ||

5.
Nuripin rêrainira |
gêluprut kêna binalang |
matane dening mamahan |
angrajuk nêntak ah biyang |
Kenthol sok amara-asta |
sakêcandhake kewala |
sadhengah dèn-(ng)go anglèmpar |
kêmba yèn tan mara-tangan ||

6.
Sami ginaguyu suka |
Ki Kulawirya wuwusnya |
cangkêmmu cok paribasan |
gêndhêng anggarap maring wang |
tambamu kowe rasakna |
Nuripin dadya paguywan |
Jayèngrêsmi lon ngandika |
mring paman lan arinira ||

7.
Sêsambèn samya rêrasan |
paduka punika paman |
tuwin sira Jayèngraga |
sêdhênge ngalap mujadah |
paedah pratingkah tama |
ywa kalunta kalulun tyas |
maksiyat têmahan siya |
mring badan kita priyangga ||

8.
Mênggah ngagêsang punika |
wajib ka-budi iktiyar |
milih nalar kang tan sasar |
soring-asor wong tan swarga |
liring swarga ku raharja |
arjèng budi wruh wêkasan |
wêkasaning kawaspadan |
mawa mlampah ing ngagêsang ||

9.
Won pênêd lêrês lan lêpat |
kang winawas dalu siyang |
pandomanira tabiyat |
keblate manah punika |
lêpat lêrês anèng keblat |
tan wande tibèng tabiyat |
tabiyat ingkang utama |
kadhang tibèng tabyat nistha ||

Jilid 9 - Kaca : 60

10.
Tabiyat ro wus pacangan |
ing awon pênêde kita |
tadhaning anèng tabiyat |
pênarikan mring swarga |
pênarikan maring nraka |
tan wus pêsthi tibanira |
ing salah sawijinira |
tan kenging botên ngagêsang ||

11.
Kêdah ngangkah-angkah keblat |
mrih tiba tabiyat tama |
mapan sampun winalêran |
lan Jêng Nabi Rasulullah |
sarengat lawan tarekat |
kakekat lawan makripat |
puniku keblat tabiyat |
kang utama linampahan ||

12.
Mupakat para pêndhita |
ngluhurkên ngèlmu sarengat |
linuri utamanira |
mila putranta kakangmas |
Sèh Mongraga kang wus keblat |
tabiyat mring kaluhuran |
mring ingkang tan kêgêlantang |
wus man ing dunya akerat ||

13.
Inggih ta mangsa wontêna |
kang kadya putranta kangmas |
susungut wahyu uliya |
rèhning kita rumaos ngam |
sapikantuk ngèmba-èmba |
kang paman lan arinira |
tumungkul samya norraga |
wusana alon lingira ||

14.
Ya talah sun-rasa-rasa |
pratingkah kang nora layak |
kêduwung kang wus kêlakyan |
tan yun sêmênir-mênira |
rong pêmbandhil dohing manah |
bênêr têmên kangmasira |
dènnya akarya wirayat |
lah payo ngalih tênagan(?) ||

15.
Bêcik padha salin ada |
binuwang kang wus linakwan |
Jèngraga mèsêm nor jiwa |
Nuripin dhèhèm carita |
sèbêt byar wau ta ingkang |
lagya asalin dhadhakan |
dhasar jadhug warnanira |
karêngga dening busana ||

16.
Na ing kono apa nyata |
Ki Kulawirya anjola |
ambêkuh brah parat edan |
bandholên cangkême ngomyang |
nyandhak wi gêmbili mêntah |
Ki Nuripin binalangan |
blag blêg lumayu alatah |
samya ginuyu tingkahnya ||

17.
Jèngrêsmi aris ngandika |
inggih Nuripin punika |
lothung sangêt anèng paran |
nyarasakên lampah sayah |
sinambi guyon tan susah |
Ki Wirya kadho ambalang |
nauri ngling mring kang putra |
pèkne mêngkonone iya ||

Jilid 9 - Kaca : 61

18.
Ing wanci wus sirêp janma |
amapan dènnya lênggahan |
samya dhikir rêratiban |
karahab tuwajuh ing tyas |
antara dhikir salêksa |
dènnira ngonjot kalimah |
kongsi lingsir dalu dahat |
tyas samya kadya ginirah ||

19.
Sawusira rêratiban |
kèndêl tan ana rêrasan |
Ki Kulawirya anendra |
Nuripin sasore mula |
turu ngorok sasênggoran |
Jèngrêsmi lan Jayèngraga |
samya tan pikantuk nendra |
mêksih anjungkung wiridan ||

20.
Nutug dènnya suhul ing Hyang |
wayahing pajar gidiban |
luwaran dènnira bengat |
kang raka alon ngandika |
wungunên man Kulawirya |
wus sêdhênge wêktu salat |
Subuh utama kang awal |
kang paman lan santrinira ||

21.
Samya tangi ting garegah |
angling lah suwawi paman |
mring kali samya akadas |
gya tumurun ing jujurang |
wus ngambil toyastutinya |
samya minggah maring guwa |
nulya adan lajêng sunat |
Jèngrêsmi kang dadya imam ||

22.
Sawusnya pêrlu pêragat |
Jayèngrêsmi Jayèngraga |
samya trap dhikir salsilah |
sinêntorkên wiridira |
praptèng byar enjing Hyang Surya |
pênthèr rumangsang dennira |
bakda dhikir kang wiridan |
luwar panjuming kanthenan ||

529 Kinanthi

1.
Ki Jayèngrêsmi asêgu |
mring paman ngandika aris |
kadipundi ingkang kêrsa |
ing rêmbag paduka mangkin |
punapa inggih lajênga |
tuwin wangsula ingriki ||

2.
Kang paman nauri wuwus |
mangsa-bodhoa sirèki |
manira anut kewala |
paran sakêrsanirèki |
lah priye kono anakmas |
Ki Jayèngraga turnya ris ||

3.
Inggih sumangga ingriku |
yèn mênggah kula pribadi |
anjawi kêrsanta kangmas |
prayogi ingkang dumugi |
ngupaya ngiras tirakat |
pikantuk kalih prakawis ||

Jilid 9 - Kaca : 62

4.
Kang raka aris amuwus |
abênêr yayi Jèngragi |
satutuging paran iya |
manawa antuk pawarti |
pandhita myang ajar-ajar |
jêjanggan lawan wêwasi ||

5.
Wau ta sêdangunipun |
nèng jroning guwa Pêdhali |
pirêmbag dènnira mentar |
yata wontên janma prapti |
satêngah kapara tuwa |
mêndhita lantaran êcis ||

6.
Mara sarwi mundhuk-mundhuk |
momori dènnira linggih |
pinapan samya ngingsêran |
sêsalaman gênti-gênti |
Jèngrêsmi alon ngandika |
punêndi paman ing wingking ||

7.
Sintên ingkang sinambat ing hyun |
umatur kang sinungan ling |
ing Tajug pawisman amba |
dhukuh sanginggiling dhingkil |
kang sudi mastani aran |
pun Sinduraga ran-mami ||

8.
Wangsul kang para binagus |
paran kang sinêdyèng kapti |
ing pundi sêsanèng wuntat |
lan ingkang sinambat wangi |
Jèngrêsmi nauri sabda |
manirèki samya santri ||

9.
Dene sêsanèngong pungkur |
wêngkon tanah Kabulêngkir |
anglampahi kawlasarsa |
ngupaya kadang tuwa nis |
ran Jèngrêsmi Jayèngraga |
katri Ki Kulawiryèki ||

10.
Ki Sinduraga andulu |
rêsêp ing awirya katri |
Jèngrêsmi aris ngandika |
punapi wontên kang gati |
paman panggih lan manira |
Ki Sinduraga turnya ris ||

11.
Mila kawula agupuh |
tuwi mring guwa Pêdhali |
wingi wanci surup surya |
kawula ningali pêksi |
sêkawan asêsambêran |
pan sampun adatirèki ||

12.
Wus dados pratandhanipun |
yèn wontên tiyang nênêpi |
anèng ing Pêdhali guwa |
yèn kathah-kathah kang paksi |
yèn kêdhik ingkang tirakat |
pêksi mring Pêdhali kêdhik ||

13.
Yèn sêpên pan inggih samun |
tan wontên pêksi satunggil |
tyas kawula kêdah dhangan |
enjing punika mariki |
kêlamun parêng ing kêrsa |
paduka kawula turi ||