Ki-demang.com : Centhini

Jilid 9 - Kaca : 63

529 Kinanthi

15.
Mangkana samya atêmu |
saking ing guwa Pêdhali |
Sinduraga anèng ngarsa |
nuduhkên marginirèki |
nabrang kali nètèr jurang |
ngampat pèpèrènging kali ||

16.
Tan adangu lampahipun |
nampak têrataban kêdhik |
praptèng Tajug punthuk arga |
Sinduraga glis nudingi |
mring rabi nak-putunira |
kinèn ngrukti suguhnèki ||

17.
Ngaturan lajêng mring salu |
mêngkana tata alinggih |
kapang nèng bale-watangan |
Ki Sinduraga anuding |
anak karoro wanodya |
prawan wêlanjar sawiji ||

18.
Sêmune mêsês abêsus |
kang prawan mêpêg birai |
dhasar karone sêmbada |
katêngên rupane rêsik |
lanjar wastane Wasita |
kang rara aran Warsiti ||

19.
(n)Dha-usuk nom tuwanipun |
kang dèrèng wruh tan kêtawis |
katon pêrawan kalihnya |
busana sinjang sarwa-di |
tasik wida lêlamatan |
gêlung sinêkar ganda mrik ||

20.
Kang tuwa kêkêmbên pêlung |
sinjang jambe copot mori |
ni Warsiti kêmbên jingga |
tapih anyar tambal miring |
samya naoskên pawohan |
mring tamu amêgat liring ||

530 Mêgatruh

1.
Ni Wasita tapsirih kuningan sampun |
sinaoskên Jayèngrêsmi |
mundur gya Warsiti maju |
tapsirih mring Jayèngragi |
dènnya ngajokkên kesêron ||

2.
Kumarompyang tapsirih ambênthuk dhêngkul |
dhêngkule Ki Jayèngragi |
maksih babak duk rinawud |
tanggor lingiring tapsirih |
sakit dhêngkule kêraos ||

3.
Kagyat ngêsês samya mêsêm kalihipun |
kawistarèng ing alinggih |
sinamun pasêmonipun |
ni rara mundur glis-aglis |
pêlayune srèmpang srèmpong ||

4.
Ni Warsiti ginuyu mring bakyunipun |
jorogan angisin-isin |
ni rara angling gumuyu |
lèhku anyuguh tapsirih |
ambênthuk dhêngkuling dhayoh ||

Jilid 9 - Kaca : 64

5.
Patute bae rada lara anjumbul |
mak pyur tyasku wêdi isin |
mandêng mring ngong sun gya mundur |
têrataban ati-mami |
samya cêthotan gêguyon ||

6.
Apan pacok-pinacokkên mring têtamu |
ya patut sira Warsiti |
kae bojomu angrangkung |
ingong kang ora (n)duwèni |
ni rara mèncêp malerok ||

7.
Ih sa-ugèk akèwês têmên ujarmu |
kae bojomu kang sigid |
patut padha antêngipun |
ni Wasita gumuywa ngling |
sijine kae kang jagong ||

8.
Kang (n)duwèni bojo pantêse sirèku |
Warsiti ngoso dènnya ngling |
lah (m)bok kowe dhewe patut |
olèh wong tuwa kêmaki |
wangunane rada bancol ||

9.
Ingaruhan kang guyon mring biyangipun |
(m)bok aja pating guligik |
kadulu ing dhayoh saru |
jamak kang antêng abêcik |
malah padha nganggo-anggo ||

10.
Mêngko lamun manèh ngladèni mring ngayun |
kang rada mriyayi thithik |
ywa kaya anaking jagul |
bapamu dèn-kyai-kyai |
mring wong pirang-pirang dhukoh ||

11.
Kang sinêndhu samya jrih mring biyangipun |
nulya ngadi-adi warni |
awake pinatut-patut |
anggêmpung waja kinêsik |
karone salin panganggo ||

12.
Ni Wasita asinjang rambutan wungu |
kêkêmbên pêlangi wilis |
pupur tipis tan rinêmbung |
awiwida buratsari |
pantês agêlung kêkêndhon ||

13.
Ni Warsiti sinjang kêling tuluh-watu |
tinêlpok Banyumas kuning |
rininggit tutumpalipun |
akêmbên jingga tinêpi |
agêlung sinêkar methok ||

14.
Wida jênar tipis gêbêgan arêmu |
pupur rinêmbug arêsik |
biyange mèsêm andulu |
marang anake kêkalih |
ngling ya jamake mêngkono ||

15.
Ana dhayuh ingkang prayogi dinulu |
sêmune padha priyayi |
ati-atinên mangayun |
mantrap-silamu bêcik |
ywa sira sêmbrana karo ||

Jilid 9 - Kaca : 65

16.
Sutarnira manut pituturing biyung |
yata kang sami alinggih |
anèng ing pêndhapanipun |
sami rênaning apanggih |
Ki Sinduraga anudoh ||

17.
Kinèn mêdalakên pasugatanipun |
sigra nyaine angirid |
sutanya kakalih samya yu |
miwah rencange pawèstri |
rampadan bucu sumaos ||

18.
Anèng ngarsa wus tinata piringipun |
Wasita lawan Warsiti |
tumiyung gulune manglung |
anjongkok siduwa siji |
susune sasisih pèthot ||

19.
Amênjutu kêduwèng siduwanipun |
poke wonga-wonga pipit |
dadya siji sewang (ng)gandhul |
Jèngraga Kulawiryèki |
mandêng tan liyan jinênthot ||

20.
Mung brêngkêring kang mintêr samya dinulu |
lir woh binarongsong kengis |
Ripin wruh paraning dulu |
ngampêt watuk kêpêntut thit |
ngawirya ro kagyat mengo ||

21.
Sru gumuyu Kulawirya ngling hus buntung |
Nuripin anggigil mijil |
mêksih kêpêntut (n)dharudhut |
sadaya (ng)guguyu sami |
Wasita Warsiti anon ||

22.
Kacêmutan karone angampêt guyu |
wusnya dènnira ngladèni |
samya (ng)guyu jroning kalbu |
mundur glis pating kulikik |
kapucungan ing dhêdhayoh ||

531 Pocung

1.
Alon matur Ki Sinduraga mring tamu |
sumangga punika |
kawula turi wêwanting |
maklum dalêm nênaosi sumapala ||

2.
Samya gupuh pra tamu samya tuturuh |
(n)dan lêkas anadhah |
pikantuk dènnira bukti |
wus antara dangu luwar wiwijikan ||

Jilid 9 - Kaca : 66

3.
Gya mangayun kang angladèni angundur |
cinarik mangandhap |
tinimbalan Ki Nuripin |
praptèng ngarsa samêkta kinèn anadhah ||

4.
Langkung tuwuk matêngkuk muluk athêkul |
kinèhan tan kirang |
ajange tipis kalimis |
Kulawirya gumuyu sasêmon ujar ||

5.
Bisa ngukur lèmpèr panjang piring lurung |
lir bathuk pêngantyan |
barêsih amincih-mincih |
andêlêna yèn mênang kêlawan ajang ||

6.
Kang ginuyu nak-enak angob ak-èk-uk |
gumoh ingêlêdan |
cukil untu sêbal-sêbil |
ingkang têbèng ing lêmah malih pinamah ||

7.
Grundêl muwus nora kêna mangan tuwuk |
ingurah-urahan |
sarta srêngên mêmoyoki |
milu-miluwa dhèwèke wong bêndara ||

8.
Maring batur tan nglumuhi balung usus |
Ki Wirya tumingal |
gumuyu anon Nuripin |
ih ih bilah Ripin angkuhe lir dêmang ||

9.
Munyung-munyung marang wong nora angingus |
yèn wis mamah-mamah |
warêg wadhuke malênthi |
kaya kundhi kêlarisan adol grabah ||

10.
Lo dang bêrung nora andêlok maring sun |
Ki Nuripin obah |
mèsêm nolih mring Ki Ragil |
mak kêcêmut Ki Kulawirya alatah ||

11.
Oh si Cêmput kur obah janggude iku |
lir wong kêsurupan |
mêngko ngong-sêmbur ing kêndhi |
Ki Nuripin kumrengkang mêdal ing jaba ||

12.
Pan ginuyu marang kang samya alungguh |
Ki Sinduraga gya |
ngatak marang kang ngladèni |
kinèn mêdalakên nyamikan dhadharan ||

13.
Anakipun karo pangirid ing ngayun |
tinata ing ngarsa |
tompa brêm anyaran manis |
têtêl antêp kêtan uran lawan kilang ||

14.
Pisang gabu nangka wi gêmbili kimpul |
gêdhang raja-tawa |
gula rèn lêgèn sumaji |
sabun putih bêrondong sêle kêtela ||

15.
Alon mundur Wasita Warsiti runtung |
solahe kinarya |
samya brangti mring têtami |
Sinduraga anyarakkên pasugata ||

Jilid 9 - Kaca : 67

16.
Lah punika mêmangsêg sawontênipun |
nanging sumapala |
namung sarating kêlantih |
kang cinaran ngling inggih ngangkah punapa ||

17.
Samya mundhut nyamikan sasênêngipun |
aroyom karênan |
Jayèngrêsmi ngandika ris |
minggah guwa Pêdhali puniku paman ||

18.
Sajronipun wontên malih guwa têlu |
kang wetan satunggal |
kidul myang kilèn sawiji |
langkung nyurêng sumingêb pêtêng tiningal ||

19.
Alon matur inggih kang ngalor puniku |
kang ngidul lajêngnya |
trus ing guwa Bayang-kaki |
ingkang wetan trus guwardi Padhangeyan ||

20.
Kang ngilèn trus guwa ardi Wijil nêngguh |
tanah ing Pepedan |
yèn wontên ingkang nglampahi |
têmtu inggih ing ngriku têrusanira ||

21.
Pan puniku dadya ing pangungsènipun |
yèn wontên pêrkara |
gègèr wong kutha angili |
mring Pêdhali sapintên kamot kewala ||

22.
Pandugèngsun dumugi sêlaminipun |
ing Pêdhali guwa |
mupangat guwa Pêdhali |
samya rêsêp sang anom myarsa kandhanya ||

532 Sinom

1.
Jayèngrêsmi lon ngandika |
paman ngong têtanya malih |
punapa wus adatira |
guwa Pêdhali puniki |
waringin woh gori |
babal madu kucing arum |
manira ngalap nangka |
lan Jèngraga angsal niji |
ingong bubak nangka kandêle sacêngkang ||

2.
Barêsih kêsêd ajênar |
tanpa bêton tanpa dami |
pipit nyamplungan kewala |
kumocor madu sinuwir |
raose langkung manis |
tan mantug atuntung arum |
têlas sawiji sowang |
manira lan Jayèngragi |
gawok mulat waringin têka woh nangka ||

Jilid 9 - Kaca : 68

3.
Datan ngêmungakên gurda |
dalah sarupaning kitri |
pan sadaya awoh nangka |
sêdene kang nangka yêkti |
Sinduraga turnya ris |
kêlangkung prayoginipun |
punika pan idayat |
sakadaripun dumugi |
pan wus adatipun ing Pêdhali guwa ||

4.
Jayèngrêsmi Jayèngraga |
lêjar tyasira jinarwi |
marang Kae Sinduraga |
Jèngraga têtanya aris |
pundi kang dèn-wastani |
dhusun ing Wêngkêr puniku |
kang liningan turira |
inggih ing Kêdhaton lami |
sapunika karan Katongan kewala ||

5.
Mangkya dadya pamakaman |
pêsareyanipun gusti |
Bathara Katong minulya |
gotèkipun duk ing nguni |
jaman Dipati Panji |
Pranaraga puranipun |
pura Wêngkêr namanya |
pangayaping para putri |
yèn wus maring Wêngkêr mantuk sowang-sowang ||

6.
Tumêkèng alama-lama |
[---] |
pura Wêngkêr ing Pranaraga |
ing Pawêngkêr adipati |
tan wontên kang nêlani |
dipati sêlajêngipun |
dipati Wêngkêr pura |
tumuntên wontên kang judhi |
inggih Gusti Bêthara Katong ambêdhah ||

7.
Pinopor prêp pinrêsing prang |
dipati Wêngkêr pinatin |
putri Wêngkêr binarêkan |
Bêthara Katong mandhiri |
misèsêng Pranaragi |
punggawandêl wus sumuyut |
puniku icalira |
namaning pura Wêngkêr wit |
saking gusti Bêthara Katong punika ||

8.
Pan aran pura Katongan |
ing alami gusti lalis |
sinêkar sajroning pura |
dadya astana miwiti |
putra wayahirèki |
gumantya kamuktyanipun |
Jayèngrêsmi ngandika |
Bêthara Katong puniki |
saking pundi kawijilane waunya ||

9.
Ki Sinduraga turira |
Bêthara sêjarahnèki |
saking nêgari Bintara |
warti putrane sang aji |
dhukuh nèng lèpèn Tangi |
ing Katong wastaning dhusun |
kawit alit binucal |
mring sultan nèng lèpèn Tangi |
inggih asring Bêthara mring Pranaraga ||

10.
Mimitra mring Kyagêng Mirah |
Ki Agêng Mirah puniki |
kang miwiti gama Islam |
santrinipun misih kêdhik |
Bêthara Katong kait |
lan Kyagêng Mirah ing dangu |
arsa angrisak kitha |
nalini agamanèki |
Pranaraga mêksih gama Buda kawak ||

11.
Wus piadrêng kêrsanira |
Kyagêng Mirah anjurungi |
katrimu pêndonganira |
bêdhahipun Pranaragi |
kados wau puniki |
mêkatên gogotèkipun |
Ki Kulawirya lingnya |
mêngkono jawane iki |
lah kêpriye kêpatèn lacaking warta ||

Jilid 9 - Kaca : 69

12.
Kang putra kêkalih nabda |
pan inggih botên kêpanggih |
Sinduraga aturira |
punapa kang sinamya ngling |
Ki Wirya anauri |
e bab ngupaya kêkaruh |
karuhipun kang rama |
ngawirya kalih puniki |
inggih kakang kula kang sêpuh piyambak ||

13.
Jêng Kyai Bayi Panurta |
guru gêng tan ana nyami |
madhêkah ing Wanamarta |
minardikakakên dening |
Wirasaba dipati |
masuk guru amumunjung |
sapadhukuhanira |
minuktèkkên ing jêng kyai |
datan kêna sêkêdhik karyaning praja ||

14.
Ginuron para ngulama |
miwah bupati pêsisir |
langkung gêng mamulanira |
kang samya angalap janji |
priyayi myang wong sugih |
cêlak têbih samya mriku |
kang wau angandika |
maring ngong lan putra kalih |
awêwarti Jêng Kyai Bayi Panurta ||

15.
Anutur duk mêksih jaka |
kalane ngêlaya ngaji |
pinajar kèh mitranira |
kang sami saeka-kapti |
jêng kyai duk ing nguni |
Mas Arundaya rannipun |
gadhah mitra satunggal |
ing Wêngkêr sangêt wong kapti |
nanging kula kêsupèn lêng namanira ||

16.
Lan malih ing Lêmbuasta |
samya kêsupèn rannèki |
mêngkana Ki Sinduraga |
gêgêtun èngêt ing galih |
dènnira tutur mawi |
Mas Arundaya puniku |
Sinduraga lon mojar |
inggih kalingane ugi |
Mas Rundaya wasta Ki Bayu Panurta ||

17.
Kadya wus kêrsaning Allah |
sêsambungane pinanggih |
kawula botên nyupêna |
paduka pajar puniki |
tamiyan kang siniwi |
wong tan nyana yèn sang bagus |
putrane Mas Rundaya |
kongsi gêng prapta mêriki |
inggih kula mitrane Mas Arundaya ||

18.
Agupuh pangrangkulira |
anggrathul wuwusira sih |
katongton rumakêtira |
gapyuk-gapyak dènnira ngling |
datan nyana sayêkti |
adhuh mas sutèngsun bagus |
putrane Kang Rundaya |
dene padha sigid-sigid |
wiratama susila anitikrama ||

19.
Tata dènnira lênggahan |
pêpajar Ki Sinduragi |
duk maksih sami jêjaka |
kang sami saeka-kapti |
lawan ramanta nguni |
èngêt-kawula ing dangu |
kasanga rama-ndika |
kasupèn ingkang kêkalih |
èngêt jula Carik-Sutra Carik-mudha ||

Jilid 9 - Kaca : 70

20.
Lan pun Kidangwiracapa |
Wargasastra Arsèng-budi |
kawula ran Malarsipta |
kang tansah sapurug tunggil |
kang Rundaya rumiyin |
gadhah santri ran pun Bawuk |
angêsèd yèn dinuta |
ing mangke punapa têksih |
ngawirya tri asuka gambuh ing driya ||

533 Gambuh

1.
Sarêng dènnya gumuyu |
Ki Kulawirya latah amuwus |
jêbulane kang pêngulu Basarrodin |
kang putra samya gumuyu |
wuwuh tyasira cumêplong ||

2.
Ngawirya katrinipun |
sêkala samya pênganggêpipun |
asrêping tyas lir dhatêng (n)Jêng Kyai Bayi |
mring Ki Sinduraga ing hyun |
ambapa-bapa sayêktos ||

3.
Ki Kulawirya muwus |
botên nyana kêlamun kang Sindu |
yêkti mitranipun kakang (n)Jêng Kiyai |
acêtha mawi pun Bawuk |
inggih mêksih ambêgogok ||

4.
Mangke dados pêngulu |
mêngkoni sakèh ngibadahipun |
dhusun kang kêbawah rakanta (n)Jêng Kyai |
pan inggih sêwawratipun |
cukup tan susah rinaos ||

5.
Kinulit-daging tuhu |
tan beda lan sêdhêrêk sêdarum |
sinung aran pun pêngulu Basarodin |
èngêt (ng)gyannipun pitutur |
(n)Jêng Kyai tan wontên sèyos ||

6.
Malarsipta sang Sindu |
êngêt mèmpêr Malarsih bok-ayu |
ibunipun puniki anak mas kalih |
Sinduraga manthuk-manthuk |
karênan myat ing dhêdhayoh ||

7.
Ki Wirya malih muwus |
ing Lêmbuasta sintên kang Sindu |
namanipun lan dhusunipun ing pundi |
ngling inggih pnika wau |
Kidangwiracapa kang wong ||

8.
Akêndêl ing pakewuh |
ing prakara tinuduh glis rampung |
ingkang dadya wat-wate sakèhing santri |
mung Kidangwiracapèku |
priyangga ingkang pitados ||

9.
Nglêmbuasta puniku |
tanah ing Kalangbrèt dhusunipun |
Jayèngrêsmi anambung wuwusira ris |
Ki Wargasastra puniku |
ing pundi sananing dhukoh ||

Jilid 9 - Kaca : 71

10.
Ki Sinduraga matur |
inggih tunggil sami ngrikinipun |
tiyang Wêngkêr ingkang adhepok nèng ardi |
Padhangeyan pucakipun |
sing ngriki tan pati adoh ||

11.
Ing mangke namanipun |
pan anama Ke Sèk Sidalaku |
ginuron mring Pangeran Rangga Pranaragi |
bab sastra prama-kawèku |
kasujanan kang kinaot ||

12.
Kalêrêsan ing kalbu |
lulungiding trus sujana nung |
pratisthaning sastra bijaksanèng budi |
sudibya prawirèng wuwus |
wasis rampunging wiraos ||

13.
Langkung kulinanipun |
Pangeran Rangga sasêntananipun |
ingkang samya mêmasah ing prama-kawit |
kawi rêjaning sastra gung |
kasusilan utamèng don ||

14.
Jayèngrêsmi kayungyun |
myang kang rayi Jayèngraga nêngguh |
langkung rêsêp pitutur tumulya angling |
yèn parêng samya mêriku |
mring Padhangeyan patêmon ||

15.
Paman untapna laku |
Ki Sinduraga mèsêm umatur |
inggih sêlotipun pênêd benjing-enjing |
sarèh nèng ngriki sêdalu |
dèrèng marêm tyas-ngong anon ||

16.
Samya rèrèh ing kalbu |
sinambi dhêdharan anèng ngayun |
wus siyang Hyang Surya lingsir wancinèki |
pan amanjing wêktu Luhur |
Ki Sinduraga nabda lon ||

17.
Suwawi samya wêktu |
maring mêsjid sêdhêng salat Luhur |
tan antara sadaya prapta ing mêsjid |
sarêng ngambil toya wulu |
Nuripin gya adan gupoh ||

18.
Samya sunat sêdarum |
wusnya sunat kamat ngangkat parlu |
Sinduraga nyarakkên akèn ngimami |
ngawirya samya tan purun |
Sinduraga majêng gupoh ||

19.
Angimami ing ngayun |
wus antara bakda salatipun |
pragat pupujiyan dhikir donganèki |
sêsalamèn sunat rampung |
kasmaran nèng masjid manggon ||

Jilid 9 - Kaca : 72

534 Asmaradana

1.
Eca dènnira alinggih |
nèng masjid pucaking arga |
isis awangwang wangune |
Jayèngrêsmi angandika |
(ng)gih paman Sinduraga |
sintên kang yasa duk wau |
mêsjid ing Tajug punika ||

2.
Acèkli nèng pucak wukir |
wukir pupunthuk sêdhêngan |
kang wisma nèng gunung kabèh |
wêwah pênêda ngadesa |
Ki Sinduraga turnya |
kang karya tilas ing Tajug |
(ng)gih Kyagêng Tajug kang yasa ||

3.
Ngulama saking trah Giri |
nèng ngriki lajêng pruwita |
nging Kyagêng tan darbe tuwoh |
musabat kang kulawarga |
pinitaya rèh makam |
inggih luwure wong Tajug |
atangkar dadya sadesa ||

4.
Kula puniki nèng ngriki |
inggih mambêt brayat kadang |
katut wong tuwa kêtêmpoh |
kula kang tinuwa-tuwa |
kang wontên marsudia |
angalap raosing ngilmu |
srengat tarekat kakekat ||

5.
Makripat walhu-alami |
kadhang Jêng Pangeran Rangga |
asring tinimbalan ingong |
sihipun rahab ambapa |
andangu babing kitab |
Pangran Rangga tyas linuhung |
ngèlmu Jawa-Rab ginulang ||

6.
Priyayi gêng langkung lantip |
graitaning kaluhuran |
asih mring pêkir miskine |
mardikakakên ngulama |
nêtêpakên ngibadah |
kurmat ing agama Rasul |
mrih tangkar ngèlmi sarengat ||

7.
Jayèngrêsmi ngandika ris |
ngong tanya man Sinduraga |
mênggah ingagêsang mangke |
wêkasaning ing kasidan |
lantaran saking punapa |
kang liningan lon umatur |
sumanggèng kêrsa anakmas ||

8.
Paningaling kula ngriki |
kados sang bagus wus tama |
tan kalêmpit liring raos |
wus tan kenging sinarêman |
yèn mênggaha bêngawan |
sampun nyungab samodra gung |
kalaban nugrahaning Hyang ||

9.
Bisa mor tawa mring asin |
mangsa si tawa wangsula |
mring kali murih tawane |
kawistara raosing tyas |
sindhêt kaol kawula |
Jayèngrêsmi mèsêm muwus |
mindhak wèh têkabur mring wang ||

10.
Tiyang mêkatên tan kenging |
kathah mênthèking pêthèkan |
apês mupangat ing kaol |
kawula tanya pêsaja |
saking rumaos ngaral |
supaya indhaking kawruh |
rèhning ngam kêdah ihtiar ||

Jilid 9 - Kaca : 73

11.
Ki Sinduraga ngling aris |
ingkang kêpanggih tyas-kula |
babaring kasidan rêke |
wontên ing dalêm iktekat |
ingkang êkas ing salat |
tangat sunat lawan parlu |
panarikaning uliya ||

12.
Rêrambatan saking mukmin |
mukmin ngam kang bangsa riyah |
salate ngaral kemawon |
mêksih nganggo jamak kala |
lawan ingkang pinangan |
mêksih kalabêtan mêkruh |
punika mukmin bangsa ngam ||

13.
Inggihipun mukmin ngabid |
anucèkkên kang pinangan |
kang kalal makruh karame |
wong kang karya kathah-kathah |
nglampahi pêrlu sunat |
munggah mukmin salih nêngguh |
wong karya pakêrti tama ||

14.
Bênêr patut anglakoni |
wajib parlu lawan sunat |
sêdaya yèn wus kêlakon |
gya munggah mukmin jahada |
têgêse ahli tapa |
yèn wus kêlampahanipun |
ing wajib pêrlu lan sunat ||

15.
Nulya munggah mukmin salik |
têgêse wong kang lumampah |
dêdalan maring Hyang Manon |
pon wajib pêrlu lan sunat |
anulya malih minggah |
mukmin supi wastanipun |
wong kang wêning manahira ||

16.
Laku sunat pêrlu wajib |
minggah mukmin ngarip ika |
wong kang amandêng tingale |
marang ing Allah bêlaka |
pon wajib pêrlu sunat |
nulya malih minggahipun |
mukmin ngasik wastanira ||

17.
Wong kang brangti ing Hyang Widi |
kewala namung Pangeran |
ing Allah bêlaka dene |
wus tan mangro kanikmatan |
anulya inggahira |
mukmin mukib wastanipun |
muhung asih maring Allah ||

18.
Bêlaka datan upami |
sih-sinihan ing Hyang Suksma |
rambah ping sanga urute |
minggah aoliya Allah |
sèstu ingkang kinêrsan |
kula punika sang bagus |
sagêd miraos kewala ||

19.
Dèrèng sagêd anglampahi |
pan amung awirayatan |
yèn wontên ingkang kêcangkol |
Jèngrêsmi karênan ing tyas |
myarsa wirayatira |
Jèngrêsmi nauri wuwus |
pangkating mukmin punika ||

20.
Kados tan kenging kinardi |
kêdah kêlawan idayat |
yèn tan winahyu titahe |
tan kenging ingangas-angas |
nanging kêdah ihtiyar |
manawi parêng winahyu |
mungayan pra bangsa ngaral ||

Jilid 9 - Kaca : 74

21.
Ki Sinduraga nauri |
inggih nakmas kasinggihan |
ing sêmu sami kêraos |
tan susah winêdhar basa |
sami sampun muk-ulam |
sêdangunira Ki Sindu |
-raga pan sami karênan ||

22.
Têkèng wanci Ngasar iki |
dènnira sami rêrasan |
nulya Ki Sinduraga-ne |
angajak marang patirtan |
sêndhang kang binalumbang |
binotrawi lining banyu |
kêlangkung wêning toyanya ||

23.
Wusnya ngambil toyastuti |
samya salat wêktu Ngasar |
antara bakda pêrlune |
pêragat puji dhikirnya |
nulya asêsalaman |
tata malih dènnya lungguh |
Ki Sinduraga lingira ||

24.
Ngandika kantun alinggih |
kawula mantuk sakêdhap |
ngawirya sumangga ture |
sapraptanira ing wisma |
anuduh rabinira |
ngrakita suguh kang mungguh |
dhayohmu padha ngulama ||

25.
Kang èstri nauri inggih |
Ki Sindu mring pêkarangan |
angundhuh têtandurane |
ana tinuduh mring têgal |
miwah kinèn mèt ulam |
yata kang sami alungguh |
nèng masjid arêrasanan ||

26.
Jayèngrêsmi ngandika ris |
ora-orane wong tuwa |
mêtu pituture gambèn |
kênyamipun ngangkah-angkah |
gêlar sucining sarak |
urut-urute tinutur |
pangkat angkating mukmin kas ||

27.
Kang rayi umatur aris |
inggih paman Sinduraga |
kados yèn lamun ginuron |
eca pinikir wong tuwa |
tekat sarak utama |
mituhu sarengat Rasul |
dèrèng mèngèng saking kitab ||

28.
Ki Kulawirya nauri |
iya bênêr sojarira |
pêsaja kèh prasèndene |
bêrkate wong rada kuna |
akathah kawruhira |
patute rada mêdhukun |
kêtara prèjènganira ||

29.
Yata ing wanci wus Mahrib |
samya ngambil toya kadas |
Nuripin gya adan age |
asunat sêdayanira |
angamal pupujiyan |
samya ngêntyani Ki Sindu |
-raga gya prapta asunat ||

30.
Wusnya nulya dèn-kamati |
Jèngrêsmi kinèn dadi man |
majêng angangkat pêrlune |
antara Mahrib bakdanya |
laju manjing ing Isa |
Jèngrêsmi wêwacanipun |
dèn apti pasekatira ||

Jilid 9 - Kaca : 75

31.
Sawuse Patekah-nèki |
surat Jumungah awalnya |
surat Munapèk akire |
antara Ngisa abakda |
pêragat witira |
sawusnya ngaturan mudhun |
mring wisma angraras-driya ||

535 Mijil

1.
Sadaya wus mudhun saking masjid |
(n)dulur lampahnya lon |
praptèng wisma salu pinêrantèn |
ginêlaran kêlasa-lus putih |
wus samya alinggih |
tata anèng salu ||

2.
Sutanira kalih angladèni |
naosakên gembol |
saya mêsês bêsus andêlèrèng |
Ni Wasita Warsiti angliring |
siji sewang mêndir |
anancang pandulu ||

3.
Ni Wasita lan nimbok Warsiti |
sarêng mundur alon |
Ki Sinduraga nuduh siwine |
dhenok karo sira dèn-agêlis |
ladèkêna nini |
sêgamu sênanjung ||

4.
Lèhira ngliwêt sidhat apa wis |
wêtokêna dhenok |
ni rara ro mêndhak mèsêm ture |
lumaku ting garubyug kang tapih |
lampahira ririh |
mipit magêr-timun ||

5.
Usap susur tangane kang siji |
ngrêmêt-ngrêmêt suroh |
praptèng wisma wingking nuduh age |
mring baturirèstri angladèni |
wus samêkta sami |
gya ingirit mêtu ||

6.
Biyungira lêgèh anèng ngarsi |
sutanira karo |
nampa kêndhi patula cêcêpe |
kang nèng wuri sêga pulên putih |
anèng panjang lintrik |
kêlawan bubucu ||

7.
Liwêt sidhat mêncir gajih biri |
kinyih-kinyih tinon |
kadya kêna pinêrês lêngane |
myang rampadan nèng dhulang tup sari |
ulamnya mawarni |
wus sumadyèng ngayun ||

8.
Ni Wasita kêlawan Warsiti |
tata rampadan lon |
lam-ulaman ngandhèrkên rasane |
opor bèbèk lawan bêsngèk pitik |
anjenan lumungsir |
age pal-puk duduh ||

Jilid 9 - Kaca : 76

9.
Srêgan babad limpa lawan ati |
dhèndhèng-ragi abon |
sambêl miri rajangan lalabe |
ayêm tuwa pinêdhês rinawis |
ing jruk pêcêl kulit |
rêmpah lan kêrupuk ||

10.
Ni Warsiti dènnira ngladèni |
siduwa anjongok |
kawistara salêkok lêkêre |
Jayèngraga tyase ragi mikir |
watuk ngampêt ririh |
ni rara kumênyut ||

11.
Têrataban tyase sênag-sênig |
lêngên andhêrodhog |
amaruntus kringêtên githoke |
ngêlêd-êlêd idu gondhang salit |
sora napasnèki |
ngorong mêtu ngirung ||

12.
Ingangsêgên piring gumalêthik |
gêmpil prêl kêtanggor |
biyangnya ngling (m)bok dèn-alon bae |
Ni Warsiti angacêmut isin |
wus tata mundur ris |
Ki Sindu umatur ||

13.
Sumangga paduka samya wanting |
krana Lah kemawon |
nuwun maklum sawontên-wontêne |
kang ingancaran samya wiwijik |
sarya ngling lah bibi |
wasisan akêmbul ||

14.
Nyai Sindu nuwun aturnèki |
Ki Sindu nglingnya lon |
kajêngipun kewala ing mangke |
adan lêkas dènnya samya bukti |
suka rênèng galih |
anadhah pikantuk ||

15.
Ayêm tuwa kang samya kinapti |
malah lali lawoh |
amung ayêm mênjangane bae |
Jayèngraga nyarub mêratani |
adhokoh tan wigih |
kaecan anutug ||

16.
Aluwaran wus samya wêwanting |
ambêng gya linorod |
mring Nuripin kinepan kabèhe |
kadhuwêtan dènnira nguculi |
sabukanirèki |
kinêndhon rumuhun ||

17.
Ambêgêgêg saguh dènnya linggih |
pêmangane cekoh |
pupuk gêng mangap mele ilate |
mata mablak kêlip angêdhapi |
dhêluk uga tangi |
tumênga tumungkul ||

18.
Ki Kulawirya gumuyu angling |
Ripin lè(h) ambadhog |
kathik mele mangap lan matane |
sabên muluk bokong nganggo njondhil |
lir endha binandhil |
tandhane aibut ||

19.
Wusnya têtêbah ingkang ngladèni |
nyamikan sinaos |
woh-wohan nyang olah-olahane |
Ki Sinduraga angancarani |
suwawi won kèksi |
tinadhah ingriku ||

Jilid 9 - Kaca : 77

20.
Samya nyamik sasênêngirèki |
sinambi miraos |
Sinduraga atutur waune |
kala nème ramanta duk nguni |
tirakatan sami |
mring ardi Sêmèru ||

21.
Anèng guwa Dhasar pitung ari |
siyam angêlowong |
wong nêm samya ambungkah pasane |
namung ramanta kuwat pribadi |
nglowong pati-gêni |
bêtah pitung dalu ||

22.
Nèng sajroning guwa Dhasar wingit |
kaidayat kaot |
mas Rundaya nèng riku angsale |
wahyu-tama nèng Sêmèru wukir |
baya wus pinasthi |
dadine ngaluhung ||

23.
Jèngrêsmi lan kang rayi Jèngragi |
Ki Kulawirya non |
samya ngungun karênan pajare |
Sinduraga ngundang siwi kalih |
prapta kang dèn-sèngi |
pra samya nèng ngayun ||

24.
Ngling punika rayinta samyèstri |
ywa wigih pangangkoh |
wajib manjing sêdulur yêktine |
kang liningan amangsuli inggih |
kêlangkung utami |
sami ngawu-ngawu ||

25.
Jayèngraga angling jroning galih |
o ah kang mêngkono |
dene gêla têmên tyas ngong mangke |
kurang thithik bae mêngko lingsir |
ing wêngi amêsthi |
karone kêbrawuk ||

26.
Têka dèn-srahakên ing atunggil |
cuwa têmên ingong |
tan prabeda ni rara batine |
kogêl sinêdulurkên ing tami |
liyan têmah dadi |
asanak sêdulur ||

27.
Yata Sinduraga ngling mring siwi |
lah rara dèn-gupoh |
pundhutên ge trêbangku si Garèng |
padha slawatan dhèwèkan sami |
lan kakangirèki |
lèk-lèkan wong nganggur ||

28.
Ni Warsiti gupuh dènnya ngambil |
tarêbang sawiyos |
prapta ingaturkên tarêbange |
wawi anakmas gêgêntènan singir |
lan gêntyan nêrbangi |
kula lan nak bagus ||

29.
Kang sinung ling samya anglêgani |
rumahab ing pakon |
nulya sinêntak wau trêbange |
ginêmbrang kumrampyang têrbangnèki |
Ki Sindu ngling aris |
mring ro anakingsun ||

30.
Miluwa ambyong sauran singir |
ngarah apa dhenok |
lah wong lawan kakangira dhewe |
tan ana lyan aja wigah-wigih |
suta ro ngèsêmi |
tan lêngganèng kayun ||

Jilid 9 - Kaca : 78

31.
Nulya abawa kataman Nabi |
Rasululloh rêko |
kataman Nabi iya Muhamade |
ngajam Ngarbi wa Rasulullahi |
kataman nabiyi |
swarane Ki Sindu ||

32.
Mèmpêr swarane Ki Bayi |
karêkêling ulon |
datan pati asora swarane |
grathul-grathul magak angunani |
mulut rêmên manis |
êmpuk ngêntal-êntul ||

33.
Sinauran kapat Ki Nuripin |
kanêm ni rara ro |
rêmpêg asring tan srênti sajake |
lir saron barung dèn-panêrusi |
raras anyundari |
ngalêp nganyut-anyut ||

34.
Singir pakam-lahu pi-ayatin |
mashuratin rêko |
nasal kitabu bi hagadane |
mashura lajêng bawa nampèni |
swara rum jalwèstri |
asari rinungu ||

35.
Wong kang cêlak-cêlak samya tangi |
mêriku anonton |
ting gêrobyak mêngakkên-lawange |
tarap nèng jogan dènnya ningali |
Ki Sindu akapti |
slawatan lan tamu ||

36.
Sinduraga panrêbangirèki |
lêlamban kemawon |
pangiwane ngêpipir kêmpyange |
têtampèlan lan gêmbrungirèki |
gagliwangan goling |
pinangku ing dhêngkul ||

37.
Dèn-ngêr-ingêr têrbange dèn-lingling |
sinru uga alon |
manut lagon sangêt lan lirihe |
mêksih labêting baut kêtawis |
ping pêk tong gring tong ting |
pong bêng pong bêng pong brung ||

38.
Langkung rahab tamunira sami |
bantu dènnyambyong |
samya micarèng jro wêrdayane |
dene swara mèmpêr sadayèki |
kêlawan jêng kyai |
layak tunggal guru ||

39.
Wus antara nutug dènnya singir |
tamat suwuk alon |
maca sêlawat sêsaurane |
Jayèngrêsmi nulya maca rawi |
kir-ate patitis |
swara manis arum ||

536 Dhandhanggula

1.
Sinduraga ngalêm jroning ati |
myarsa dènnira maca ruwiya |
tan nilip kandêl tipise |
ngling sumangga nak bagus |
asêsambèn angaring-aring |
dhahara nyênyamikan |
sapikantukipun |
yèn wus aso gêgêntènan |
anarêbang ingriku aganti-ganti |
kawula yun uninga ||

Jilid 9 - Kaca : 79

2.
Kang liningan samya anginggihi |
sarwi sêsambèn dhahar nyamikan |
royoman kêmbulan bae |
suta ro sinadulur |
(n)dulurakên marang têtami |
samya rahab nyamikan |
Ni Warsiti lamun |
mangan sinambi liringan |
lan Jèngraga sisinglon iriban liring |
samur nyakot panganan ||

3.
Ingkêmira ngiras angèsêmi |
Jayèngraga angling jroning nala |
gampang mana bocah kuwe |
kaya untu mèh runtuh |
tênagane wus gowal-gawil |
sêmangsa ginêpoka |
ngatut lir dinudut |
wusnya aso sawêtara |
Sinduraga ngulungkên têrbangirèki |
mring Jayèngrêsmi sigra ||

4.
Wawi anakmas andika singir |
kang liningan anampani têrbang |
nulya maca sêlawate |
sajak Yaman Allahu |
Allahu Allahu ya rabi |
Muhamad Rasullulah |
sinauran barung |
têrbange tiniru lamban |
singir ngêlik tanakaltu biaslapi |
arbadi sahodadya ||

5.
Kadas sampung pingli abrahatin |
tanakalu mêntul swaranira |
mêksih dèn-unthêt ulone |
ulêm angglêndêm êmpuk |
Ni Wasita sat-ingsêt linggih |
apasang-pasang tingal |
tan kêsamèng dulu |
tyase iya uga ora |
Ni Warsiti olèh paguting pangèksi |
asêsangkutan ulat ||

6.
Lamun ngêlik iriban mêndêlik |
elok lèjême nora kêjamak |
galak anglarak lirihe |
ting kadhuwêt pikantuk |
bapane wus wruhing pangèksi |
inguja jêjawatan |
juwêtan rinêngu |
mêngkana sadangunira |
dènnya samya rahab sêlawatan singir |
gantya-gantya narêbang ||

7.
Lamun Jayèngraga nrêbang singir |
Ni Warsiti tambuh solahira |
angêtarani pamrihe |
saking kadrênging wuyung |
yèn ta sampun sompok kèh mèksi |
kaya nubruk-nubruka |
anglêthuk angrêmus |
mring baguse Jayèngraga |
ingkang dhe-gus alus bêsus mêsês sigid |
gut-gutên ni-mbok lara ||