Ki-demang.com : Kongres Bahasa Jawa 5

Ngulir  Budi  -  Nata Pakarti Ana Ing Ranah Birokrasi
Dening : Ki Sutadi
Pangarsa Persatuan Pedalangan Indonesia (PEPADI)
Provinsi Jawa Tengah

Abstrak

Wektu iki akeh tinemu anane prekara ing ranah birokrasi Negara.  Ana swasana anget ing lingkungan birokrasi Negara ana ing babagan pulitik. Komunikasi pulitik antarane bebadan luhur nagara (DPR), bebadan Yudikatif (KPK), lan bebadan Eksekutif karasa anget, malah ana sing panas. Menawa kahanane kedawa-dawa bisa nglairake prekara werna-werna. Laku jantraning nagara bisa kedayan panase hawa nepsu pulitik. Ana ranah pulitik, kriwikan bisa dadi grojogan. Ayahan pemerintahan lan pembangunan bisa rendhet utawa ruwet amarga anane ‘ruhara’ pulitik. Karana iku para pangarsa nagara, lan kabeh para pangarsa praja, prelu hangulir budi nata pakarti, hangudi supaya duweni kawicaksanan (wisdom) kanggo nanggapi lan ngudhari prekara. Watak arif lan wicaksana prelu dibudidaya kanggo ngudhari prekara bangsa lan nagara. Nyambung karo babagan iki, ana ing basa lan sastra Jawa akeh tinemu kearifan budaya arupa piwulang lan pitutur luhur. Saperangan bebrayan ana sing ngugemi menawa piwulang kautaman utawa pitutur luhur prelu dadi pandam pandoming dumadi. Piwulang lan pitutur luhur bisa dadi gujengan supaya kahanan dadi luwih apik, becik, ayem, tentrem, raharja lan kuncara. Kridhaning watak utama bisa dadi sarana hambangun nagara. Kanggo nanggapi campur-adhuke prekara nagara, ana ing babagan pulitik, hukum, ekonomi, pendidikan lan sosial budaya, prelu ana ayahan handhudhah piwulang kautaman lan pitutur luhur ana ing basa lan sastra Jawa. Piwulang kautaman lan pitutur luhur prelu malebu lan manjing ana ing birokrasi negara. Kanggo nanggulangi kahanan wektu iki, kabeh elemen bangsa bebarengan karo birokrasi nagara prelu ngulir budi ngetog daya karosaning nalar. Kekuwataning nalar lan budi prelu dipersudi supaya bisa nglairake pakarti utama lan watak wicaksana. Adikarya ‘ngulir budi nata pakarti’ prelu dadi ayahan wigati ana  ing ranah birokrasi. 

Darmaning Abdi Nagara        

Abdi negara ana ing jagad pewayangan diwujudake ana ing ulah kridhaning satriya utama anggone padha leladi lan ngabdi marang nagara. Satriya dadi paraga minangka carakaning nagara. Ulah kridhane satriya banjur nuwuhake darmaning satriya marang nagara. Lelabuhane para satriya ana ing ranah nagara ora winates madeg senopati ana ing palagan, nanging jembar tebane. Ngukup lan nyakup perangan kang maneka warna, yaiku: babagan laku jantraning nagara, kawicaksaning nagara, nata paugeraning nagara, pangu-wasane nagara, mikirake kawulaning nagara, lan liya-liyane. Karana iku, ulah-kridhane satriya ana ing pewayangan, jembar tumeka ing ranah kang maneka warna. Gumelare watak satriya banjur mbabar darma, lelabuhan, ayahan, lan pakurmatan kanggo para Dewa lan Ratu (Gustine), para brahmana utawa pandhita, kuncaraning nagara, adil makmur lan karaharjane para kawula; mligine kang lagi nandhang papa lan kasangsaya. Darmaning satriya banjur nyawiji utawa manunggal ana ing ayahan nagara.

Babagan nagara ana ing janturan ki dalang, sesambungan karo kahanan nagara kang panjang-punjung, pasir-wukir, loh-jinawi, gemah-ripah, tata-karta tur raharja. Panjang dawa pocapane, punjung luhur kawibawane. Ana ing susastra pedhalangan uga dipocap-ake manawa ayahan nagara prelu ’weh boga marang kang kaluwen, weh sandhang marang kang kawudan, weh teken marang pawongan kang kalunyon’. Kajaba saka iku dicaritakake menawa para mantri bupati sapanekare wicaksana, limpad ing kawruh, lan tansah hangudi raharjaning praja. Gumelare watak satriya ana pewayangan linambaran watak darmaning satriya kanggo nagara. Kridhaning watak satriya ana ing pakeliran, ora kabeh bisa dicakake ana ing ranah birokrasi sawise ana reformasi. Saperangan pancen bisa dadi tuladha utawa kaca brenggala. Ananging ana perangan kang angel dicakake. Sawijining perangan kang gampang disinau, dingerteni, lan dikandhakake, nanging ora gampang dicakake  ana era reformasi lan transisi demokrasi wektu iki.
Paraga satriya ing wektu iki nyakup kabeh paraga kang lagi ngemban lan ngembat praja. Bisa sinebut abdi praja lan abdi nagara, utawa kabeh paraga kang ana ing birokrasi nagara. Ana sing ngabdi ing bebadan eksekutif, legislatif, lan yudikatif. Kabeh padha ngayahi tugas lan kuwajiban kanggo mujudake kahanan masyarakat supaya luwih maju, adil, makmur lan sejahtera. Sesanti ’jer basuki mawa beya’ dadi dhasar kanggo kabeh ayahan mbangun bangsa lan nagara. Kridhaning birokrasi negara ora/durung wewaton filosofi ’darma’ ana ing buku Vedanta, kang luwih nengenake watak sejati, yaiku ngabdi lan  leladi kanggo nagara. Ayahan darma awewaton Vedanta, adoh saka watak rame ing pamrih, nanging luwih nengenake watak sepi ing pamrih.
Mindeng lan njingglengi buku Vedanta, tinemu watak lan candraning jaman kang wus lumaku atusan lan ewonan taun. Watak manungsa ing jaman kawuri, padha ngugemi lan ngrungkebi pakarti utama, yaiku darma kanggo kawulaning nagara. Bebarengan karo lumakune jaman, watak darma salin kahanan nglairake watak ’adarma’. Watak adarma ngrembaka amarga ubaling hawa nepsu sing sinebut pamrih. Karana iku, unen-unen ’sepi ing pamrih’, banjur owah dadi ’rame ing pamrih’. Watak sepi ing pamrih rame ing gawe, gumanti dadi watak rame ing pamrih, nanging sepi ing leladi. Adhedhasar referensi buku Vedanta, ulah kridhaning  birokrasi nagara, tinemu ora sithik abdi nagara padha lali lan uwal saka watak pakarti utama. Kuwajiban lan ayahan arupa darma, salin rupa malih wujud dadi pamrih. Watak rame ing pamrih karasa ngrembaka ana ing birokrasi nagara. Tinemu akeh para abdi praja lan abdi negara padha ’koncatan’ pakarti luhur lan watak utama. Watak nistha karasa ngrembaka, tumuli akeh sing padha kejiret prekara. Sesanti ’Mamayu Hayuning Bawana’, ’Mamayu Hayuning Nusa Bangsa’, lan ’Mamayu Hayuning Sarira’ ora disinau, lan dingerteni surasane. Surasa lan filosofi ana ing sesanti kasebut, dianggep kuna amarga lair saka ranah Jawa. Pemandeng adhedhasar wulangan Jawa dianggep kuna, feodal, ora modern lan ketinggalan jaman. Karana iku, para pangarsaning nagara luwih nengenake piwulang kepemimpinan (leadership) saka mancanegara; amarga dianggep luwih rasional, ilmiyah, maju lan canggih. Piwulang lan pitutur luhur sing ana ing basa lan sastra Jawa dikiwakake lan dilalekake. Wektu iki ana tengara (fenomena), menawa piwulang  kautaman lan pitutur luhur wus kesingkir lan kesingkur.

Mbangun Praja - Mbangun Bangsa - Mbangun Nagara

Babagan praja tebane jembar banget amarga sesambungan karo bab negara lan pamarentahan. Ulah kaprajan nyakup laku jantraning negara lan pamarentahan. Babagan ngatur nagara lan pamarentahan dianggep wigati wiwit anane kraton, penjajahan walanda tumeka jaman transisi demokrasi wektu iki. Kadhang kala, praja uga ditegesi kraton, negara, nusa lan bangsa. Karana iku  praja duweni teges padha karo kraton utawa negara. Mula ana wulangan lan welingan: “sing  bisa njaga praja, sing bisa njaga nusa lan bangsa”. Ana ing bebrayan lumrah dadi kaprah, tembung praja diungkret dadi cilik tebane. Mula ana tembung prajane wanita, prajane priya, prajane korps, kesatuan lan liya-liyane.
Babagan praja ana sambung rakete  karo paugeran utawa pranatan praja supaya lumakune kaprajan luwih tumata. Praja ditata nganggo pranatan lan tatanan. Bab kaprajan wis lumaku atusan taun, wiwit jaman kuno tekan saiki. Kejaba saka kuwi, gumelare ulah kaprajan tinulis ana ing manuscript lan naskah-naskah kuno, kayata: Pararaton lan Nagarakertagama. Awewaton naskah-naskah kuno kasebut, Prof. Dr. Slamet Muljana nulis buku ‘Pemugaran Persada Sejarah Leluhur Majapahit’ lan ‘Perundang-undangan Maja-pahit’.  Prof. Mohammad Yamin uga nulis buku ngenani ‘Tatanegara Majapahit’. Napak tilas saka buku-buku kasebut akeh banget bab sing bisa dadi sumber informasi apadene referensi  ing babagan tata gelaring  ayahan  mbangun praja, mbangun bangsa lan nagara.
Lelandhesan karo bab-bab kasebut, ora mung tembung (istilah) sing tinemu ana ing kaprajan jaman Majapahit nanging uga bab-bab sing magepokan karo teori, konsep, struktur birokrasi, sesanti, prinsip-prinsip dhasar (grund norm), kawicaksanan, filosofi pemerintahan lan liya-liyane. Wewaton naskah-naskah kuna, ana welingan sing prayoga dadi tetimbangan ana ing ulah kaprajan wektu iki, yaiku: sinau lan nyinau  teks,  nanging kudu  nggatekake  karo  konteks  swasana  lan  kahanan ing  wektu iku. 
Ing babagan kaprajan, rikala jaman penjajahan walanda ana tembung pangreh praja. Para punggawa, nayaka praja wektu iku ngayahi pakaryan sing ajeg mrentah utawa ngereh marang  kawulane, ngereh marang rakyate. Sawuse mardika dadi Pamong Praja supaya bisa ngatur praja, nentremake praja kanggo karaharjaning kawula. Ana ing kene, sing luwih wigati yakuwi hangudi murih raharjaning masyarakat, bangsa lan nagara. Para pangemban pangembating praja prelu jumangkah mujudake  pangarsa praja lan pangarsa nagara sing profesional, mursit, santosa ing budi, lantip ing panggraita, mumpuni, lan trampil ana ing ulah kaprajan lan kabangsan. Para pangarsaning nagara kudu bisa njaga kawibawane, sentosa iman lan bebudene, jujur, resik lan duweni harkat lan martabat sing luhur. Ana ing ulah kaprajan, ana wulangan tumrap para pangarsaning nagara, supaya padha tansah njaga praja, sing nyakup njaga prajane eksekutif, njaga prajane legislatif, lan nyaga prajane yudikatif.  Para kawula duweni pengarep-arep supaya padha nindakake ulah kabangsan lan ulah kaprajan sing utama, nyingkiri lan adoh saka tumindak nistha. Laku jantraning nagara prelu ditata kanthi premati, supaya bisa lan kasil mujudake kahanan bangsa  sing  luwih ayem, tentrem, adil, makmur, lan sejahtera.

Kridhaning bebadan eksekutif, legislatif, lan yudikatif prelu lumaku wewaton nilai- nilai luhur lan kearifan budaya kang ana ing bumi Nuswantara. Akeh banget nilai-nilai luhur sing bisa didayakake kanggo mbangun bangsa lan nagara. Gumelare konsep Tri Praja ana ing ranah eksekutif, legislatif lan yudikatif  perlu dievaluasi, ditata, dirumpaka, lan disem-purnakake supaya bisa mujudake  tujuan luhur  nagara adhedhesar UUD Taun 1945. Ana ‘amanah’ lan wulangan kang kasebut ana Penjelasan UUD Tahun 1945 sing asli, prelu dipindeng, dihayati, lan dingerteni maneh. Nyambung karo babagan iki, ditandhesake menawa, kanggo mbangun bangsa lan negara, ana babagan wigati sing prelu ditengen-ake, yaiku semangat  para  pangarsa negara lan para pangarsa pemerintahan. Surasane, ngelingake  tumrap  sapa wae  supaya  duweni watak lan semangat konsisten  adhedhasar apa sing tinulis ana ing konstitusi. Menawa tinulis prelune duweni watak kekeluargaan, kudu diugemi lan dirungkebi. Aja malah ngumbar  watak perseorangan (individualis).

Dumadine  Gerakan  Reformasi

Mindeng lumakune bangsa lan negara tekan wektu iki ora bisa dipisahake karo ayahan mbangun bangsa lan negara sadurunge ana reformasi. Ayahan pemerintahan lan pembangunan ana ing era orde lama, lan orde baru prayoga dadi pengalaman sing wigati. Reroncening ‘prastawa’ ana ing sujarah pemerintahan sing wis lumaku, bisa dadi  sarana kanggo mindeng kahanan kang bakal tumeka. Strategi lan kawicaksanan pembangunan ing wektu-wektu iku prelu ditaliti utawa  di-studi.
Pengalaman mbangun Negara ana ing era orde lama lan orde baru ora kabeh cacat, lan sarwa nguciwani, nanging uga ana perangan sing apik lan duweni keluwihan. Ana ing jaman orde lama, pembangunan watak lan karakter bangsa (nation and character buiding) ora dilalekake. Tekad lan semangat berdiri di atas kaki sendiri (berdikari), berdaulat di bidang politik, lan berkepribadian di bidang kebudayaan dipersudi lan diayahi. Sabanjure ana ing era orde baru, dicakake strategi  Trilogi Pembangunan, yaiku: ‘stabiltas, pertumbuhan, lan pemerataan’. Sawise lumaku sawetara wektu, disempurnakake dadi pertumbuhan, pemerataan lan stabilitas ana ing babagan apa wae. Pembangunan ekonomi luwih diprioritasake ketimbang pembangunan sosial budaya. Ana ing wektu iku akeh kritik  supaya  orientasi  pembangunan luwih  nengenake  pemerataan  ketimbang  pertumbuhan.
Kebijaksanan kang sinebut Delapan Jalur Pemerataan wiwit dibiwarakake, milgine ing sektor pendidikan, kesehatan, kesejahteraan sosial, keluarga berencana, lan liya-liyane. Kabeh ayahan pembangunan dituntun ana ing Garis-garis Besar Haluan Negara (GBHN) lan banjur kapacak ana ing  rencana  Pembangunan  Lima  Tahun (REPELITA).  Sabanjure, ayahan pembangunan ana ing era orde baru dikukuhake minangka implementasi sila-sila ana ing Pancasila. Pembangunan dikukuhake minangka pengamalan Pancasila. Prelu diakoni menawa ayahan pembangunan ana ing era wektu iku tinemu ana kekurangane. Ora kabeh pangarsa negara lan pangarsa praja resik, tinemu anane korupsi, kolusi lan nepotisme (KKN). Pembangunan adhedhasar tuntunan saka ndhuwur (top down) luwih ditengenake,  ketimbang  nggatekake  aspirasi  saka ngisor (bottom up).

Bebarengan karo lumakune  pemerintahan udakara telung puluh loro taun suwene, ana kanyatan yaiku perekonomian Indonesia sing ringkih. Kawicaksanaan  ing babagan ‘nilai tukar’ rupiyah sing kaiket karo dhuwit dolar Amerika, banjur nuwuhake dhampak, yaiku mundhake  utang luar negeri. Situasi ekonomi ringkih lan ora stabil. Kahanan iki banjur nglairake krisis moneter ana ing taun 1997. Krisis moneter duweni efek sampingan, banjur nglairake krisis ekonomi. Kahanan krisis ekonomi mrembet lan kasil mbukak akehing kelemahan/ kekurangan pemerintahan era orde baru. Gerakan reformasi kang lair ana ing taun 1998 nggugah semangat perubahan. Reformasi ngusung owah-awahan gedhe ana ing babagan pulitik lan gumelare pemerintahan tataran nasional tumeka ing daerah-daerah. Ringkese, kepengin ngganti tatanan, pranatan pemerintahan lan pangarsa negara  sing  sipate  status quo  lan  wus  lumaku  telung  puluh  loro  taun  lawase.
Ana ing wektu kang cepet, bisa ngleksanakake pemilihan umum (PEMILU)  ing tanggal 7 Juni 1999.  Panyarta Pemilu taun 1999 ana 48 (patang puluh wolu) parte pulitik. Wewaton asill Pemilu 1999, ana 5 (lima) parte sing unggul suarane, yaiku: Partai Demokrasi Indonesia Perjuangan (PDIP), Partai Golkar, Partai Persatuan Pembangunan (PPP), Partai Kebangkitan Bangsa (PKB), lan Partai Amanat Nasional. Pemilu sing diadani  ana ing taun 1999, winates kanggo milih anggota MPR, DPR, lan DPRD. Sawise Pemilu 1999, ana ayahan gedhe yaiku ndhapuk MPR. Tinemu akeh  Ketetapan MPR sing diasil-ake. Ing kene ana babagan wigati, yaiku ayahan ngamandhemen UUD 1945. Saperangan pasal-pasal ana ing UUD 1945 diowahi wewaton spirit  reformasi. Sabanjure ana ing taun 1998, kasil ditetepake TAP MPR Nomor X/MPR/1998 ngenani Pokok-pokok Reformasi Pembangunan Dalam Rangka Penyelamatan dan Normalisasi Kehidupan Nasional. Reformasi ngusung ayahan lan owah-owahan gedhe ing babagan tatanan, pranatan, lan laku jantraning negara.

Kahanan Bangsa lan Nagara Sawise Reformasi

Reformasi sing wus lumaku telulas taun, kasil ngowahi lan ngobahake  kahanan bangsa lan nagara. UUD 1945 di-amandemen rambah kaping papat. Karana iku, laku jantraning  negara  ngalami  owah-owahan gedhe sing banjur rumit lan daya-pengaruhe ngedab-edabi. Reformasi ana ing ranah hukum lan perundang-undangan dadi  underaning ayahan wewaton UUD 1945  sing wola-wali di-amandhemen. Nyambung karo babagan iki, ana  perangan  sing  wigati  banget,  yaiku:  prekara suksesi  kepemimpinan negara sacara pilihan langsung, owah-owahan birokrasi negara, lan Pemilu Kepala Daerah (PEMILUKADA) wiwit tataran Provinsi, tumeka tataran Kabupaten lan Kutha kanthi langsung. Babagan wigati  kasebut, daya pengaruhe gedhe tumrap laku  jantraning  negara, lan banjur handa-yani ayahan mbangun  negara lan mbangun  praja, ana ing saindenging  bumi nuswantara.  Akeh banget  prekara  (problem)  sing nggubel ana ing  ranah  birokrasi  negara  wektu  iki.
Kejaba saka iku, ana ing daerah-daerah, amarga anane pemilukada langsung tumrap Gubernur, Bupati, lan Walikota, banjur nglairake prekara maneka warna. Ayahan mbangun bangsa, mbangun Negara, lan mbangun  praja  ana ing  bumi pertiwi iki, dadi angel  lan rumit.  Isme, faham, nilai-nilai demokrasi, lan Hak-hak Asasi Manusia (HAM)  sing  manjing ana ing UUD 1945, dadi  ‘sabab’  sing njalari akehing prekara ana ing ayahan mbangun bangsa  lan  mbangun Negara. Reformasi  konstitusi  sing  lumaku suwene telulas taun, ora bisa  ninggalake konfigurasi  pulitik  ana  ing DPR.  Babagan  hukum  ana  ing ranah  biro-krasi negara, ora bisa  dipisahake karo ulah kridhaning para elit pulitik ana ing DPR. Karana iku, prekara hukum banjur ‘tabrakan’ karo kepentingan (interest) pulitik. Aspirasi  lan interes  pulitik  banjur malebu  lan ndayani  prekara  ana  ing  ranah  penegakan hukum.      
Sawise reformasi lumaku adhedhasar amandemen UUD 1945, ana owah-owahan gedhe  ing ranah birokrasi negara.  Ana ing wektu iki tinemu 34 bebadan negara lan 28 bebadan sing duweni kewenangan adhedhasar UUD 1945.  Bebadan luhur utawa Lem-baga Tinggi Negara, nglimputi:

a. Presiden dan Wakil Presiden; 

b. Dewan Perwakilan Rakyat (DPR);

c. Dewan Perwakilan Daerah (DPD);

d. Majelis Permusyawaratan Rakyat (MPR);

e. Mahkamah Konstitusi (MK);

f. Mahkamah Agung (MA); lan

g. Badan Pemeriksa Keuangan (BPK).

Kejaba saka iku uga didhapuk bebadan lan Komisi Negara sing asipat  independen,  yaiku nglimputi:  

a. Komisi Yudisial (KY);

b. Bank Indonesia (BI);

c. Tentara Nasional Indonesia (TNI)

d. Kepolisian Negara Republik Indonesia (POLRI);

e. Komisi Pemilihan Umum (KPU);

f. Kejaksaan Agung;

g. Komisi Pemberantasan Korupsi (KPK); lan 

h. Komisi Nasional Hak Asasi Manusia (KOMNAS HAM).

Ana maneh bebadan Negara sing didhapuk adhdhasar Undang Undang, yaiku:

a. Pusat Pelaporan dan Ana-lisis Transaksi Keuangngan (PPATK);

b. Komisi Pengawas Persaingan Usaha (KPPU); lan

c. Komisi Penyiaran Indonesia (KPI);

Bebadan lan komisi-komisi  ana  ing  lingkungan  eksekutif (pemerintah), nglimputi:

a. Komisi  Kedokteran  Indonesia (KKI);

b. Komisi  Pendidikan  Nasional;

c. Dewan Pertahanan Nasional;

d. Lembaga Pertahanan Nasional (Lemhannas);

e. Lembaga Ilmu Pengetahuan Indonesia  (LIPI); 

f. Badan  Pengkajian dan Penerapan Teknologi (BPPT);

g. Badan Pertanahan Nasional (BPN);

h. Badan Kepegawaian Nasional (BKN);

i. Lemba Administrasi Negara (LAN); 

j. Lembaga Informasi Nasional (LIN).

Bebadan liyane ana ing ranah eksekutif,  yaiku :

a. Menteri lan  Kementerian  Negara; 

b. Dewan  Pertimbangan Presiden;

c. Komisi Hukum Nasional (KHN);

d. Komisi Ombudsman Nasional (KON); 

e. Komisi  Kepolisian;  lan

f. Komisi  Kejaksaan.

Isih akeh bebadan lan komisi sing wus kadhapuk ana ing era reformasi  wektu iki, wewaton Undang-undang kang wus dirembug lan diputusake antarane eksekutif  lan legislatif.
Tatanan lan pranatan birokrasi negara, mligine sawise pemilihan Presiden, kadhang kala ngalami owah-owahan ing babagan struktur organisasi lan penataan personil. Menawa dibandhingake karo struktur birokrasi ana ing era orde baru, karasa luwih rowa lan ngge-dhabyah. Sesanti lan surasa ‘miskin struktur kaya fungsi’ ora diugemi. Karana iku banjur mbutuhake undhaking redhana trilyunan rupiyah saka APBN/APBD. Struktur birokrasi  kang  nggedabyah  nuwuhake  kahanan  rumit  ana ing fungsi koordinasi. Kridhaning  ayahan  mranata  organisasi  ana ing daerah, uga dileksanakake wewaton  UU  Nomor 22 Tahun 1999  sing banjur diamandemen dadi UU Nomer 32 Tahun 2004, ngenani Pemerintahan Daerah. Kawentare  ana  ing  masyarakat  sinebut  UU Otonomi Daerah.

Penataan organisasi  diayati ana Provinsi, Kabupaten, lan Kutha, wewaton Peraturan Pemerintah (PP) Nomor 38 Tahun 2007 ngenani Kewenangan Pemerintah, Kewenangan Provinsi, Kabupaten lan Kota. Adhedhasar PP kasebut, banjur ndhapuk organisasi  Sekretariat Daerah, Badan, Dinas, lan Kantor-kantor. Satuan Kerja Pemerintah Daerah (SKPD) didhapuk ana ing Provinsi tumeka ing Kabupaten lan Kutha. Sawise  mranata organisasi banjur dianakake penataan personil. Penataan personil ana ing Provinsi, Kabupaten lan kutha  bisa  wola-wali,  amarga  gumantine  Gubernur,  Bupati, lan Walikota  sawise  pinilih  ana  ing  pemilukada.           
Ana ing babagan penataan personil, kadhang kala ditindakake sacara gedhen-gedhenan, jumbuh karo swasana pulitik wektu iku, amarga akeh Gubernur, Bupati, lan Walikota pinilih, di usung dening parte-parte pulitik. Birokrasi ana tataran daerah akeh sing kadayan aroma pulitik. Ciri-ciri lan watak birokrasi  sing kudune netral angel dicakake.  Spirit reformasi, yaiku prelune kinerja  birokrasi  sing luwih wibawa, resik, akuntabel, efisien lan efektif kurang bisa diwujudake. Perilaku boros wis dadi budaya ana ing ranah birokrasi. Sawise reformasi, tinemu anane penyalahgunaan wewenang  lan kebocoran anggaran ana ing birokrasi negara lan birokrasi pemerintahan. Kawicaksanan lan ayahan ing babagan pengetatan  anggaran,  karasa  angel  amarga  kedayan  karo  kepentingan  pulitik.
Sabanjure ana kahanan wigati kang nemahi  birokrasi, yaiku komunikasi pulitik lan rapat-rapat antarane DPR karo bebadan eksekutif lan bebadan Negara, kadhang kala  karasa panas. Wiwit tahun 2010, tumeka taun 2011 iki, tinemu komunikasi antarane, MA, Komisi Yudisial, Kejaksaan Agung, Kemenkumham, Kepolisian karo KPK sing ora salaras. Sawise Pemilu 2009, komunikasi (politik) antarane bebadan negara sangsaya panas,  amarga  anane  tengara, kahanan, lan  kanyatan, yaiku:

1. kriminalisasi KPK;

2. anane suap marang anggota DPR rikala pemilihan Deputy Gubenur
    BI;

3. kawicaksanan ngenani ‘bill out’ kanggo Bank Century;

4. kasus rekening ana ing kepolisian;

5. kasus sing nemahi mantan Kabareskrim POLRI;

6. vonis marang mantan Ketua KPK;

7. vonis marang puluhan anggota DPR;

8. kasus penggelapan pajak;

9. makelar kasus  institusi penegak hukum;

10. surat palsu ana Mahkamah Konstitusi;

11. tengara markus lan mafia  hukum;

12. tengara anane mafia pemilu;

13. tengara korupsi ana ing kementerian;

14. kasus lan prekara hukum sing nemahi Nazarudin;

15. wacana pembubaran KPK, lan liya-liyane.

Karana iku, reformasi birokrasi  wektu iki durung bisa  mujudake  gegayuhan lan sasaran  sing  kapacak  ana ing Undang-undang Nomor 28 Tahun 1999 ngenani Penyelenggaraan Negara Yang Bersih dan Bebas KKN, lan Undang-undang Nomor 31 Tahun 1999, ngenani Pembrantasan Korupsi. Budaya korupsi terus ngrembaka ana  ing  ranah birokrasi  tumeka  wektu  iki. Tata kelola pemerintahan sing luwih apik (good  governance) lan (good corporate governance) durung bisa diwujudake.
Reformasi konstitusi adhedhasar amandemen UUD 1945  rambah kaping papat, lan ayahan Pemilu limang tahunan wiwit taun 1999, 2004, lan 2009, nglairake kahanan lan konfigurasi pulitik  sing terus owah ana ing DPR, lan DPRD. Kejaba saka kuwi, pemilukada tumrap Gubenur, Bupati lan Walikota  sing ora lumaku bareng,  ngobahake swasana pulitik ana ing tataran regional  lan lokal. Prabeya kanggo pemilu lan pemilukada saben limang tahun, cacahe trilyunan rupiah. Ulah kridhaning parte pulitik ana ing era demokrasi mbutuh-ake redhana sing  kapara akeh, apa maneh menawa  nyedhaki Pemilu. Proses demokrasi  sacara pilihan langsung ing saben tlatah, mbutuhake redhana trilyunan rupiyah. Lumakune  demokrasi langsung banjur ngrembakakake watak lan budaya  pulitik  sing sipate ‘high cost politics’. Supaya  bisa pinilih lan kasil nglungguhi kursi ana ing DPR, DPD, DPRD, utawa bisa pinilih minangka Gubernur, Bupati, lan Walikota, mbutuhake redhana ora mung  atusan  yuta, nanging  ana  sing  tumeka  milyaran  rupiyah. Karana iku para pakar lan peneliti banjur duweni panduga, yaiku anane: korelasi  antarane prabeya pemilu lan pemilukada karo ngrembakane  watak lan budaya  korupsi, kolusi, lan nepotisme (KKN). Korupsi ora mung dumadi ana ing ranah birokrasi negara, nanging banjur mrambah tumeka  daerah-daerah. Budaya korupsi karasa ora mung kedaden ana ing ranah birokrasi, nanging wis mrambah lan mratah ana ing institusi perbankan, BUMN, lan swasta. Tinemu  akeh  watak  lan  pakarti  seneng  nyuap dening  pihak  swasta. 
Rikala Komisi I DPR rapat kerja karo KPK, ana salah sawijining anggota nyitir pangandikane Penasehat KPK, yaiku: menawa KPK diparengake  nangkep koruptor ana ing legislatif, eksekutif, lan yudikatif, ana kurang luwih 60 %  pejabat padha mlebu pakunjaran. Sabanjure, wewaton data ana Kemendagri lan Pusat Pelaporan lan Analisis Transaksi Keuangan  (PPATK), tinemu angka 30 %  pejabat lan mantan pejabat, eksekutif lan legislatif  daerah kejiret prekara KKN. Karana iku, saperangan pejabat lan elit pulitik  ana ing daerah, kawibawane wiwit rubuh. Tengara kasebut, ana korelasine karo akehing redhana utawa prabeya kanggo pemilukada, supaya kasil kepilih lan bisa lungguh ing kursi legislatif utawa eksekutif. Semangat  otonomi daerah, sing kawitane  duweni  ancas supaya rakyat luwih sejahtera, pranyata  nglairake  akehing  prekara  korupsi, kolusi lan nepotisme (KKN) ana ing daerah-daerah.
Jumbuh karo semangat reformasi, kridhaning ayahan pengawasan internal ana ing  ranah birokrasi  uga diadani lan ditingkatake. Pengawasan legislatif dening DPR, lan DPRD uga dileksanakake liwat rapat-rapat lan kunjungan ana lapangan. Kejaba saka iku, Institusi BPK, BPKP, Inspektoprat Jenderal ana ing Kementerian, Inspektorat Wulayah Provinsi lan Kabupaten/Kota, sacara teratur (reguler) uga ngleksanakake ayahan pengawasan, peme-riksaan, lan audit keuangan. Tinemu tengara menawa  aparat pengawas internal  ‘ora bisa’ duweni sipat independen  amarga  kadayan  kawicaksanan  saka  pimpinan utawa atasane.
Bebarengan karo ngrembakane lembaga swadaya masyarakat (LSM), fungsi pengawasan  saka masyarakat  terus lumaku. Fungsi kontrol  sosial  saka insan pers ana ing media cetak lan media elektronika, ICW, Parlemen Watch, Indonesian Police Watch (IPW), LSI, KP2KKN lan liya-liyane, ora  tau kandheg lan mandheg. Ananging, prekara KKN durung bisa ditanggulangi utawa dibrantas. Tumeka ing wektu iki, manut data saka Transparency International (TI), Indonesia dadi sawijining negara sing paling korup ana ing tataran  nomer  5  saka 145  negara  sing  di-survei.  Budaya korupsi, kolusi  lan nepotisme wis  kebanjur ngoyod  lan ora  gampang  dibrantas.

Sawise ayahan reformasi lumaku telulas taun, kahanan adil lan makmur durung bisa diwujudake. Lumakune  birokrasi negara lan birokrasi  pemerintahan durung efektif. Sinergitas antarane bebadan-bebadan negara sing ngayahi penegakan keadilan, durung bisa  mujudake  kahanan adil lan jejeg. Akehing  prekara  KKN  sing wus malebu ana  ing ranah hukum campur  karo  prekara pulitik. Swasana pulitik kadhang kala panas, lan banjur malembar nggandheng  prekara ekonomi, prekara kepemimpinan, kabangsan,  pendidikan, lan prekara-prekara kemasyarakatan liyane. Birokrasi negara  lan birokrasi pemerintahan wektu iki, lagi ngadhepi campur adhuking prekara lan maneka krisis ing babagan pulitik, hukum, ekonomi, sosial, kabudayan, keamanan,  ketentreman, ketertiban  lan liya-liyane.   
Birokrasi negara  sing  wektu  iki lagi ngadhepi prekara sing maneka warna, banjur kesurung dayane globalisasi lan transparansi. Daya pengaruhe globalisasi sing kesurung  majune babagan ilmu pengetahuan lan teknologi informasi wektu iki, nuwuhake anane owah-owahan budaya. Dayaning interaksi budaya ana ing era globalisasi banjur nuwuhake budaya sandhingan lan budaya tandhingan. Lumakune interaksi budaya sing kesurung kemajuwan teknologi  lan informasi sing ngedab-edabi, wis gumelar ana ing  jagad maya. Tinemu akehing jejaring sosial arupa face book, friendster, youtube, myspace, twitter, blogger, lan liya-liyane. Ngrembakane  maneka warna situs lan laman (web site), banjur nglairake dumadine budaya cyber ing wektu iki. Kemajuwan ana ing jagat maya ngrem-baka, nanging ana dhampake sing ala. Ana ing ranah iki, akeh tinemu budaya tandhingan sing ‘nglawan’ birokrasi pemerintah. Akeh banget isu-isu panas prekara politik, ekonomi, hukum, sosial,  lan budaya,  sing  bisa diwaca  ana  jejaring  sosial  iki.
Njelajah ana ing jagat maya, mligine sing  sesambungan  karo birokrasi  pemerintah-an, tinemu kahanan sing mrihatinake. Tinemu akehing tulisan sing ngritik lan nyerang birokrasi pemerintahan.  Ana ing  babagan iki,  tinemu  kritikan saka Petisi Garuda, arupa daftar 33 ‘kegagalan‘ Presiden  ing wektu iki. Tuladhane nyebut

1. durung kasil mujudake  kesejahteraan rakyat;

2. ayahan ndandani perekonomian rakyat ora kasil;

3. reformasi birokrasi durung bisa diwujudake;

4. ora bisa brantas lan nuntasake kasus korupsi;

5. penanganan kasus pelanggaran hak asasi manungsa (HAM) durung
    tuntas;

6. ora kasil mbangun pulitik sing santun, duweni etika, lan durung kasil
    ngilangi pulitik transaksional;

7. ora kasil nglindhungi sumber-sumber alam lan sumber ekonomi
    negara liyane;

8. pemerintah ora kasil mbrantas mafia pajeg;

9. gagal mujudake kemandirian pangan;

10. mundhake utang luar negeri;

11. pemerintah  ora bisa mujudake kesejahteraan buruh;

12. ora  kasil nglindhungi  TKI  ana ing  luar negeri;

13. gagal  nangani  mafia kayu  lan rusake alas;

14. ora kasil mrenahake lan nangani pluralitas bangsa;

15. gagal mbangun masyarakat ing tlatah perbatasan Indonesia-
     Malaysia;

16. gagal nglestarekake lingkungan hidup kang banjur nglairake banjir;

17. gagal mbangun  etika, moral  lan karakter bangsa;  lan sateruse.  

Ana ing jejaring  sosial, uga kapacak  anane  ‘18 Kebohongan SBY’.
Ana ing  jagat maya, ora tinemu tulisan lan sanggahan saka birokrasi pemerintahan. Tanggapan saka birokrasi pemerintahan winates tinemu ana ing  pawarta saka media cetak sing  kapacak  ana  ing jagat  maya.  Tuladhane  rikala  ana  forum  Musyawarah  Rencana

Pembangunan Nasional (Musrenbangnas) tanggal 28 April 2011. Isine, nandhesake menawa keberhasilan pembangunan bakal  kasil mujudake sasaran sauger perencanaan disusun kanthi premati. Sabanjure rikala adicara pengetan Hari Kebangkitan Teknologi Nasional kaping 16 ana ing Auditorium Widya Bhakti Puspiptek Kota Tangerang  tanggal 10 Agustus 2011. Ana ing forum iki, dingendikakake menawa kemajuwan teknologi ana ing republik iki wis maju banget, yaiku malebu ana tataran 44 saka negara-negara ana ing donya. Babagan akehing kemajuwan  ana ing birokrasi, luwih dibiwarakake ana  ing forum-forum resmi. Galagat lan kahanan birokrasi pemerintahan wektu iki, lagi ngadhepi akehing prekara ora mung  ana  ing  alam nyata, nanging  uga tinemu  ana  ing  jagat maya.

Ngulir  Budi  Ana  Ing Ranah Birokrasi
Sawise  reformasi  lumaku telulas taun suwene, birokrasi negara durung kasil  nang- gulangi maneka warna krisis sing nemahi bangsa lan negara tumeka wektu iki.  Ana ing bebrayan sanjabaning birokrasi, kahanan  krisis ora mung ana ing babagan krisis ekonomi, ananging  nglimputi:  krisis kabangsan, krisis jatidiri, krisis  kepemimpinan, krisis keteladan-an, krisis akhlak, krisis  etika-moral, lan liya-liyane.  Ana satengahing krisis, wiwit taun 2004 ana  prahara  alam  nemahi bumi pretiwi sing nggegirisi, yaiku : tsunami, lumpur lapindo, lindhu ana ing Ngayogyakarta, anane lindhu sing wola-wali, angin lisus, bancana njebluge gunung Merapi lan gunung-gunung liyane, pasar kobong, alas kobong, kapal kerem, sepur tabrakan, baita mabur tiba, banjir bandhang, lemah longsor,  tindak kekerasan  lan raja pati,  ngrembakane narkoba,  teror bom, lan liya-liyane.
Sabanjure wewaton akehe pawarta sing kapacak ana koran-koran  lan  media elek-tronika, ana ‘prastawa’, prekara, kahanan  lan kanyatan  sing cacahe akeh banget, yakuwi: ngrembakane budaya KKN, demoralisasi  aparat penegak hukum, anane makelar  kasus, praktek mafia hukum, anane konflik pangarsa parte, konflik antar suku, tawuran pelajar lan mahasiswa, ngrembakane budaya demontrasi, watak seneng ngrusak lan anarkis, budaya debat, lan ngrembakane watak sulaya lan pro-kontra,  anane puso lan panen sing gagal ana ing ulah tetanen, ‘ilange’ budi pakarti, etika moral lan kesantunan sosial, lan liya liyane.
Ulah kridhaning birokrasi negara lan birokrasi pemerintahan sawise reformasi lumaku  telulas  taun, duweni  prestasi ora  kabeh  nguciwani.  Menawa  ana kang salah langkah  bisa dianggep lumrah. Sabanjure wewaton pranatan Undang-undang, Presiden  nyusun lan nglapurake Laporan Pertanggung Jawaban marang DPR.  DPR   banjur mbahas, nanggapi lan netepake keputusan. Ana ing tataran provinsi, kabupaten lan kutha, DPRD Provinsi, DPRD Kabupaten lan Kota, banjur padha mbahas, lan nanggapi  ngenani  laporan  pertanggung-jawaban Gubernur, Bupati, lan Walikota kasebut.
Adhedhasar substansi ana ing laporan pertanggung-jawaban kasebut, akeh banget kemajuwan lan prestasi sing diukir dening birokrasi wektu iki. Pertumbuhan ekonomi relatif apik lan stabil ana ing kisaran  6% - 7%, inflasi kasil dikendhaleni, angka kemiskinan suda, pengangguran bisa ‘diatasi’, ulahe para teroris kasil ditanggulangi, lumakune demokrasi paling ‘apik’ sadonya, lumakune  politik  uar negeri  apik, lan liya-liyane.

Ana ing babagan prestasi bidang pendidikan, tinemu akehing prestasi  sing diukir dening  para  pelajar ana ing olimpiade tataran internasional. Tuladhane ana ing Olimpiade Kimia Internasional ing Budapest Hongaria, ana cacah 3 (telu) pelajar Indonesia sing ngrebut/nampa medhali emas, perak, lan perunggu. Ana ing IPHO (International Physics Olympiad) pelajar Indonesia kasil ngrebut  medali emas cacah 2 (loro), ana ing ISTE (Inter-national Science and Technology Exhibition), ana pelajar cacah 2 (loro) kasil ngrebut
Virtual Doctor. Sabanjure ana  pelajar cacah 6 (enem), kasil ngrebut  medali ana ing olimpiade  internasional IYIPO (International Young Inventor Project Olympiad
Sabanjure, tinemu akeh kemajuwan lan prestasi sing  diukir dening birokrasi ana ing wektu iki. Titikane, akeh  piagam, tanda  jasa, penghargaan, bintang-bintang, lan satya lencana, sing kaparingake marang Menteri, Gubernur, Bupati, Walikota, lan  para  tokoh masyarakat, lan pangarsa praja liyane. Ana ing wektu iki  Presiden lan Wakil Presiden, lan pangarsa pemerintahan sing kawogan, wis ‘kasil’ hangulir budi mranata Menteri-menteri lan Wakil-wakil Menteri. Sawise kadhapuk lan kalantik, ulah kridhane 34 Kementerian lan 3 bebadan setingkat Menteri, 28 bebadan sing duweni wewenang adhedhasar UUD 1945, ketambahan 13 Wakil Menteri (dadi 19 Wakil Menteri), ditantang supaya bisa ngulir  budi  lan  bisa ngatasi  campur  adhuking  prekara  ana  ing  ranah  birokrasi.
Sawise reshuffle Kabinet Indonesia Bersatu (KIB) jilid II dileksanakake, ulah kri-dhaning  birokrasi  bakal lumaku  wewaton  program kang  wus karancang  ana ing tahun 2011. Kinerja birokrasi pemerintahan ana ing tataran  Pusat  dijumbuhake karo arahan Presiden ana ing adicara  pelantikan. Ana ing  tataran Provinsi, Kabupaten, lan Kota, tumuli bakal dileksanakake ayahan nata lan mranata organisasi lan personil supaya trep karo owah-owahan nomenklatur Kementerian ana ing KIB II, yaiku Kementerian Pendidikan dan Kebudayaan, lan Kementerian  Pariwisata dan Ekonomi  Kreatif.   
Maneka warna prestasi sing diukir dening birokrasi pemerintahan ana ing jaman wektu iki, dipersepsi  beda dening  parte oposisi, lan akehing elemen masyarakat  kang duweni  pikiran-pikiran kritis. Tuladhane, wewaton data saka Lingkaran Survey Indo-nesi  ana ing sasi Oktober 2011 martakake, menawa tingkat kepuasan publik ngenani  ulah kridhane pemerintahan SBY, sing nyatakake puas ana ing babagan: pulitik 38,4 %, ekonomi 40,9 %,  hukum 39,3 % , luar negeri 44,8 %, sosial 49 %, keamanan 56,3 % .  
Dumadine kahanan lan prekara  kang  maneka warna, ketambahan anane prahara alam, saperangan bebrayan padha duweni pangrasa lan banjur ngudarasa: menawa galagating  praja  karasa ‘meh padha’ karo  ciri-ciri  jaman edan  ana ing  Serat  Kalatidha?  Galagating negara wektu iki lagi kegubel prekara werna-werna, mligine prekara lan dredah ing babagan pulitik, pemerintahan, hukum, lan ekonomi. Birokrasi negara prelu hangulir budi milah lan milih prekara-prekara  sing perlu lan kudu diatasi kanthi cepet  adhedhasar isu-isu strategis, umpamane:

1. ana  ing pemerintahan prelune ngayahi akselerasi  reformasi
    birokrasi sing efisien lan efektif ;

2. ngudhari  prekara hukum: yaiku nyepetake ayahan sinergis antarane
    KPK, Kejaksaaan Agung, Kepolisian bebarengan mbrantas KKN
    nganti tuntas;

3. ningkatake  kinerja  Setgab  Koalisi  lan komunikasi pulitik  karo 
    DPR

4. ngudhari prekara ekonomi, yaiku mujudake kahanan ekonomi sing
    luwih stabil, merangi kemiskinan lan pengangguran, nyediakake
    kebutuhan dasar, nglimputi pangan sandang, papan, pendidikan,
    kesehatan lan liya- liyane.

Gegandhengan karo bab iki,  kinerja KIB Jilid II  kudu  cepet lan mumpuni nanggapi ‘isu-isu strategis’, jumbuh  karo akehing aspirasi  lan  pengarep-arepe  rakyat  
Hanata Pakarti  Ana ing  Mana-jemen Birokrasi
Birokrasi pemerintahan  wektu iki, wis kasil ngulir budi ngayahi reshuffle  kabinet.  Dening para pakar ketatanegaraan, lan para elit pulitik, ditanggapi lan direaksi nganggo cara maneka warna. Umpamane : (1) tengara anane dagang sapi; (2) proses mranata kabinet kaya drama lan sinetron; (3) dumadine ‘kabinet wakil’ sing kelemon utawa tambun; (4) bakal mundhake beban redhana saka APBN;  (5) SBY  wedi karo tekanan partai pulitik; (6) proses reshuffle bertele-tele; (7) reshuffle luwih nengenake  kompromi pulitik, lan liya-liyane. Ayahan mranata kabinet  dadi  isu  panas  kanggo ngritik birokrasi. Nanggapi lan ngadhepi ulah kridhaning  para elit pulitik pancen rumit lan ora gampang. Prekara sepele bisa mubal ngrembaka dadi gedhe.
Eporia pulitik sawise reformasi, terus lumaku kesurung anane globalisasi lan trans-paransi. Persepsi  ngenani demokrasi tumrap elit pulitik, tinemu beda karo persepsi bebra-yan ana ing tataran ngisor (grass root). Karana iku banjur ana dhemo-dhemo gedhen, amarga kesurung persepsi ngenani demokrasi sing bisa muni, bisa bebas lan bisa tumindak sakarepe dhewe. Budaya pulitik ing wektu iki,  nyurung  ngrembakaning  pakarti, watak, perilaku sing ngritik lan nyerang birokrasi pemerintahan. Ana satengahing dhemo kadhang kala ngobong ban, ngrusak, lan bentrok karo aparat kepolisian. Ulah kridhaning birokrasi, di-prediksi  bakal terus ngadhepi watak, karakter utawa budaya pulitik sing luwih nengenake kekuasaan (power). Budaya pulitik sing lumaku, lagi nandhang eporia pulitik  sing  rada keladuk lan kebablasen.
Tinemu kanyatan, menawa birokrasi ana ing era transisi demokrasi wektu iki, kedayan kekuatan lan kepentingan parte-parte  pulitik. Akeh  banget  elit pulitik sing madeg lan  dadi  pangarsa ana ing  birokrasi. Pangarsa negara lan pangarsa  pemerintahan padha  kejiret  ing kala  (tersandra)  parte-parte  pulitik. Kahanan ‘mangro tingal’ utawa  ambigu ora bisa diselaki. Pulitik  transaksional  ngrembaka  wiwit  tataran  nasional,  tumeka  daerah.
Babagan pakarti, watak, perilaku lan kepentingan pulitik ana  ing ranah birokrasi karasa nyawiji. Tinemu akehe pawadan, utawa argumentasi, sing dikemas kanthi rapi; menawa  gumelare kepentingan  pulitik karasa padha karo kepentingan negara. Surasa sing adi lan agung saka Abraham Lincoln: ‘my loyalty to my party ends, when my loyalty to my country begin’, utawa: ‘kasetyanku  marang  parte pupus, rikala kasetyanku  marang  negara  lair  ngrembaka’, angel  dicakake  ana  ing  republik  iki.  Ulah kridhaning  pulitik  wektu iki  dadi  titikan  menawa obsesi nguwasani bebadan legislatif lan eksekutif  dadi  ayahan  sing  wigati.  Gumelare jagat pulitik sing  dipandhegani parte-parte  pulitik, nggu-nakake  strategi  supaya  kasembadan  nduweni  ‘power ‘  ana  ing ngendi-endi.

Visi lan misine  ngarah supaya bisa kuasa lan nguwasani laku jantraning nagara. Karepe  kepengín nduweni  panguasa nguwasani  eksekutif  lan  legislatif. Malah ana  sing  kepara dremba, lan murka, kepengin  ngereh  bebadan  yudikatif. Kanggo mujudake visi lan misine, akeh sing kegodha, karo pikirane  Sartre:  ‘tujuan menghalalkan cara’. Ana uga sing ngugemi prinsip power is money  utawa money is power. Karana  iku tinemu  tetembungan  politik dhuwit (money politics), utawa dhuwit kanggo wragat politik. Kanggo menang  ing kursi  legislatif utawa  kursi eksekutif mligine kalungguhan Gubernur, Bupati lan Walikota, pangarsa DPRD, lan liya-liyane kudu duwe  bandha  kanggo  main dhuwit  ana ing ranah politik.
Tinemu akeh banget  pakarti, watak, karakter, lan perilaku ana ing ranah pulitik  kang adoh  lan uwal  saka tumindak utama. Juntrunge, akeh sing duweni tumindak nistha, banjur padha  kejiret  prekara. Birokrasi negara lan  pemerintahan, prelu ngulir budi lan nata pakarti lan mranata watak. Ana ing babagan pulitik prayoga  nduweni filosofi sing thukul wewaton nilai-nilai luhur. Filsafat pulitik mulang supaya njingglengi mula bukane pulitik. Wiwit tembung polis, policy lan  kawicaksanan/kearifan kanggo ngatur  laku jan-traning polis (negara kota). Pemikirane Lord Acton ana ing tetem-bungan ‘power tends to corrupt, absolute power tends to corrupt absolutely’, prayoga dingreteni, difahami lan digatekake. Aja  terus kegodha nindakake  korupsi lan kolusi  (KKN) ana ing birokrasi .
Ulah kridhaning ayahan pulitik prayoga katindakake wewaton budaya politik sing apik lan sehat. Kabeh paraga pulitik prelu nduweni etika politik, sopan santun politik, lan tatakrama politik, wewaton fatsoen apadene  kode etik  tumrap para pulitikus. Kaya  wis wektune para  kader  parte  pulitik nduweni  watak lan kapribadhen sing njunjung  nilai-nilai luhur  sing bisa ngagungake wibawane,  lan nglurake  harkat lan martabate.
Menawa  ana parte  pulitik duwe massa akeh (mayoritas), hak-hak masyarakat sing cacahe sethithik (minoritas) kudu diurmati. Amarga, roh demokrasi ngurmati anane hak asasi manusia (HAM). Sing lagi kuwasa aja kumawasa, aja sawiyah-wiyah, aja sewenang-wenang. Ana wulangan Jawa nganggo pepiridan: “ngono  ya ngono ning ya aja ngono”. Esensine síng murwat, síng pantes, trep lan timbang karo ukuran lan kahanan. Ana maneh prinsip demokrasi liyane, yakuwi nganggep menawa jejering manungsa ana sangarepe hukum padha, ora mbedak-bedakake drajat  lan  kalungguhan, ora emban cindhe emban siladan, utawa ora  tebang pilih.
Hanata  Pakarti  Ana Ing  Ranah Birokrasi
Manajemen ana ing era reformasi wektu iki, wis kepara maju orang mung mligi bab proses,  nanging wis malebu ana ranah pemerintahan lan pembangunan wilayah. Orientasi sing digunakake ora mung ‘one sided’ nanging wis ‘multiple sided’ gumantung karo cak-cakane. Kanggo nanggapi kahanan kang sangsaya maju, sumbangan ilmu pengetahuan lan tekno-logi tumrap manajamen akeh banget. Piranti studi sing rupa analisis wis akeh banget, yakuwi analisis: ‘short term, long term, lingstra, telstra, MIS, decision making process’ lan liya-liyane, dadi piranti sing penting tumrap manajemen.

Kanggo hangulir budi lan nata pakarti  ana ing ranah birokrasi, akeh tinemu mus-tikaning filosofi kang ana ing basa, lan susastra Jawa. Akeh banget kearifan budaya, pitutur luhur lan piwulang kautaman sing bisa disumbangake ana ing ranah birokrasi wektu iki. Pangajabe, supaya bisa dadi sarana kanggo ndandani lan mbangun watak, pakarti, lan  perilaku birokrasi sing luwih becik lan kasil mujudake  kahanan masyarakat sing luwih adil, maju, makmur, sejahtera, lan mandiri,  yaiku nglimputi:
Sepisan, nilai-nilai filsafati sing ana ing sesanti ‘mamayu hayuning bawana’,  sing mbanjur tambah dadi ‘mamayu hayuning nusa bangsa, mamayu hayuning sasama’. Wewaton sesanti iku ana wulangan Jawa supaya pada  ‘sadar kosmis’, bisa njaga, mulihake, ngapikake, nglestarekake lingkungan (eco system). Ana ing manajemen pembangunan sinebut  pembangunan  sing lumaku  lestari  utawa ‘langgeng’  (sustainable development).
Kapindho, nilai-nilai sing ana ing kakawin, naskah-naskah, serat-serat, manuskrip Jawa perlu didhudhah, dipilah lan dipilih, tuladhane yakuwi sesanti ‘Aja Dumeh’, lamun sira nduweni panguwasa aja ‘kumawasa’, lamun sira duwe wewenang aja ‘sewenang-wenang’. Nilai-nilai sing ana sesanti ‘Aja Dumeh’ gayut banget karo watak-watak  lan kharakter kanggo para pangarsa ana ing ranah birokrasi, sing prayoga duweni watak ‘andhap asor, prasaja, lembah manah, cedhak  lan mikirake  rakyat  lan nguwongake  uwong.
Katelu, wulangan saka Sri Mangkunagara I kang ana ing Tri Darma, yaiku : ‘rumangsa melu handarbeni, wajib melu hangrungkebi, mulat  sarira  hangrasa  wani’.  Birokrasi nega-ra lan birokrasi pemerintahan prelu  duweni  watak  eling  lan  mawas diri , menawa duma-dine  ana ing birokrasi  amarga saka rakyat, lan diwragadi nganggo dhuwit rakyat.  Karana iku, birokrasi wiwit tataran ndhuwur temeka ing tataran ngisor  prelu  mikirake rakyat, lan mangerteni  kebutuhan  lan  aspirasi  rakyat.
Kapat, ana ing babagan manajemen politik sing kalebu angel lan rumit, ana tetembungan sing perlu digatekake, yakuwi anane watak: ‘dhandhang diunekake kontul, kontul diunek-ake dhandhang, esuk dhele sore tempe, mencla-mencle, cidra ing janji, ujare mbolak mbalik mbulet, njaba putih njero ireng, melik gendhong lali, nabok nyilih tangan, lan liya-liyane; sing prayoga disingkiri. Sabanjure ana uga tetembungan sing prayoga di ngreteni lan dicakake, yakuwi : ‘sepi ing pamrih rame ing gawe’, ‘gotong royong holopis kuntl baris’, ‘aja rumangsa bisa, bisaa rumangsa’, ‘makarti, makarya, mandhireng’, ‘tepa sarira mulat sarira, eling precaya, tresna, temen, adil, budi luhur, ‘rukun agawe santosa, crah agawe bubrah’, lan liya-liyane; sing prelu  dipersudi  kanggo  mujudake  kesejahteraan  rakyat.
Kalima, ana wulangan Jawa tumrap  manajemen perencanaan tinemu ana ing ‘tanggap ka’, yakuwi wulangan supaya aja: ‘kedhuwuren, kedawan, kegedhen empyak kurang cagak,  kakehen, kebangeten, kabablasen’ lan liya-liyane. Ana maneh wulangan ana ing unen-unen : ‘‘sing rikat ning aja kebat kliwat’, ‘sing duweni duga lan prayoga’, ‘aja mindho gaweni’, ‘sing rigen mugen lan tegen’,  aja ‘boros, aja brah-breh’, lan liya-liyane;  sing  prelu  dicakake  ana  ing birokrasi . Kabeh  ayahan  dibudidaya  supaya  tumanja lan murakabi. 

Kanem, ana wulangan Jawa sing gayut karo pengawasan, yakuwi : ‘Desa mawa Cara, Negara mawa Tata’, Sing Sapa salah Seleh’, Menawa ‘Kasinungan Panguwasa aja Kumawasa’, ‘Jejeg-jujur iku jejering manungsa kang adil’, lan liya-liyane; sing prelu dingerteni lan dicakake. Nilai-nilai etik lan moral sing migunani lan gayut karo pengawasan uga tinemu ana ing: ‘prasetya, janji, ikrar, sumpah, pepali, wewaler’ lan liya-liyane, dingerteni lan disadhari. Ana ing basa, sastra, lan budaya Jawa akeh sing bisa diteliti,  dipilah lan dipilih  supaya  bisa  disumbangake  tumrap  manajemen birokrasi  wektu iki.
Hastha  Brata  lan  Kepemimpinan  Pancasila
Kanggo ngadhepi lan nangani prekara kang werna-werna, babagan kepemimpinan (leadership) dadi wigati. Kepemimpinan nyakup perangan ilmu administrasi lan manajemen wewaton kaidah-kaidah ilmiyah. Nanging uga nyakup perangan seni sing asipat adi, edhi lan endah, amarga malebu ana ing ranah rasa. Karana iku gumelare kepemimpinan, prelu nggunakake lan ndayakake ‘olah pikir’ lan ‘olah rasa’. Akeh banget tuntunan ngenani kepemimpinan wewaton buku-buku utawa teori-teori sing sipate ilmiyah. Tuladhane, pemimpin prelu duweni ciri-ciri yaiku:

1. mumpuni (capable),

2. sarwa bisa utawa ahli (profesional)

3. bisa ditampa sapa wae (acceptable),

4. dipercaya dening sapa wae (credible),

5. tanggung jawab ana ing perangan apa wae (accountable), lan prelu
    duweni watak

6. demokratis, komunikatif, konsisten, konsekwen, duweni komitmen,
          lan liya-liyane.

Tuntunan ngenani babagan kepemimpinan wewaton kaidah ilmiyah tinemu ana ing buku-buku ngenani manajemen. Menawa babagan iki didhudhah lan disambungake karo wulang kepemimpinan kang linambaran kearifan budaya Jawa, dadi luwih pepak kanggo ngisi lan nyuksesake ayahan  ana ing ranah birokrasi wektu iki. Tuladhane  unen-unen Jawa, yaiku ‘sawise pinilih, piniji, sing bisa pinuji’. Surasane, sawise pinilih wewaton pilihan sing demokratis, prelu diugemi lan disadhari menawa nampa amanah saka rakyat. Sabanjure, prelu duweni tekad, semangat, lan motivasi, tumuli gumregah mbudi daya supaya bisa pinuji, diurmati lan ditresnani dening rekyate. Sesambungan karo babagan iki, akeh banget kearifan lokal lan wulangan Jawa sing bisa dadi tuntunan tumrap para pemimpin ana  ing ranah birokrasi pemerintahan, mligine  ana ing  babagan etika lan moral.

Hanata  Pakarti  Wewaton  Wulangan Hastha Brata
Wulang Jawa ngenani kepemimpinan sing kawentar lan gayut (relevan) ana ing bebrayan wektu iki, yaiku ‘Hastha Brata’. Ajaran ngenani Hastha Brata ana ing pewayangan, nenuntun satriya pinilih supaya duweni watak 8 (wolu), sinebut mahambeg utawa nulad ‘laku’ning: surya (srengenge), bantala (bumi), candra (rembulan), kartika (lintang), samodra (segara), akasa (langit), agni (geni), lan maruta (angin). Surasa ana ing wulangan Hastha Brata nenuntun supaya duweni watak surya minangka sumber daya kekuwatan tumrap sapa wae ana ing alam iki. Para pemimpin diajab supaya menehi pituduh, lan njurung marang rakyate gumregah ngayahi tugas. Watak bantala menehi pituduh supaya para pemimpin duweni watak weweh, loma lan ngluberake apa wae sing didarbeki.

Mahambeg candra menehi piwulang wewaton lakuning rembulan sing madhangi ana ing wektu peteng. Surasane,  weh pitutur tumrap para pemimpin supaya bisa nggugah semangat marang rakyate sing lagi padha nandhang susah. Watak  kartika weh piwulang supaya para pemimpin bisa dadi panutan utawa patuladhan tumrap rakyate. Watak samodra ngemot piwulang supaya pemimpin bisa ‘momor, momong, momot’ marang rakyate. 
Mahambeg  akasa weh pituduh supaya duweni watak  jembar lan bisa ‘nampa’ aspirasi masyarakat sing werna-werna. Watak agni nenuntun marang para pemimpin supaya adil lan wani menehi pidana tumrap sapa wae sing ora bener lan nglanggar peraturan. Mahambeg maruta menehi tuduh marang para pemimpin supaya cedhak karo rakyate, ngrengkuh lan nganggep padha marang sapa wae. Wulang kepemimpinan Hastha Brata prelu didhudhah utawa di-analisis wewaton kahanan wektu iki. Konteks ana ing pewayangan prayoga ditafsirake lan ditrepake karo kahanan wektu iki. Penafsiranku, wulang kepemimpinan ana ing Hastha Brata, saperangan bisa manjing lan dicakake sacara pribadhi dening para pemimpin. Nanging saperangan gedhe prelu kasebut lan malebu ana ing ranah Undang-undang (UU), Peraturan Pemerintah (PP), lan Peraturan Perundang-undangan liyane. Tuladhane, akeh kang wus kapacak kanthi trawaca ana ing Pembukaan UUD 1945. Umpamane, negara duweni kewajiban nglindhungi warga negarane; negara duweni kewajiban ningkatake lan mbudi daya supaya rakyate pinter, cerdas, lan sejahtera, njejegake  keadilan,  ngopeni  lansia, fakir miskin  lan liya-liyane.
Program utawa ayahan birokrasi negara lan birokrasi ing tataran daerah, wewaton filosofi lan surasane Hastha Brata, prelu  tinulis utawa kapacak ana ing naskah utawa dokumen perencanaan Pembangunan Nasional, Rencana Pembangunan Jangka Mene-ngah Nasional (RPJMN), Undang-Undang ngenani Anggaran Pendapatan dan Belanja Nasional (APBN), Rencana Pembangunan Jangka Menengah Daerah (RJPMD), Rencana Kerja Pemerintah Daerah (RKPD),  Peraturan Daerah (PERDA) ngenani Anggaran Pen-dapatan Belanja Daerah (APBD), Peraturan Gubernur, Peraturan Bupati utawa Walikota, Anggaran Pendapatan  dan  Belanja Daerah (APBD),  lan liya-liyane.  
Hanata  Pakarti  Lelandhesan  Kepemimpinan  Pancasila
Kanggo ngadhepi lan nanggulangi akehing prekara ana ing ranah birokrasi negara lan birokrasi pemerintahan, kepemimpinan Pancasila prelu dadi dhasar utawa landhesan kanggo mujudake kahanan masyarakat sing luwih sejahtera, luwih adil lan luwih makmur. Kanggo mujudake gegayuhan luhur iki, kridhaning para pemimpin wiwit tataran Pusat, Provinsi tumeka ing tataran Desa prelu ngerteni lan ngecakake kepemimpinan Pancasila. Kuwajiban sing wigati tumrap pemimpin ana ing ranah iki yaiku nyurung marang rakyat supaya sadhar lan mangerteni laku jantraning nagara, lan tata gelaring kabangsan, adhedhasar Pancasila lan UUD 1945. Ana cagak utawa pilar cacah papat sing sipate wis dadi ‘harga mati’, yaiku: Pancasila, UUD 1945, Negara Kesatuan Republik Indonesia (NKRI), lan Bhineka Tunggal Ika. Pilar cacah papat iki prelu manjing ana ing ranah birokrasi pemerintahan ana ing saben tataran. 

Birokrasi negara kudu ngregem, gujengan lan bisa ngecakake  ‘pilar papat’ kasebut ana satengahing masyarakat. Nilai-nilai ana ing Pancasila prelu diwujudake lan dicakake ana ayahan pembangunan. Tumrap para pangarsa praja utawa pemimpin ing tataran Pusat, Provinsi, Kabupaten/Kutha, Kecamatan, Desa lan Kelurahan, prayoga sinau, nyinau, lan ngerteni gumelare kepemimpinan Pancasila. Surasa ana ing kepemimpinan Pancasila nyakup lan ngukup kabeh filosofi, moralitas, wulangan utawa ajaran ngenani sila-sila ana ing Pancasila.
Sila sepisan ‘Ketuhanan Yang Maha Esa’ mengku surasa, yaiku supaya duweni akhlak utawa watak:

1. iman lan taqwa marang Allah SWT,

2. ngurmati marang sapa wae, lan

3. merdika utawa bebas nindakake ngibadah wewaton agama kang dianut.

Surasa ana ing sila ‘Kemanusiaan yang Adil dan Beradab’, nenuntun supaya padha duweni watak:

1. nyadhari anane hak lan kuwajiban sing timbang,

2. rukun lan toleran,

3. bisa nyambut gawe bebarengan.

Surasa ana ing sila ‘Persatuan Indonesia’, ngajab supaya duweni watak tresna marang nusa lan bangsa kang sinebut:

1. nasionalisme lan patriot-isme,

2. nengenake persatuan lan kesatuan bangsa,

3. memundhi lan bisa mujudake sesanti ‘bhineka tunggal ika’.

Surasa ana ing sila ‘Kerakyatan yang dipimpin oleh hikmat kebijaksanaan dalam permusyawaratan/perwakilan’, nenuntun supaya luwih nengenake watak:

1. arif lan wicaksana

2. musyawarah lan mufakat,

3. ngecakake apa wae sing wis dadi keputusan.

Surasa ana ing sila ‘Keadilan Sosial bagi seluruh rakyat Indonesia’, nenuntun supaya duweni watak:

(1) mujudake kahanan adil

(2) warata kanggo kabeh rakyate

(3) gotong royong.

Mindeng lan mandeng wulang kepemimpinan adhedhasar filosofi  Pancasila prelu  dijlentrehake  nganggo  tembung basa  sing  prasaja  lan  populer.
Birokrasi negara lan birokrasi pemerintahan, bisa nggunakake referensi sing wis ditetepake ana ing lingkungan prajurit TNI  sing sinebut: 11 (sewelas) asas kepemimpinan, sing nglimputi:

1. Taqwa

2. Ing Ngarsa sung Tuladha

3. Ing Madya mangun Karsa

4. Tut Wuri Handayani

5. Waspada Purba Wisesa

6. Ambeg Paramarta

7. Prasaja

8. Satya

9. Gemi Nastiti

10. Belaka

11. Legawa.

Hanata pakarti wewaton 11 asas kepe-mimpinan kasebut ora gampang. Prelu dipersudi  lan dihayati kanthi  premati. Ana ing jagat pewayangan, ana pocapan dalang : ‘dene utamane Nata berbudi bawa laksana’. Berbudi bawa leksana duweni surasa  yaiku netepi pangandika.  Kabeh pangarsa ana ing birokrasi negara lan birokrasi pemerintahan, kudu gujengan, ngugemi lan memundhi sumpah, janji,  prasetya, paugeran, lan kode etik kepemimpinan. ‘Sabda Pandhita Ratu tan kena wolawali’, surasane para pangarsa birokrasi kudu bisa  hanata pakarti, yiku: aja  mencla-mencle, aja esuk dhele  sore tempe. Satunya  kata  dengan  perbuatan.
Ana ing jagat pewayangan uga  tinemu nilai-nilai kepemimpinan lan gegambaraning watak satriya, yaiku: satriya pinandhita. Satriya ngregem lan duweni watak wani, tegas, tangguh, jujur, lan tanggap ing sasmita. Satriya pinandhita uga nrgegem lan duweni watak pandhita, utawa  watak brahmana  sing  tansah  caket  lan  tansah nyaket  karo Dhat Kang Maha Kawasa. Gumelare watak satriya minangka pangarsa ana ing  birokrasi negara, bisa nulad  watak  satriya  pinandhita  kang  mahambeg utama, adoh  saka  watak  nistha. 

Ana bebrayan ing Inggris, tinemu  mustikaning  watak  yaiku :  ‘to be a gentlemen’. Ana ing kene tinemu  surasa , yaiku; menawa luput ya ngakoni luput, menawa salah ya ngakoni salah. Birokrasi negara lan birokrasi  pemerintahan  wektu iki angel banget ngregem lan ngugemi watak-watak kasebut.  Akeh sing padha duweni cara lan pinter endha, mbulet, lan nggubet. Prayogane, para  pejabat publik wektu iki, wiwit nulad  lan  mbabar watak ‘to be a gentlemen’,  menawa salah ya ngakoni salah. Surasa ana piwulang: ‘jujur, jejeg iku jejering manungsa utama’  prelu  diwujudake ana ing  ranah birokrasi negara lan birokrasi pemerintahan. Menawa wektu iki ana ing Diklat Kepemimpinan wis wiwit diwulangake  Etika Pemerintahan, kaya wis wektune  Pitutur Luhur lan Piwulang Kautaman,  malebu lan ditatarake ana ing  pendidikan lan latihan kepemimpinan (Diklatpim) ana ing  birokrasi  pemerintahan. Kejaba saka iku, piwulang  kautaman lan pitutur luhur bisa  dipilah lan dipilih  kanggo  nyusun  lan  nyempurnakake  Kode Etik  ana  ing  bebadan Negara.  Kanggo nyengkuyung ayahan iki, Universitas utawa Perguruan Tinggi prelu ndhapuk  pusat kajian  tumrap  pitutur luhur  lan  piwulang kautaman sing  trep karo kahanan  wektu iki.          
Kanggo nanggapi prelune birokrasi negara lan birokrasi pemerintahan sing jejeg, adil, resik, bener, pener, kuwat, lan wibawa, ayahan Hangulir  Budi  Nata  Pakarti  dadi ayahan sing wigati. Ayahan agung kang bakal ditindakake, malebu ana ing ranah Pen-didikan Karakter Bangsa lan Pembangunan Karakter Bangsa. Bab Pendidikan Karakter Bangsa, wis ditandhesake ana ing Undang-Undang Dasar Tahun 1945 Pasal 31 ayat (3): yang menyebutkan bahwa pemerintah mengusahakan dan menyelenggarakan satu sistem pendidikan nasional, yang meningkatkan keimanan dan ketakwaan serta akhlak mulia dalam rangka mencerdaskan kehidupan bangsa yang  diatur dengan Undang-Undang.
Sabanjure, dikuwatake adhedhasar UU Nomor 20 Tahun 2003 Tentang Sistim Pendikan Nasional, Pasal 3: yang menyebutkan bahwa secara formal pendidikan budaya dan pembangunan karakter dalam upaya menciptakan pribadi yang cerdas dan berakhlak mulia menjadi sasaran dan tujuan utama pendidikan. Sabanjure, wewaton Undang-Undang Nomor 2 Tahun 2008 tentang Partai Politik, uga ditandesake prelune Pendidikan Politik, supaya nilai-nilai kang ana ing idiologi parte bisa dingerteni lan dicakake kanggo mbangun watak bangsa.
Ayahan pendidikan karakter ana ing jalur sekolahan luwih gampang dicakake, amarga  dasar  hukume  wis kuwat,  nanging  ana ing ranah pulitik mbutuhake komitmen pangarsa parte supaya bisa mujudake warga negara sing becik (good citizen), lan duweni watak utawa karakter sing apik. Tekat lan semangat  kanggo  ngadani  ayahan  Pemba-ngunan Karakter Bangsa wus wiwit ngrembaka, apamaneh sawise kababar Design Induk Pembangunan Karakter Bangsa 2010-2025. Kejaba saka iku, Kementerian Pendidikan Nasional wis kasil nyusun Rencana dan Strategi ngenani Pendidikan Karakter Bangsa, Kementerian Kebudayaan Kebudayaan, uga wis nerbitake buku  Strategi Pem-bangunan Karakter dan Pekerti  Bangsa. -  

Daftar  Kapustakan

1. Abdullah Ciptoprawiro, dr, Filsafat Jawa, Balai Pustaka, 1986 Jakarta.

2. Akademi Magelang, Hangulir Budi Hanata Pakarti, Sarasehan Budaya,
   2010, Magelang.

3. Amir, Hazim, Dr MA, Nilai-nilai Etis dalam Wayang, Sinar
   Harapan,1991, Jakarta.

4. Badan Pengkajian Kebudayaan, Pengkajian Sastra Jawa, 1987,
   Semarang.

5. Direktorat Pembangunan Karakter dan Pekerti Bangsa, Kemenbudpar,
   Strategi Pemba-ngunan Karakter dan Pekerti Bangsa, Jakarta.

6. Edi Sedyawati, Prof, Dr, dkk, Pedoman Penanaman Budi Pekerti Luhur,
   Balai Pustaka, 1999, Jakarta.

7. Hardjono, Prof. Mr, Tradisi Sosial, Fisipol 1965, Yogyakarta.

8. Koentjaraningrat, Prof. Dr, Kebudayaan Jawa, Balai Pustaka, 1984,
   Jakarta.

9. Mabes TNI, Vadamecum, Seskoad, 1980, Bandung.

10. Mangunhardjana, A, Isme-isme dari A Sampai Z, Kanisius,
   1996,Yogyakarta.

11. Paguyuban Trah Pakualaman Hudyono, Pendidikan Karakter Bangsa
   Dalam Konsep Ki Hajar Dewantara, Pakualaman, 2010, Yogyakarta.

12. Sarwan, Pepakem Ilmu Luhur Budaya Adiluhung, Bagian Sosial Setda ,
   1998, Wonogiri.

13. Sekretariat Jenderal  Mahkamah Konstitusi RI, Undang-Undang Dasar
   Negara Republik Indonesia Tahun 1945, 2006, Jakarta.

14. Sujamto, Ir, Refleksi Budaya Jawa, Dahara Prize, 1992, Semarang.

15. Sosrokartono, RMP, Kumpulan Renungan Rabu Pahing, 1977,
   Bandung.

16. Soetomo WE, Drs, Imam Soedibyo, Drs, Soegeng Reksodihardjo, Drs,
   Ungkapan Tradisional Yang Berkaitan Dengan Sila-sila Dalam
   Pancasila  Daerah Jawa Tengah, Direktorat Sejarah dan Nilai
   Tradisional, 1986, Semarang.

17. Soetrisno PH, Drs, Falsafah Hidup Pancasila Sebagaimana Tercermin
   Dalam Falsafah Hidup Orang Jawa, LPM Universitas Gajah Mada,
   1977, Yogyakarta.

18. Sri Mulyana, Ir , Wayang dan Kharakter Manusia, Gunung Agung,
   1986, Jakarta.

19. Suseno, Franz Magnis, Perspektif Etis Pembangunan, artikel, 1986,
   Jakarta.

20. Tedjopremono RS, Drs dan Sindu Sidharta BRM, Drs, Himpunan
   Pitutur Luhur, Direktorat Jendral Kebudayaan  Departemen Pendidikan
   dan Kebudayaan, 1980, Jakarta

21. Tedjopremono RS, Drs dan Sindu Sidharta BRM, Drs, Wejangan Para
   Mpu, Direktorat Jendral Kebudayaan  Departemen Pendidikan dan
   Kebudayaan, 1980, Jakarta.

22. Tulus Koesoemaboedaya, Wewarah Adiluhung Para Leluhur
   Nuswantara, Kulawarga Soeryobratan, Semarang, 1992.

23. Undang-undang RI Nomor 20 Tahun 2003, Sistem Pendidikan
   Nasional, Aneka Ilmu, 2003, Semarang.

24. UU Nomor 32 Tahun 2004, Tentang Pemerintahan Daerah.

25. UU Nomor 2 Tahun 2008 Tentang Partai Politik.

26. PP Nomor 38 Tahun 2007 Tentang Pembagian Urusan Pemerintahan
   Antara Pemerintah, Pemerintah Daerah Provinsi dan Pemerintah Daerah

   Kabupaten/Kota.

27. Metro TV, www.metronews.com, September-Oktober, 2011,
   www.detiknews, September-Oktober 2011, wikiepedia bahasa
   Indonesia, Wikipedia bahasa Jawa, www.ki demang.com,  dll

28. Yatmana, Sudi, RMA dan Sutadi, Drs.H,  Blencong 45, Aneka Ilmu
   2005, Semarang.