AWISE Markani lan bojone mungkur, Amongdenta ganti arep nakoni Palindriya. Beda karo sadurunge sing krasa nggekeng, saiki swasanane rada nglen­dheh. Sebab Amongdenta wis wanuh karo Palindriya, nadyan tepunge kena di­arani mung tepung rai utawa ora kumra­ket banget-banget.  Mula anggone njaluk katrangan digawe sareh, kaya dene wong jagongan biyasa.
Sadurunge Amongdenta miwiti pita­kon, Setyawan menyat banjur pamit arep menyang pekiwan. Hawa adhem alam pe­gunungan njalari dheweke kebelet nguyuh. Palindriya nuduhi dalan menyang jedhing, yaiku nyidhat liwat njero omah.
Mlebu kamar tamu bledheng Setya­wan kober clilengan. Ruwangan iki ngglo­dha  tanpa rerenggan. Rasane suwung, sebab ruwangan samono jembare kuwi mung diiseni kursi kayu cacah lima ngu­pengi meja ukiran. Rehne ora ana sing narik kawigatene, Setyawan bablas mblunus menyang ruwang tengah sing uga amba ngoblah-oblah.
Ora tinemu prabotan mbejaji ing ruwangan iki kejaba lemari buku sing dhuwure sadedege wong diwasa sarta  bupet modhel lawas.  Najan prabotan iku bekakas kuna ewa­se­mono pliturane  isih ketara gilap. Barange wutuh, ora ana sing krowok merga di­pangan teter, mertandhani yen kayu sing kanggo garapan pancen pilihan. Beda karo barang mebeler jaman saiki sing raca­ke mung kayu pulasan, saengga ora nganti taunan wis amrok  dikrokoti teter.
Kursi penjalin loro ditata jejer mepet tembok. Kursi-kursi kuwi  ngadhep meja cilik wangun pesagi. Sikil-sikilane saka penjalin, nanging lumahing meja wujud kaca riben. Ing sandhuwure meja  gumle­thak bungkuse rokok kretek merek Cempaka. Asbak alumunium werna wungu  kebak tegesan. Awu tilas latune rokok uga mblader ing sangisore kursi.
Tangane Setyawan kumlawe njupuk bungkuse rokok lan diiling-ilingi. Isi pe­pake ana rolas, nanging sing  nyisa ana wadhahe kari nem uthil. Setyawan ora ngrokok. Nanging dheweke bisa ngira-ira yen rokok nem batang iku amblas jroning wektu sewengi ateges ana rong perkara sing bisa dititeni. Se­pisan, pawongan sing mentas rokokan mau pancen nyethet, dene sing kapindho  pawongan mau  lagi goreh pikirane.
Bungkus rokok diselehake maneh. Setyawan banjur maspadakake isen-isene ruwang tengah iku kanthi luwih premati. Mripate  sing awas pindha alap-alap su­mu­rup album foto tumumpang bupet. Setyawan plingukan. Bareng yakin me­nawa ing papan kono ora ana sapa-sapa, dheweke terus marani pernahe album kang samake rupa soklat lemah kuwi. Nalika didemek, epek-epeke Setyawan krasa  ngeres, tandha yen wis suwe album iku ora nate diuthik-uthik saka panggona­ne.
Album dibukak, dibiyaki mbaka siji.  Perangan ngarep isi fotone Palindriya ri­kala ningkahan karo garwane, Raden Ayu Ajeng Kamaratih. Foto cithakan lawas, isih  durung kelir. Nganggo busana penganten adat Jawa, Ajeng Kamaratih katon ayu banget. Cahyane sumunar. Setyawan ora uwis-uwis anggone nyawang.  Ing teras mau Setyawan kober nglirik Sekarniti. Sajake kasulistyane kenya kuwi nunggak semi  ibune.  Rada manengah, foto-foto sing pinajang  wis berwarna. Akeh-akehe fotone Sekarniti kawit dheweke isih bayi, ngrembaka dadi bocah, mekar rumaja putri engga nglanjak nganggo sragam SMA.
Rong kaca pungkasan isi fotone Sekar­niti karo sawenehing priya nggantheng.
Ana foto papat. Kabeh mawa latar mburi segara sing banyune biru lerab-lerab. Sing paling manjila fotone Sekarniti lagi nglesot ing wedhi pesisir adu geger karo priya bagus mau. Ombak segara nyempyok sikile  sing nganggo clana jins diwingkis wates kentol. Ana maneh fotone Sekarniti pinuju ngrangkul gulune priya bagus mau saka mburi, dene sing lanang lungguh watu kumlasa. Sangisore foto papat kuwi ana tulisan tangan nganggo pulpen mangsi ireng, rinengga gambare godhong waru. Tulisan iku awangun endah lan ngrungit. Unine: Kenang-ke­nangan saka Pesisir Popoh. Muga-muga Langgeng. Sekarniti &…
Dheweke nginceng liwat angin-angin saka njero gubug sawenehing pawongan metu regunuk-regunuk
Eman, pungkasaning tulisan tangan kuwi ora bisa kewaca merga panulise ora pati cetha. Setyawan banjur rogoh-rogoh sake jaket ngetokake suryakantha . Tulisan sing kurang trawaca kuwi coba di­trawang nganggo kaca pembesar. Sur­yakantha dipepetake nggon tulisan. Bathuke njengkerut. Jenenge priya  kuwi sajake sengaja dibusak nganggo setip karet kang dileleti idu. Sebab pener jenenge priya kuwi kertase album katon kasar mbregidhil. Nanging merga pam­bu­sake kurang sampurna, sisa-sisane mangsi mau isih bisa dieja dening Setyawan.
Rampung mbiyaki album Setyawan eling marang sedyane sekawit, yakuwi nguyuh. Weruh lawang iringan mbukak, Setyawan banjur metu. Satemene dalan menyang jedhing uga bisa liwat ruwang tengah kono. Nanging rehne lawang bu­tulan sing tumuju pawon lagi ditutup, Set­yawan pilih metu liwat lawang sing buka­kan. Dheweke ngunclug memburi metu teras iringan omah. Sadurunge tekan jedhing, lakune kudu nyabrang pawon luwih dhisik jalaran loji kuwi awangun L.
Setyawan ngendhegake jangkahe. Ing pawon kono dheweke nyumurupi wanita setengah umur lagi jengkang-jengking ana sangarepe pawonan. Wanita iku nganggo jarit, klambine kembang-kembang, ram­bute digelung munthel, kulite nyawo ma­teng. Nadyan umur-umurane kliwat patang puluhan lima taun, ewadene pawakane isih sedhet. Lambene kempas-kempus nyebuli mawa mureng mrengangah. Bel, geni murub. Panci cilik sing tumumpang ana ndhuwur pawonan nyuwara kem­reng­­seng. Cetha yen wanita kuwi lagi nggo­dhog banyu.
“Ehem…ehem,” Setyawan dhehem-dhehem.
Wanita kuwi tumoleh. Ngadeg saka anggone jengkeng,  praupane nyureng ndulu sing anyar katon. Setyawan mbatin, nadyan praupan ing ngarape iku katon nglenga  ewadene isih ana manise.
“Sampeyan sinten?” pitakone karo nyeka kringet ing pilingane.
“Kula Setyawan, tamune Pak Palin­driya. Kula madosi jedhing ajeng turas.”
“Oo…njenengan mesthi pulisi sing ajeng nglarah pejahe Mas Darpita nggih?” ucape malih semanak. Sangga runggine sakala ilang.
“Kula sanes pulisi, Yu. Kula  namung  tinanggenah  sabiyantu pulisi miyak raja­pejah.”
“Nek ngaten mase niki mesthi dhetek­tip. Kados dhetektip Handaka ngoten nika.”
“Sampeyan nggih ngerti dhetektip barang ta Yu?” pitakone Setyawan karo mesem.
“We, lha dhek tesih SD siyen kula sregep teng perpustakaan kok. Waosan kula nggih bangsane crita dhetektip ngo­ten niku. Sing paling kula remeni  serial  dhetektip Handaka. Dhetektip Handaka niku pinter, lantip lan sugih akal. Ajenga durjanane primpen anggenipun nyingi­daken tlacak, ning mesthi kejodheran menawi aben ajeng kalihan dhetektip Handaka. Pendheke pinter saestu Pak Suparto Brata.”
“Sinten Suparto Brata niku, Yu?”
“Nggih pengarange dhetektip Han­daka niku wau. Eh, mase niki asmane sinten ta?”
“Setyawan.”
“Setyawan….dhetektip Setyawan. Asmane kados nika lhe, kados Raden Setyawan garwane Dewi Sawitri, putrane Resi Dyumatsena ing Pertapan Waringin Tunggal. Raden Setyawan niku pun diku­kut gesange dening Bathara Yamadipati. Ning mergi Dewi Sawitri nggandholi lan tansah tut wingking lampahe Sang Hyang Yama, wekasanipun sukmane Raden Set­yawan kawangsulaken malih.”
“Sampeyan napa remen ningali ketho­prak ta, Yu?” Setyawan ngempet guyu.
“We, pripun ta. Dhek tesih legan siyen kula klebet penggemare Kethoprak Siswa Budaya je. Kula asring ningali wekdal Siswa Budaya pentas teng lapangan keca­matan ngrika. Bidhal rame-rame sareng kalihan kanca-kanca, nyepedhah pancal hik hik hik. Pas kula ningali lakone Dewi Sawitri, Wanita Penantang Maut. Sing dados Raden Setyawan Kusyadi, Dewi Sa­witrine  Aries Sunarsiyam.  Cocog saestu, sing kakung nggantheng sing putri ayu,” omongane wanita iku nrecel, rada angel diselani.
“Jeneng sampeyan sinten Yu?”
“O enggih nggih, nganti lali ora ne­pung­ake,” ujare wanita kuwi kasusul guyu nyekikik. “Nami kula Tonah. Kula niki abdine Ndara Palindriya.”
“Kula selak kebelet, Yu, pundi jedhi­nge?”
“Oalah jan ra Jawa aku iki. Wong ke­belet pipis kok pijer diajak ngobrol ae. Nika lho Mas, jedhinge wingkinge pawon nika,” ujare Tonah karo tuding-tuding per­nahe jedhing. Jedhing kuwi misah watara sepuluh meter saka pawon.
Setyawan marani jedhing. Jedhinge tutupan, payone saka seng. Sadurunge mlebu, Setyawan  nyetitekake pekarang­an mburi omahe Palindriya kuwi. Peka­rangan iku klebu jembar. Tandurane ma­neka warna. Ana kopi, cengkeh, sawo, blimbing, jambu  lan nangka. Swasanane lindhuk, nanging hawane seger.
Ing saselane wit-witan mau lemahe mluwa, ketara yen durung suwe dhidhangi­ri. Ing kebon kono uga ana blumbange. Iwake akeh, ketitik katon nyabeg-nyabeg.  Udakara limalas meter pernah sisih tengene jedhing ana omah-omahan cilik, kira-kira ukurane selawe meter pesagi. Aling-alinge saka gedheg. Wewangunan cilik kuwi luwih trep yen diarani gubug utawa gudhang.
Rampung ngulat-ulatake swasana, Setyawan banjur mlebu jedhing. Nengah-nengahi nguyuh Setyawan krungu lawange gubug mau muni kemriyet, tandha yen lagi  dibukak. Setyawan kaget. Dheweke banjur nginceng liwat angin-angin. Saka njerone gubug kuwi sawenehing pawong­an metu regunuk-regunuk. Sikile cacad, tangane keple. Lakune disangga kruk kayu. Jangkahe kecincugan. Bleger sarta pra­upa­­ne ora cetha merga pawongan kuwi nganggo sandhangan gedhomboran mawa krudhung sirah, kaya busanane petinju sadurunge tandhing.